انا شارع طويل هواي بي عثرات - خضير هادي
انه شارع طويل اهواي بي عثرات
ابهيده امشي عليه ابهيده لا تعثر
لتگلي الخناجر تستحي من الناس
الخناجر من تهد ماتنحسب خنجر
انه جلدي عبايه وفاض بيه الشيب
وخايف علعبايه منلغسل تگصر
المستر حلو احسن منلعريان
ولي الگصته غيره ايحب المستر
من اچلچل علي وغيم حد الگاع
وتفرهدني المصايب وگعد اذكر
وشوفك مو اليه ابكلشي مو وياي
ونته اهناك واگف،واگف مخصر
والمعبر قريب اعليك مو يمي
اتمنه الفاسه بيدي وهدم المعبر
مثل جامه وطحت من الجبل للگاع
التدوسه الحادله مو مثل المكسر
فتحنه اعلباب الله منجانه العوز
تدري اشگد مصايب شايل الچمبر
بعدني ابحيلي ذاك وتدري انه خيال
اذا هسه عفتني شلون من اكبر
اهلي علموني والامثال هواي
الطيب الي تزرعه اباي ارض خضر
بس واياك انته وانته صبخه ودود
مثل شيطان يكره هيبة المنبر
اكسرتني انته وگمت وعبرتك ابسرعه
لتگلي الكس ميون علمجبر
گصيت العثك الچنت تاكل بي
وخليت التمر بالگاع يطشر
ماتخطر ابالي حته بالصفنات
والاصفر كرهته لان انته اصفر
تره المشرور ينشف من يجيه الريح
واكو امبلل صدگ علحبل ما ينشر
انه صادق چنت وياك بالهمسات
ومن چذبك علي خليتني اتكتر
اتريد اگعد ابگلبك ودفع اني ايجار
غم الاجرالي وغم المئجر
العبه انتهت حته الشبچ شالو
الشوط الثاني خلص والحكم صفر
رد مع اقتباس