سوزانا و سوسن محمد السبب في نهاية مسيرتي الدررية ( قضية رأي درري عام )
السلام عليكم و صبحكم / مساكم الله بكل خير حسب توقيتكم
شلونكم درين ودرات ان شاءالله مرتاحين
اليوم الموضوع رغم التكتيم الاعلامي عنه و لا كأنه شيء صاير حبيت اطرحه
و يكون قضية رأي درري عام و يكون الشعب الدرري هو القاضي و الحكم
بهاي القضية اللي واجهتها البارحة من قبل ادارييتين في هذا المحفل اللي عشت بي
و اعتبرته بيتي الثاني و عائلتي اللي توكف وياي و تواسيني و تساندني و اساندهم
و نفرحهم و يفرحونه و نواسيهم ويواسونه . و حتى لو حجيت منا لباجر هم منخلص .
المهم المنتدى و من فيه من ناحية الكادر الاداري و اعضاءه الموقرين
مو بحاجه للمدح و الثناء لان جميع اللي عرفتهم على خلق و اخلاق و الله يبارك بيهم جميعا
واتمنالهم السعادة الدائمة اين ما كانو اذا كانو من القدماء بالدرر او من الوافدين الجدد .
أغلبكم يعرفني او ميعرفني الله اعلم
شخص كبريائي قاهرهم انتمى لهذا الصرح الجميل او الكان جميل بنظري في يوم من الايام
من قبل ثمان سنوات و اعتقد هاي الفترة و العشرة بعدال عمر مو شوية
اتشرفت من خلالها بالتعرف على قلوب صادقة وارواح طاهرة تقدر معنى الصداقة النقية الجميلة
و اول منصب الي كان مشرف الشعر الشعبي و الحمدلله
و بعدها ترقينه للأشراف و اتمنى ما اكون قصرت بمهامي بهذيج الفترة
و شاءت الاقدار و الظروف ان تبعدني عن المنتدى بسبب طبيعة عملي
لكن بقيت متواصل بين الحين والحين . لان كل ما تبعدني مشاغل الحياة
عن عائلتي الدررية الطيبة اشوف نفسي اتعلق اكثر و اكثر و ما اكدر اتركهم خلفي
و لاحظت وجوه جديده جميلة و جهود راقية و اتمنى الخير و التوفيق الدائم لهذا المنتدى
الحدث و الموقف اللي فاجئني ليلة أمس ومن قبل شخصيتين ادارييتين مرموقتين
بهذا المحفل الكبير و الصرح العظيم ( والعظمة للخالق وحده عزوجل )
و لهما مكانة كبيرة من الاحترام والتقدير في قلوب جميع من انتمى و سجل عضويته في هذا المنتدى
واعتقد عرفتوهن من عنوان الموضوع ..
بحيث بقيت مصدوم من المفاجئة معقولة اني عايش بين مثل هيج ناس
تتصنع المثالية و طيب النفوس و . و . و . و . الخ ....
استغفر الله احجي و في قلبي غصة و حسرة ما ادري شلون راح اكمل الموضوع وياكم
واحتمال يكون اخر موضوع احتمال مو اكيد
المهم خلونة ما انطول بالكلام و تملون من يمي البارحة بالليل كاعد في امان الله
و افرفر بالمنتدى و تعرفون المشتاق للمنتدى يبحوش شبي ما بي من المنتدى العام
لحد ما ينزل يم المتواجدين الان .
وفاتح صفحة ال MP3 لان احب اسمع الموسيقى اثناء ما اتصفح المواضيع وكذا
صدك بالصدفة شفت احد الاشخاص منزل اغنية بالصوتيات
و على عهدي جانت الاغاني مرفوضة بالمنتدى فيعني بيني و بين نفسي كلت استفسر
احتمال صاير تغيير بالقوانين و سامحين بالاغاني
دزيت رسالة خاصة للنائبة الاستاذه سوسن محمد لان شفتها متواجدة كلت استفسر من خلالها عن هالشي
اذا كان مسموح او لا ( طبعا بالمناسبة الرسائل موجودة و بنهاية الموضوع راح انزلهن الكم )
مجاوبتني بوقتها ..
بقيت محتار كلت اراسل النائبة الاستاذه سوزانا لان شفتها متواجدة هي ايضا
و جاوبتني كالت لا بعدها ممنوعه بالمنتدى و كذا ..
