من بعيد..
ورقة شالتهه القوافي وتحلم بفد شي جديد
والقلم ثورة حياء
گبالّ طلقة التذبح العصفور عمدة
گبالّ شجرة تبيع باصوات البلابل لليصيد
من بعيد
سنينّة الصامن على سياج المسافة أتاني باچر بلكت ايمر بيهه عيد
هناكَ عيد .. هناك گمرة
أهناك بشفاف الصدگ مزروعة جمرة
والـ خذوا ضحكاتنه بنص النهار .. رجعوهه وبيهه حسرة
شلون حسرة
ما لگوا محراب واگف خلّوا بكل بيت طبرة
والأجه وجايبلة بوسة يدوّر خدود الجهــال .. شو طبع فوگاهه سطرة
والزمان البينة عايش ماتت بچفة العقيدة
واحنه مدري شلون نوصل .. ليل ودروب الصبح كلش بعيدة
أختنگت الكلمات بچفوف السكوت
وماتت افكاري الجديدة
وگالوا اعله الشاعر اخرس حته لا فد يوم يحچي وعالوطن يكتب قصيدة
آنه راح ارثي العقيدة
البيهه ظلّ يبچي الأمس ويتاني باچر
الكتلت التاريخ بسيوف الدفاتر
العقيدة البيهه حتى الخارطة انترست سواتر
من زمان الثورة ماتت .. بيد تجار العقول
وعالرمح خلواّ ضماير
كافي خلي الصوت يحچي
ما اريد ألتوّه يمشي يبيع بالشارع جگاير
وچم يتيم الراد يسترهن خواتة
وما گدر يبنيلة باب
وعدنة چم عطشان مات وذلته خيوط السراب
وچم شريفة البسطت بهدوم ابنهه
حتى لا تحتاج وتبيع الحجاب
واحنه ويـن
عفنه سهم اللا حقيقة النابت بعين الصواب
وبينه سيف
بينه سيف شگد وكح
يذبح بليل الجهـال ويضحك اگبالّ الجرح
وخاف لايطلع نهـار
ظلّ يخلي رماد بعيون الصبح
اغتالوا الثورة بمفاهيم الخضوع .. وسجنوا لسان القرار
ويا فجرنة المات سكتة
وكون يطلع ياخذ بثار النهـار
وكـــون اطير
حتى اگل للشمس غيبي خطية ماعنده سگف بيت الفقير
كون اطير...
وأخذ وياي السمه لمن ارد
حتى اجيبن للصرايف حفنه من ذآك البرد ...
وكون اوزع للعوائــل ..حتى بالحصــة ورد
الشاعر زياد البصراوي
رد مع اقتباس
المشاركة الأصلية كتبت بواسطة prïnċë häïdër
