درر العراق

Sωeeτ · 20/October/2020

المراهقة والاربعيني
الحلقه _4

............الموصل ...........

ليليان.. لما دحقت اخويه يحيى وهو طالع من بيتنا ويمشي اتجاهي.. انتهيت متت بمكاني.. وصل وكال..

يحيى:- هاي شكو شدا يصير ؟

حجت جارتنه وكالتله:- امي دير بالك على اختك صغيره لا تجيبلكم الفضيحه..بنات هلوكت مالهم امان..

-شديصير ليلياااااان..

-ااا ما صاير شي والله .. كنت جايه من المدرسه و......

الحجي:- بويه اخذ اختك واستر عليها وعلمها تره عيب تطلع وتجيب صاحبها للمحله وصياحهم بالشارع.. لو ما ابوكم جان رجال مستور.. مع الاسف..

يحيى:- انت شجاي تحجي.. شلون تحجي على اختي هيج.. دفعه للكاع وراد يتضارب وياه.. والحجي كامله وتلازم وياه.. ويتصايحون

والحجيه لزمت بيه و وتكله ياااا والك عين تحجي بدل متهد علينه روح ربي اختك.. وخر يابه وخر فوكاها هم اهل الراهي..

اني بس دموعي تجري.. تركتم وركضت ع البيت ابجي.. اول مدخلت البيت انضرب الباب وراي وطب يحيى..

لج ساااااقطه منو هذاااااا.. وين تشردين مني اشرب منج دم والله... ليلياااااااااان

ام ليليان:- يمه بنتي سترك ربي.. شصاير.. شكوووز

-ماما فدوه الحكيلي.. وحظنتها.. اجه يحيى دفع امي حيل ولزمني من شعري.. ولج ساااقطه منين هذاااا

تردين تفضحينه بالممممممممممحله.. ولج تجيبينو للبيت يوصلج كلببببه..

-ابجي واحجي وياه.. يحيى والله ما اعرفو.. هو لاطش ما اعرفو والرب.. وامي تجر بيه وتصيح اختتتتتتتتك يحيى لااااااا هيج.. شصاااااير يمه بنتي..

وامه تجر بيه وهو يصرخ ويضرب ويدفر ويغلط ويكفر..

يحيى:- دازيج للمدرسه تكو..... لو ادرسين ادبسز.. وترفضين ياهو الجاي طلعتي ضامتلج واحد وتردين فضيحتنه بالمنطقه موووو..

ليليان:- ما ارد بس ابجي وضامه راسي بضهر امي وامه لازمه بي.. وهو يصرخ ويعيط بكل علو صوته انوب جر جنطتي وطلع كتبي وكامي يلزم ويشك..

كمت اصرخ حيل كتبي لا يحيى فدوه لاااا مدرستي... وهو يشك ويغلط فرفحت روحي ع الكتب يجرون منو.. وهو يشكك بيهم كمت الطم على وجهي من القهر

واصيح والله ما اعرفو هو لاحكني والرب مالي شغل بي حرام عليكم.. جرتني ماما واخذتني للغرفه..

اخدودي كلها زلغتها ووجهي احمر كد ما صفكت على وجهي من القهر شاط دمي.. شنو ذنبي باللي صار هو لاحكني والله..

الام:- وج يمه فهميني منو هذا ..

-يووم والله ما اعرفو قسم بيسوع ما اعرفو والله.. وابجي..

-عجل منين هذاااااا وشعندو لاحكج.. صخام الصخمج منين اجتج هلمصيبه شجابو عليج.

-ماما كتبي حرام عليكم ما اريد ابطل من المدرسه.. فدوه احجي وياه لا تخلي يبطلني الله يخليج ماما فدووووه..

-دنشوف وين توصل يا امي والله كريم .. سترك ربي منين اجتنه هلمصيبه..

ليليان:- نحجي اني وماما.. و دخل يحيى كمت اني وماما وكفنا وهي كبالي ساده عني....

يحيى:- ما اضربج بس كليلي منو هذا ؟

-ما اعرفو والله يحيى..

-ولج لا تنكريييين لا تخبلييييني اذبحج والله كولي منين هذاااااااا.. وين اهله منيييين عرفتي شلون يجيبج للمحله.

-ما جابني والله يحيى هو لحكني..

-شعندو وياج احجييييي

-كلما افوت انا وساره يسمعني كلام وصار ايام والله منمر من طريقو حتى لا يتعرض النا.. بيش اقسملك بس والله ما اعرفو يحيى .. احجي وابجي وامسح بوجي..

-منين وين يشتغل.. شسممممممه.

