يوميات مواطن عراقي ..
تطلع للولايه تريد ترتاح وتسولف وي جماعتك .. تحير من هوسة الستوتات والدراجات والسيارات والناس اللي مبسطه بنص الشارع العام بحيث انته تظل تتلفت يمنه ويسره وماتعرف شكو !!
تمشي عالرصيف ، الرصيف محجوز لأهل المحلات ، تنزل بالشارع تصير املح من التراب وخشمك گوه يجر النفس بسبب هذا التراب والجو الحار والرطوبه !!
تعوف كلشي وتگول خل أگعد عالمصطبه بلكي شويه ارتاح تلگه حاويات الزباله داير مدايرك ومتروسة اشكال والوان والريحة تاخذك لله وترجعك !!
تگعد بالبيت الف شغله وشغله تاكل بروحك وماتعرف بيش تبدي وشتسوي !!
تباوع عالتلفزيون يطلعلك كاظم الصيادي لو مشعان الجبوري لو عزت الشاهبندر لو بهاء الاعرجي لو واحد من هاي السرسريه اللي صايريلي محللين سياسيين ويگعد ساعه كامله يثرم براسك سوالف وانتقادات أصغر واحد بالشارع من تسأله يجاوبك بيهن !!
تجي للفيس بوك تدورلك على سالفه زينه وبيها حظ تستمتع بيها ماكو !!
فلان انتقل الى رحمة الله ، ادعو لفلان بالشفاء ، زرنه واندعينالكم ، الغده الزين ومكانكم خالي ، اليوم اجتمعنه بمضيف فلان ، فلان عشيره اتعاركت وي عشيرة فلان وصار الرمي ماله والي ، ناس ماتت وناس اتصوبت !! تطفر لغير مكان تشوف واحد منزل صورة واحد سياسي لو رجل دين معمم ويگول إنته وبس ، تطب عالتعليقات تشوفهم واحد يشتم الثاني وواحد يسقط بالثاني ، هذا ذيل ، ذاك جوكري ، هذا عميل ، ذاك تابع للسفاره ، هذا بعثي ذاك " ئبن زنه " هذا رافضي ذاك ناصبي ، هذا ملحد ، ذاك شيوعي ومايعترف بألله ، هذا كافر ، ذاك موالي ومن هاي السوالف التعبانه اللي لاتقدم ولا تأخر ولابيها أي فائده !!
تگعد بالگهوة تريد تجر نفس وتشرب چايك براحه وتگوم يجيك واحد يلزگلك بسالفه تعبانه يعيدها عليك يوميه ويريدك بالك لازم يكون يمه وتنتبه إله وتضحك بوجهه وتجامله !! تعوفه وتدير وجهك لغير مكان يلزمك واحد ويصير براسك هو ابو المفهوميه وخبير بكل مفاصل السياسه والاقتصاد وعنده حلول لكل الأزمات اللي دمرت العراق ومن تسأله شنو توجهك السياسي والفكري يگلك عراقي وبس ، وانته كلش زين تعرفه وتعرف الجهه اللي منتمي الها ويسولف بإسمها !!
كل هاي الإزعاجات بجهه وسالفة الماسنجر بجهه ثانيه !! كل ساعه واجتك رساله جمعه مباركه لو رساله ويگلك دزها لعشره من جماعتك وإذا ماتدزها الله يغسلك ويطيح حظك ، لو واحد يدزلك مقطع وأول ماتفتحه يگلك اقتربت الساعة وأنتم لاتعلمون وتشوف بالمقطع موت وخراب واعاصير وفيضانات وأجساد تحترگ وذبح ودم !!
ترجع للبيت تريد ترتاح وتلزملك كتاب تقراه وتستفاد منه تتفاجأ بأن دماغك متوقف عن الفهم والشعور والإدراك بسبب كل هذا اللي ذكرته ، مضاف اليه سالفة الحر والكهرباء اللي كل شويه اجت وانگطعت ، والمولده اللي شغلتها بس إسم !!
ولأنك عايش تحت كل هاي المنغصات اليوميه وتريد يكون بالك مرتاح وواهسك 100% تستاهل مني هاي العبارة(الله يطيح حظك ياالساني)