بعدها بنصف ساعة جاوبتني ست سوسن و بالضبط نفس جواب ست سوزانا
كتلها يابة عبالي طلعتي من المنتدى فراسلت خالتي سوزانا و جاوبتني نفس جوابج
و ما اشوف الا ست سوسن نزلت عليه دوسة و نص
بكلام ما اكدر احجي لان لحد الان بعدني ممصدك اللي قريته بعيوني من يمها و اقتبس منه الكم
[ مو عيب عليك شنو مو بعينك احنه و شنو تراسل سوزانا و تراسلني بهذا الوقت
و شنو هالميانة و تكَول عن سوزانا خالتي و اكَدر هسه اطردك من المنتدى ]
اني بقيت مصدوم معقولة ست سوسن هيج تحاجيني شنو حسابها اتهكر و هيج حاجتني
الصراحة الموضوع اثار الريبة بداخلي و حز بنفسي حيل ..
كلت اراسل ست سوزانا و استبين الموضوع وياها و اوضحلها الشي الصار من سوء فهم
او فعلا حساب ست سوسن اتهكر علمود تتصرف
و هنا كانت المفاجئة الاكبر و اللي نزلت عليه مثل الصاعقة
جاوبتني ست سوزانا و كأنها اتفقت مع ست سوسن او انطتها خبر قبلي او يمكن حسابهن اتهكر اثنينهن
لان ما معقولة اشوف هيج جواب من يمهن فجاوبتني :
[ كبريائي صح انت صارلك هواي ويانه بس لا تجاوز حدودك شنو
هازة كاروكك حتى تكَول عليه خالتي و ثق اطردك قبل سوسن ]
و من البارحة واليوم صافن على هالشي الصار
ولحد الان ممصدك اللي صار وياي من قبل نائبتين درريتين مثقفتين
( الصراحة من الصدمة حسبت انه ديتمازحن وياي لان شي مو معقول و موقف
محد منهن مبادرة بالمزاح وياي من قبل وان كان فهو بمجرد كلمة مازحة بسيطة عابرة في موضوع ما او في رد ما )
يمعودة ست سوزانا احجيلي انتوا عاجبكم تتمازحون وياي ترة اني كبريائي القديم
العشت وياكم مدة 8 سنوات ..
جاوبتني : [ منو انت حتى نتمازح وياك وشايف نفسك و اذا قديم على روحك ]
ما حبيت اطول بالرسائل و ابقى قيل و قال رغم ما اعتقد خدشت حياء او قللت من قيمة
او انتقصت من شخص و ما اعتقد سبيت العنب الاسود بكلمة خالتي ..
اختصرت الموضوع و راسلت استاذ سامر هاتفيا بعد ما شفته متواجد على الواتس اب
و هو هم اتعجب من هذا التصرف و بلغهم محد يطلعني من المنتدى و هو الوحيد صاحب القرار هنا
في بقائي من عدمه .
لكن للاسف ما اكدر ابقى بمكان غير مرحب بشخصي بي
و اعتقد بهذا القدر ستكون نهاية رحلتي معكم و الى الابد اذا ما شاءالله و بدل الاحوال
و ما اعتقد احد بمكاني يقبلها على نفسه ويستمر بعد .
اعتقد اغلبكم ديكول كبريائي ديشاقة و منزل الموضوع للمزاح لكن والله العظيم و اقسملكم
برب الكائنات ان هذا ما حصل فعلا و الرسائل موجودة
و للعلم الاستاذ سامر جزاه الله خيرا ما قصر و حاول يطيب خاطري بكلام
مشجع و محفز لكن الموقف اللي اتعرضتله البارحة
بحياتي كلها ما متعرض لمثل هيج ردود و هيج كلام يحطم مسيرة سنين من الصداقات الجميلة
ممكن اغلبكم يكول لا تهتم للكلام ولا تتأثر بحجي الناس
اخواني / خواتي خلو نفسكم بمكاني و شوفوا تكدرون تكملون لو لا
و مثل ما ذكرت الكم القضية قضية رأي درري عام
وانتو القاضي و الحكم بهذا الحلم اللي شفته البارحة
و ما اعرف شنو تفسيرة و بصراحة حلم كان جدا مزعج
كعدت الصبح يا سوسن يا سوزانا اني وين شجاب سامر
اثاري يكولون العقل الباطن كد ما تفكر بشي يجيك بالحلم
والله يا عمي جننتونة يالدرريين
والحمدلله على كل حال
واذكرونا بخير واليوم جمعة والصلاة على محمد و ال محمد
و نشوفكم بحلم جديد ان شاءالله
رد مع اقتباس
المشاركة الأصلية كتبت بواسطة ּقَزوۄومُ