-ما اعرف.. بس اللي اعرفو يشتغل بالسيطره اللي قبل الفرع مال المدرسه..

-شنو شكلو شسمو من يا منطقه..

- اسمو ما اعرفه .. طويل وشعرو خفيف وعندو شامه فوك حاجبو وكلامو ما مصلاوي.. لهجتو غربيه..

-اسمعيني طلعه من هنا ماكو.. عتبت الباب ما توصلين افتهمتي لحد ما ارجع..

-هزيتله راسي والدموع بعيني..

طلع وامي و مرت ابويه كاعدات يمي ويحجون ويايه واني ابجي..

بيومها على اساس يجي خالي بس تعطل وما اجه.. خابرته عليه ماما اكثر من مره بعدو بدهوك..

جا يحيى بليل هو واصدقاء الو لابسين دشاديش ولحاياهم طويله.. اكثر كلامهم كان فصيح...

وما كدرنا نستمع هواي لان يحيى زكح بينا وكال التتسمع متلوم الا نفسها ونريد چاي بسرعه..

اني تركتم ورحت ع الغرفه.. وبقت ماما و مرت ابويه يحجون.. كل همي كان كتبي ومدرستي لامه الكتب المشككه واجمع بيهم وابجي.. ميصيرون

شيرجعني.. المدرسه لو شافت هيج كتبي تفصلني. ما اريد ابطل يارب فدوه .. مدرستي احبها.. ساعه اشم بكتبي واخليها على عيوني وابجي وساعه اكلب بيهم وادموعي فوكاهم..

.............الرمادي ..............

صراع:- بالمركز دا اشتغل.. ودك موبايلي.. دحگت عليه... مكتوب طلال.. منو هذا طلال.. ما اتذكر منو..

رفعت خط.. الووو

-الو العريف صراع

-نعم تفضل

-اني الشرطي طلال الرافع اللي بالفوج وي عابد..

-هاااا هلا يابه اهلا وسهلا .. اعذرني الذاكره تخون. شلونك يابه اشلون الصحه..

-الحمدلله ابو حرب.. خابرتك على شغله صارت البارحه وما مطمئن الها..

-اللي هيه ؟

-البارحه العصر مرو جماعه يسألون على ولد

Sωeeτ · 20/October/2020

تكملة القصة
مواصفاته تشبه عابد وكالو من الغربيه وعرفت يقصدونه..

جان عابد نازل فكنالهم ما موجود.. العجيب من البارحه ولليوم عابد مفقود..

-اكف لحظه هين.. شنو ذوله الجماعه منين وشيردون من عابد.. ؟ وشنو يعني عابد مختفي.. وحده وحده خل افتهم

-والله ابو حرب ما اعرفهم.. بس يخوفون.. لابسين دشاديش و لحايه.. والخوف اذا جانو من جماعة الدوله الاسلاميه..

-يابه شنو القضيه .. شجاب عابد على الدوله الاسلاميه وشعندو وياهم.. فهمني.. خابرت عابد انته.. اكف خل اخابره..

- ابو حرب اني خابرتك حتى تشوفه هم جانو 4 رجاجيل.. 3 اصحاب لحايه.. وواحد منهم اشكر ابيض.. شكله مال اكراد..

-خل اخابرو وارجع اخابرك.. خل اشوف هذا وين.. سديت الخط وانه گلبي يخفك على عابد بس لا صايرلو شي..

خابرت.. موبايلو يدك وما يشيله.. ارجع اخابر وهم ميرد.. ب8 مكالمات ميدك.. تركت المركز وطلعت..

خابرت على سعد و نائل اخوتي.. كلتلهم هيج وهيج السالفه انه طالع للموصل ادحك وين صاير..

طلعت للموصل وصلت الضهر للسيطره مال عابد.. حجيت وي جماعتو ميعرفون وين.. الاهل خبصوني اتصالات.. وما ارد..

شرد اكلهم مختفي.. بقيت محتار.. واتصل وماكو.. جن الدنيا صفكتني على وجهي.. دخت ما اندل طريقي منين..

والامه كلها تخابر.. اجت رساله دحكت عليها.. من سعد كال احنه بالموصل انت وين.. خابرتو واتلاكينه..

ولد عمي كلهم تسلحو واجو.. 4 سيارات .. كالو ما تبينلك شي ما دريت عنه..

-شدري عنه فص ملح وذاب.. غير كون يرد.. راح اتخبل..

جاي نحجي.. خابر طلال وكال ابو حرب تكدر ترجع للفوج مالتنا.. اكو واحد.عنده كلام عن عابد.. صديقه اللح..

