يل ماشي بصفنتي اوكَف وياي
ليش تريد ترحل هسه لاكَيك
اطش ابالي اسمك وصرخ الله
فراش حروف اسمك لايكَ اعليك
اضمك بيه شمه لخنكَة الروح
وميزك عن هواي بروحي اخليك
سر بلون حسنك شاغل البال
عجيب شما افسرك انخدع بيك
اليفوق التصور عجبه للكون
وضن ام العجايب راح اسميك
ماي ومن لكَيتك كَلبي مشتاكَـ
غرفة ماي رايد تبخل شبيك
سائل افك صدري وشوف محتاج
يمته تكَول شمة سائل انطيك
بيه ارياح شوكَك وانه سعفات
تهز بيه بصفنتي وشوفي ناسيك
ارسمك روح فوكَـ شفافي تنشاف
وخاف الناس تعرف بيه هاويك
اخلي اقفاص فوكَـ شفافي السنون
احسب لو مشيت بشفتي غاطيك
عليك اتراب روحي انفضها بالكَاع
ودور حبه حبه ترابي والكَيك
قيس شجان حته تسمه مجنون
المثل حالي شتكَله مخبل ادريك
يهدي كَلوب الله وهادي الاكوان
يمته الله ولاكَي لكَلبي هاديك
رد مع اقتباس
