خل يجون اخوتها من طف كربله
ريضوا ياللي زينب مشيعينها
وين ابو النوماس وين حسينها
****
ريضوا بالحرة الدف لنعجّلة
لا تسرعون المشي خل نمهِله
خل يجون اخوتها من طف كربله
ويحضرون لزينب وتجفينها
****
اتأَمِلَت يحضر جنازتها الكمر
من تحين لموتها ساعة قدر
تكول ابن عودي الشهم ريته ايحضر
ودمعتي بهالساعة تنشف عينها
*
ريته ابو السجاد يحضر دفنتي
يشيل نعشي وهم يجهّز حفرتي
ريتني بطف كربله الحكت اخوتي
والتموت بغربة الله يعينها
*
ريته ابو محمد درى بحالي شسده
من البقيع ايكوم يترك مرقده
بغربة كبر اخته يظل لوحّده
تكضي بارض الشام تالي سنينها
*
ريضوا يالشلتو النعش فوك الْمتون
صوت مُشجِي نسمعه يبجّي العيون
عمه انا السجاد يل جنتيلي عون
وين عمتي الغالية مودينها
**
على هونك بالله يال شلت النعش
فوك هالجثمان ظِلّ امن العرش
لا تهزة بقوة خايف تخدش
جروح البلموتونها مخلينها
*
وداعة الله عمه يم كلب الابي
او وارثة بيت المروءة الطالبي
قائدة ركب السبايا الزينبي
بطلة كربله وميادينها
ناظم الفضلي
رد مع اقتباس