كتلو ثواني واحنه يمك.........

،،،،،،،،،،، الموصل ،،،،،،،،،،

ليليان:- لثاني يوم ما رحت ع المدرسه مرت عليه ساره.. وطالعلها يحيى كايللها بطلت من المدرسه بعد.ما تروح..

ذاك اليوم ابد ما نشفو ادموعي على مدرستي.. شعوط كلبي من القهر..

اجه خالو ومرته.. الضهر.. وتغدو.. طبت عليه امي تكلي لمي غراضج ترحين وي خالج واني اتبعج بعدين..

ما حجيت رحت الم ملابسي بسرعه...

واني دا الم بملابسي.. سمعنا صراخ واعياط بالشارع وصوت يحيى واضح..... كل احنه ركظنا للشارع دنشوف شصاير

واحد من المنطقه معير يحيى بيا ومتضارب وياه..والمنطقه كلها واكفه ويفاككون..

.. خالو عرف شنو سالفة الولد وتخبل ويلوم بامي ويصيح عليها على ابو ما عرفتي تربين بنتج..

ومرت خال جن جنونها تحجي وتسمعنا كلام السم.. و هاي ام الولد السمعتها بالكاع ناخذها لابنه.. لو تضل اخر وحده فلا اخذها جنه ..

حجت هيج وامي طكت وياها.. شلون تكولين عيج على بنتي.. محد يصدك اني ما عندي شي وياه كلها مقتنعه ان اني جنت وياه.. وهذا اللي كان مخبلني..

محد يسمع منك.. كلها تقتنع بفكره هي تخيلتها.. القهر اللي صابني ذبحني.. اشنو ذنبي اني وهيج يصير بيا..

صارت المناكر والصوت ارتفع بين خالي ومرته وامي.. تكللها بنتي ما عدها شي وهذا لاحكها وشوه سمعتها ومرت خالي ترده ماكو دخان بدون نار وبتج طاش خبرها وي صاحبها واجيبها لابني شنو قلة نسوان..

وبعد المصايح.. خالو اخذ مرتو و طلعو بس امي حيل اتأذت وكامت تبجي وساعه تلوم بيه وساعه تدعي عليه من حرگة قلبها..

بقيت محبوسه بالغرفه.. يومين.. لا اطلع ولا اجي وبس ابجي اجت ساره مره و يحيى طاردها ما قابل تدخل.. عشت بقهر فضيع على دراستي..

كاعده بالطرمه الساعه 10 الصبح واقارن لو هسه اني رايحه للمدرسه يمكن هسه الدرس ال3

وابجي واتذكر.. كل كلمه بيني وبين ساره وخوفنا من الامتحان والمراجعات.. يارب شلون راح اتحمل اريد ارجع لمدرستي..

دا افكر وي نفسي.. اندكت الباب.. گمت صحت من وره الباب... منو... صاح ...انه ..

-منو انته ؟

-غير تفتحين الباب ونحجي.. واكلج منو انه..

-فتحت الباب شويه... ومديت راسي ادحق منو .. شفت رجاجيل كومه.. و4 سيارات حديثه وواكفين ابابنه..

حجه وياي رجال وكال ..بيت يحيى هاذ ؟

-رديت الباب من الخوف وحجيت من وراه... اااا اي.. منو انته وشرايد ..

-صيحي اريد احجي وياه..

-ما موجود بالبيت الضهر يرجع..

-انتي اللي اسمج ليليان مو ؟

-رجعت ادحق عليه منين يعرفني.. انت منو.. بقيت اركز بملامحو.. بساع شبهت على وجهو.. نفس هذا اللي لحكني وتحرش بيه بس هذا مشيب ذاك لا ..يمكن اخوه..

طبكت الباب بوجهو حيل وما رديت وركضت جوه.. ما ادري شصاح وراي ما سمعت.. دخلت على امي فحطانه وخايفه... اصيح ماما ماما لحكي..

اجت مرت ابوي.. صرخت شكووو..

-باجي رجاجيل وسيارات كومه بالباب

-منو همه ؟

-ما اعرف ما اعرف طلعيلهم.. اجت امي كالت منو.. شكو.. طلعت مرت ابويه.. وامي وراها..

واني وكفت ادحق عليهم من باب الهول.. امي و مرت ابويه يحجون وادور خابرن يحيى والرجاجيل بعدهم بالباب.

اني شفت شكلو يشبه ذاك الحقير معقوله اتخيل.. لا والله ما اتخيل اني متأكده بس هذا مشيب وسمين.. وذاك شاب وضعيف..

