ليش غيري يشمك واني اغار – خضير هادي
جنة نكتب على الليل بقلم اسود
وما نبرد الماي وحده الماي يبرد
نلزم الحسرة ونجتفها بحبل
خاف يم الغبرة تنهد
ندري بالسجين حمرة
وباشطه من غير مبرد
اليبجي على الضحكه تعوفه
واليفك الباب ينسد
خوفونه من المصيبه واحنى بيها
واحنى متعودين على الخوف وعليها
والشمس لبست عبايه تغطت من الشايفيها
وارامل مكومه كعدن على الرصيف
يارصيف الموت بلكي يمر وليها
غطي وجهك ذيج سجين المنايه
متانيا الركبه تجيك
غطي وجهك ما بقت للعتبه حرمه
الباب غيره وشالعي
وجنه نكتب على الجدار
وبيت بيت نصيح كلنا يمته يوصلنه النهار
والخضار بكل مدينه واحنى ناسينه الخضار
ذيج دار وبيها قطعه بصفها دار وبيها قطعه
وذاك شارع بيه قطعه وذيج دار وذيج دار
بيا محطه تريدني انزل واني عايفني القطار
بين طلقه وبين سيف وبين صوت الانفجار
ليش عايفني وسط هاي الخيارات المميته
بعد ماعندك خيار لا تعاتب طير
غادر بيتهم بعيد طار الي يدوس النار
يدري مو ثلج جواها نار
احنى مثل الينتظر يمته يموت
وتدري صعبه الانتظار
يا هوا بغداد بالله انطيني شمه
ليش غيري يشمك واني اغار
ياهوا بغداد دفيلي ضلوعي
ادري بي شكثر حار
ياهوا بغداد يمته تصفه من الغبار
يمته يتكاسر نفس منك بريتي
ويكتل الغربه البنت في صدري دار
ليش غيري يشمك واني اغار
رد مع اقتباس