يا علي قرص الشمس مگطوع نحره
يا علي مات النهار وضاع فجره
يا علي وقرص الشمس مگطوع نحره
وهذا ليل الفاجعة وعينك تنظره
خيَّم اعلى العايلة وزينب الحره
تنادي * بهاي الحيرة والمصيبة
تنادي * بديار المحن غريبة
تصرخ آه يكرار * وحشة وغربه واخطار
--------------
أمس چانت ليلة اوداع الغوالب
وبدت تتراوالي أشباح المصايب
صبّحوا كلهم جثث فوگ الترايب
ومن بعدهم دهري راواني العجايب
حياتي * چانت مزهره بضواهم
حياتي * لمّن ودّعوا سماهم
ظلت عگب الاقمار * وحشة وغربه واخطار
------------
احمرَّت عيون السمه بلحظه وبچت دم
وكربلة جوهه بسحاب الموت غيّم
ساعه لن الخيل غارت عل مخيم
ولنهه نيران الحقد بخيامي تلهَم
يبوية * ما بين العده انولينه
يبويه * ما ظلت خيم علينه
لا موطن ولا دار * وحشة وغربه واخطار
--------------
بويه لملمت البقه من ذاك خدري
وسلّمت للخالق المعبود أمري
كوّنت خيمة أمل كافلهه صبري
بيهه جمّعت اليتامه ودمعي يجري
كفيله * مكفولة وصرت كفيلة
كفيلة * بايتام الولي او عليلة
وبيهم گلبي محتار * وحشة وغربه واخطار
--------------
الليل بالهم والحزن خيّم عليّه
والگمر يم النهر مذبوح ضيّة
صرت أحرس عيلتي بهاي المسيّة
وحشه وعيون اليتامة تلوذ بيّه
رهيبة * محنة تهدّم الرواسي
رهيبة * طالت ليلة المآسي
ويّه جيوش الاشرار * وحشة وغربه واخطار
--------------
الليل دامس بيه تهب ريح المنايه
واخوتي فوگ الثره اگبالي ضحايه
فجر باچر للحزن يكتب روايه
يا علي اويه اعداك من نمشي سبايه
يساره * نمشي بولية الأعادي
يساره * نگطع للهضم بوادي
بهذا الدرب أسرار * وحشة وغربه واخطار
عقيل الكاظمي
رد مع اقتباس