اي اي والله نفس العيون والخشم حتى الحاجب

Sωeeτ · 20/October/2020

تكملة القصة

نفسه بس هذا عندو شوارب ذاك ما عندو..

شعدهم جايين يا الله بس لا تصير مصيبه دخيلك يارب.. لشوي دخلت ماما..

ركضتلها.. ها ماما منو ذول.. احجي والله خايفه..

-اسكتي لحظه بس خل يجي يحيى.. .. ها يحيى يله يمعود وينك اشتهرنا كلهم بالباب واكفين ومسلحين وبس احنه بالبيت تعال

اي اي امك جاي تحجي وياهم استعجل فدوه .. يلا .. بس لا تتأخر..

-ماما بس احجي منو ذوله وشرايدين. ليش جايين ..

-يكولون انريد ابنه..

-منو ابنهم..

-اسمه عابد .. تعرفينه..

-لا ما اعرف هيج اسم.

-يكولون يحيى يعرفو نريد يحيى..

-بقينا على اعصابنا وهم بالباب لحد ما جا يحيى.. ودخلو للاستقبال..

احنه بيتنا صغير.. الكراج اله باب واحد يدخل للبيت وهو باب الهول.. ومن الهول.. تدخل للاستقبال على الايد اليمنى..

ف من طبو دخلنا للمطبخ.. وهم فاتو للاستقبال.. مشينا بساع وكفنا على جانب الباب نتسمع.

يحيى:- دا اكلكم ابنكم ما اعرفو ولا شايفو.. شنو تردون تبلوني بيه...

صراع:- دحج يابه ترانا مو زعاطيط جدامك وتضحك علينا.. كلش زين تعرف عابد وين.. وصار عندي علم ان هو عندو علاقه وي اختك..

بعد وين علستو اخوي.. تكولون الا حرام بالحرم اگلب عاليها واطيها بالقران.. ولا تعتقد الجماعه وياك يحموك.

اسئل ودحج عشايرنه منين نترس عين الشمس لو صدينه.. تكول اخوي وين خيراً على خير .. ما تكول وتتخاتل وياي..

بالقران انخلي البرنو يحجي والدم يصير للركب..

يحيى:- انته شنو جاي اتهدد اكبر واحد.بيكم ما يخوفني.. واخوك ما اعرف وينو و شتريد تسوي سوي.. افتهممممت ويله برااااااا..

- دام هيج الحجي احنه نكوم ويصير خير..

طلعو واحنه يم الباب صاحت مرت ابويه.. يمه شرايدين من وليدي وتهددون .. شعدكم ويااااه..

التفتلها رجال وكاللها.. مثل ما ولدج غالي ولدنا هم اعزاز حجيه.. سلمونه اخونا والكم الامان..

حجاها وطلع.. كامن امي وباجي يلطمن ويضربن على خدودهن وركضن ولزمن بيحيى ما خلنه يطلع وراهم..

وحده تصرخ وحده تسأل انخبصنا خبص واني واكفه ابجي.. مرت ابويه تسأل وتملخ بيحيى منو ذول يمه احجي ولك كووول منين اخوهم وينو..

يحيى:- انعل والديهم والله الا اخلي الدوله الاسلاميه تفنيهم همه وعشايرهم بالقران.

-عزه بعينج خالديه ولك يا دوله اسلاميه ولك يمه خاف الله انته ويامن تتورط.. يحيى .. وينك وين الدوله الاسلاميه استر علينا ابنيييييي..

اني واختك ومرت ابوك كلنا نسوان يهدون علينا ويصخمون وجوهنه يييمه.. ابنهم وييييينه.

يحيى:- يمه دعوفيني لخاطر الله .. اني اتفاهم وياهم..

-شتتفاهم ولك انت شفت اسلحتهم وسياراتهم يحيى وينك وين الطلايب مو كدهم انته يمه.. لا عم ولا عشيره توكفلك خاف الله بينا يحيييييى..

-يمه الدوله الاسلاميه بضهري وكلهم جماعتي شحده اليطخ بابي يفجرونه.

-صخام الصخمني تخزيتي وتعزيتي خالديه.. ولك يمه ارهاب ذوله ويامن تورطنه يحيى اذبحك والله وما تطلع

-يمه شقضيتج دوخري خل طلع

-ما تطلع والله الا تكلي ابنهم وين

-يمه ابنهم ساقط ولازم يتعاقب

-ولك انت الله وتعاقب اكعد واستر عليه وكلي ابنهم ويييييين..

-وخري يمه استغفر اااااااالله..

