الك بيه خلك ليله عرس محروم
صدى الماضي حلم ياخذني الك شوغات
واحس ضلوعي تطابك بكل شهكه
يا ذاك النفس اليمشط زلوف النبض بلماي
الك بيه خلك ليله عرس محروم ومسامر
لحد يتبده كل حيل الجفن بلشوف
كبل لا اغفه جيب ايدك على اضلوعي
وافز واكطع حبال الواقع
واركض لعينك روح
اشبع خوف وادروش..
واختل بلسواد وافرش ظنوني
صدى الماضي نهر ياخذني
الك بستان علي شحت رسايل غيم
يا ذاك القريب التسمع الرمشه
الك بيه عصافير بسمه الغبشه
الك بيه ورد توه النده باساه ..نعسان ويدور
ريتك بعطره
صدى الماضي مطر..كلما يطيح تصير بعيوني
دواير شوف
يلمعلمني اسولف كلشي لعيونك
مو كتلك كبل لتروح دورلي وطن بي ريحه
من طولك
مفتاح الصبر ظهرك.فتحته بوكت مو وكته
فتحته بوكت بي تعبان بي محتاج للسكته
فتحته وهبت الفركه ورذاذ الظلمه بعيوني
وصدى خفكه جنح طير ويطيح تراب مدري منبن
تبعته لديرة الوهواس التم لمة البردان
من الخوف وصوت الغريب وركضت المجهول
بجفوفي اعصر براسي ما مش باب لجفوفي
صداع وصوت ومرايات تفتر بي
اصيحك والصدى بالسمه يخلي اثار.
.اصيحك يا وطن وبروحي غربة شوك
وبروحي حلم منسي وجمر دم
ورسايل ناس وبروحي قضيه وثار
عفت بيه فراغ الهوه بظله يتيه..وحجي ليل
وبلم مجروح
بعيد وصورتك يمي..اشبكك يا كمر بالماي
احن لشوفتك واغرك
واتخيل تجي وارفع خجل
روحي واعاتب بيك
الومك واصرخ بوجهك واسمعنك حجي يزعلك
لأن تدريني ما اضرك
انه لو عندي خنجر ما درت ظهرك
وافز واكطع حبال الواقع واركض لعينك
روح اشبع خوف وادروش
واختل بالسواد واعتذر منك
يا طعم الشمس بلماي..عايش بالحذب بجفاك
اصبر وانطي عمري وبيرغ الهامه
الشمع من عمره ينطي وتثبت اجدامه
يا طعم الشمس بالماي..يمته الكاك
وصل بيه البلم حد نزلت الشلال
كبل لا اطيح اريد الكاك
اريد احجيلك البيه واريد ا
بجيلك البيه واريد اعرف منو ناسي
وديلي قميصك كلبي ظل ميشوف
حيدر النوري
رد مع اقتباس