انتَ وحدك
انتَ وحدك ..
كلشي بالدنيا يگلك انتَ وحدك
حتى خطواتك تگلك انتَ وحدك
حتى لونك ، الساعة الـ بأيدك
نعاسك !
فَّزة گليبك تگلك انتَ وحدك
يا غربتك يصرخ الحايط بوجهك
يا ضياعك تلمض عيونك بوجهك
ينقفل شباچك وتعتگ حروفك
البردة نفسها
وكِل ظلام الغرفة يتبده بديك
تصير أحلامك ضواك
تذبل اصابيعك بديك وما تنوشك
عينك العشگت الوادم ما بچتلك
روحك النذرت ضواها
لهوى الوادم ما بچتلك
انتَ نفسك ما بچيت ..
ومن صارت عيونك ما تشبهك
عفت وجهك بالمرايه ومشيت
يا غربتك ، يا ضياعك
يلـ بيك
من كِل حِزن بالناس شامة
من كِل فرح بالناس لمضة
يلـ بيك ، يلـ مملي ضياع
ياهو يندل شضاياك ويلمك
ياهو منهم !
كاتب إسمك ع المخده
وجاس روحك
أصفر لوحدك حزين
ذابل تلملم بقاياك
من الوجوه ، من العيون
ومن المصاطب
تلمك وترجع لوحدك حزين
مثل الگلوب الـ بالمحطة
تنطفي ووحدك حزين
مثل چلمه بكاغد أصفر
خافت ووحدك حزين
مثل گلبك ذابل ووحدك حزين .
م
رد مع اقتباس
