مشاي رايح لحسين
عفت ديرتنه ومشيت وكَاصد اعله دياره
انه ملهوف الضريحه ودمعتي تتجاره
يخسه كل واحد يكَول السنه ماكو ازياره
خل ينظر يشاهد زين مشاي رايح لحسين
بدت ساعة اربعين حسين والوفايه
وانه يوميه انتظرها وحضريت الرايه
والله هالنعمه جبيره نعمة المشايه
كل لحظه احنه متانين مشاي رايح لحسين
طالع وكلشي وراي بدنيتي خليته
المشت للجنه خطوته بعد شله ابيته
انه كَلبي قبل جدمي الكربله وديته
كَاصد الصوب الطيبين مشاي رايح لحسين
باربعينك فضل ليه وابد ما قيسه تره
زيارتك بالروح هيه وبعد بالدم تنشره
وادري متحضر حبيب وكَام جهز دفتره
يكتب اسماء الماشين مشاي رايح لحسين
ما املن من طريقك لحظه وحده واستريح
الكاظ جف حسين جفه بالمشي لا ما يطيح
والله دربك يا حسين شكد حلو وشكد مريح
كون ارجع امشي مرتين مشاي رايح لحسين
بالرغم من البلاء ورغم كل هذا الوضع
يستمر خط يا حسين وابد لا ما ينكطع
الله حافظ هالزياره وحاشه عنها نمتنع
هالكمه متصير اثنين مشاي رايح لحسين
جعفر عطيه البزوني
رد مع اقتباس