-ما اوخر وما تمشي الا على جثتي والله
.. كلي ابنهم ويييين.. بس جاوبني ابنهم عدل لو ميت..

-عدل عدل بس وخرييييي..

-ما اوخر هسه تودي الهم..

-يمه الخاطر الله دووووووخري..

دفع امه من الباب وطلع... وامي تفتر وتبجي وتدعي وامه تلطم على اخدودها وتصيح ابني راح يكتلوه. ابنيييي..

ما بقت من حركت كلبها طلعت وراه للباب بسرعه وتصيح. وهو يمشي.. عثرت ووكعت على عتبت الباب وعلى وجهه..

ركضنا اني وامي.. ويحيى رجعلها ووجها وحجابها كله مخربط والدم يجري من خشمها وتصيح وليدي لا تروح يمه ما الي غيرك..

وتخربطت بيده.. يحيى يبجي ويصحي بيها وامي وكفت كدام سياره ماشيه وخلتها تشيل مرت ابويه

وصعد يحيى و وامي وياها... واني واكفه ابجي.. حركت السياره ومشت.. ركضت للبيت قفلته وكعدت وحدي ابجي بقوه..

ليش هيج.ديصير ربي .. دخيلك يارب انقذنا والله ما سويت شي.. احمينا منهم يااارب..

ل الضهر2 ومحد منهم اجه ولا خبر.. اندكت الباب وكفت على حيلي والشهكه مال البجي ترتفع ابلعومي.

طلعت وصحت بصوت مبحوح. منوو..

-اني ساره ليليان فتحي الباب..

-ركضت فتحتو.. وحظنتها بقوه واصرخ بالبجي بكل قوتي .. ابجي بخوف برعب بقلق بقهر.. بذنب اني ممسويته

حاجتني ام ساره.. كومي بنتي كومي لا تبقين وحدج هنا مو زين عليج وانتي بنيه.. تعالي يمنه لحد.ما يجون اهلج..

اخذوني لبيتهم وللان ابجي وما سكتت ابد.. لحد ما تعبت صدك لليل ونمت.. صحيت على صوت امي وهي تحجي وي ام ساره وتتشكرها..

بساع كمتلها.. ماما اشلونها باجي خالديه..

-السكر صعد عدها حيل.. وحالتها تعبانه. بالمستشفى هسه.. لباجر نشوف الدكتور شيكول.. يلا امشي خل نروح..

ماما خلينا هنا الله يخليج خاف يجون علينا..

-عيب بنتي كومي.. شلون نبقى هنا..

Sωeeτ · 20/October/2020

تكملة الاخيرة
-اتشكرت منهم امي وطلعنا.. دخلنا البيت قفلته.. وخلت مخده وتمددت وبقت تون..

تمددت يمها ونمت.. ل3 بليل .. اندكت الباب.. كعدنا اني وامي.. وحده تلوذ بالثانيه من الخوف..

ماما منو ديدوك..

-اصبري بنتي.. يا يسوع احمينا.. يا امنا العذراء انقذينا..

وكفنا ندحق منو ع الباب .. سكت الدك.. بس صوت مطافر.. رادت تجرني امي للغرفه.. دفرو الباب ودخلو وكلهم ملثمين بغتر..

امي خلتني وره ضهرها وكامت تصيح منو انتم شرايدين من عدنا اطلعو برااااا ..

-يحيى وينو.. ما نريد غيرو ولا عدنا شي وياكم. كلولنه يحيى وييين..

-والله يحيى ما موجود بس اني وهلبنيه استرو عليه الله يستر على اعراضكم لا ننفضح يمه ابوس اديكم...

وهي تحجي واحد افتر على كل الغرف بسرعه واجه كال...

-ابو حرب الضاهر البيت ما بي محرم خل نطلع

-الا اكظبو لهلكلب.. اطلعو..

.. انسحبو من البيت بسرعه .. وامي ركضت تريد تقفل الباب وراهم.. واحد.منهم لزم الباب.. .. وحجه

-اكفي لحظه... بس احجو ما نسويلكم شي والله... يحيى وين .. عابد وين وديتو.. احجوو مثل ما انتي ام.. عابد له ام كلبها مثل النار عليه بس كولو وييييين..

يحجي ويهز بالباب بعصبيه واني لازمه بملابس امي حيل واشهك.. اصواتهم واسلحتهم واشخاصهم.. تخوف بليل.. احس شعر راسي وكف من الخوف..

تمنيت بابا موجود واحس بالامان ولو لحظه بوجوده...

صرخ بس كوووووولووو ويييين.