عگب ما حشّمت زينب بالكفيل
ذب جناح الميسرة اعلى الميمنه
گمر عدنان بأصول الهيمنه
******
عگب ما حشّمت زينب بالكفيل
لاح المطهم وزم رمحه الطويل
وصِدَر صوت امطهّمه اليرعب الخيل
أخذ درب المشرعه وليهه اعتِنَه
******
ولن كتيبة اعتنت من جيش الضلال
هل كتيبه تريد ويّاه النزال
وعل شريعة انتقل ميدان القتال
وصاغ للعباس تاج السَلطَنه
*****
گمر هاشم ما دخل سوح الحرب
مستخف عزمه ابجمِع گوم النُصُب
لچن هيّه اتمنت لحربه تِطُب
وشرف إلهه يصير تحقيق المُنه
****
گمر هاشم ما رضه ابمطلب اعداه
الليث بس الليث يتواجه وياه
ودخل حربه اويه الفريسه بلا رضاه
الموت من شافه على اجدامه انثِنه
*****
اتسلّط اعلى الگوم بتاره وطغه
وتشهد لعزمه ميادين الوغه
للحرايب دخل رافع بيرغه
فارس وسوح الحرايب موطنه
*****
غاضب ومن صولته الموت انبهر
ومن يمينه الغضب بركانه انفجر
وبيساره فِتَح بوّابة سَقر
وسقر زادت نار واديهه مِنه
*****
من جمر بركانه صارت تستِمد
صار الهه يسوق عدوانه وِرِد
ومالك بأمر الله واگف مستعد
لعد خدمة گمر هاشم عيّنه
****
اتقدّم وصار لگمر هاشم معين
يسوق لجهنم امن ايده الظالمين
وهو بنخوة زينب ونظرة حسين
ازداد عزمه وللفرات استوطنه
*****
وانحنه اعلى الماي نيته بكل ثبات
لعد خيمة زينب يجيب الفرات
اتمسّه بجدام الشرف والمكرمات
ولتراب اجدام زينب يحضَنه
*******
وهالأمر عن گمر هاشم مو بعيد
لچن يدري القدر من عنده اشيريد
ايريده بمزج بالنهر دمّ الوريد
أو على حسين مصاب گومه ايهوّنه
*****
مله الجود وبيه گصد درب الخيم
لچن گبله القدر سبّگ للحرم
او بدل مايه لزينب اسگاهه الألم
أولعد ظهر حسين بمصابه حِنه
*****
هوه وفوگ النهر أصبح مَصرَعه
وظل گمر هاشم بطل عل مشرعه
حامل العزه بچفوف امگطعه
وصار مستودع الجود ومسكنه
م
رد مع اقتباس
