وين هاي الليلة زينب بايته ؟
هذا درب الشام منهو الگاطعه
غيرج ونفس الدرب هم راجعه
انتي بنت اليدري درب السابعة
ليش ضعتي بكربله ويل ضايعة
انتي مو گالوا عليها العارفَة
ما عرفتي حسين ليش وخايفَة ؟
شگلتي حته جروحه صارت نازفه
وصرتي بحلوگ الاجانب سالفَة
*
وين هاي الليلة زينب بايته ؟
سوگ؟ هيمة ؟ وعالم اشگد فايته
وين ذاك الجان عند احجايته ؟
ترف فوگج راية بس مو رايته
غالية دموعج بعد مو غاليه
بكثر ما صارت على الخد جارية
جنج اتگولين ألمن باقية ؟؟
وراحو اعزاز الگلب والحاميه
بهيده ونتج لو غدت مسموعة ؟
ومنهو الجفنج ينشف ادموعه ؟
ملوّعة بأيتام فوگ اللوعة
عفتي اخوج بصدره ماكو اضلوعه
لو تفز طفله وأبوها اتريده
فزت و ما دگ عليها ابيده !!
وخاف تگعد وحدة وانتي وحيدة؟
ويسكت اشلون اليفز بالبيدة ؟؟
*
ابنية حسين العزيزة اشلونها
نايمة لو تنحب امن امتونها ؟؟
ولو تون سكتيها .. لا يلفونها
الذبحوا اليرضع ترى ايموتونها
****
گبل طبت الشام بالهم غارگة
بيش خيطتي العبي لمحرگة ؟؟
امبينه المسبيه تمشي مدنگة
وروس اخوتج عالرماح معلگة
قاسم المالكي
رد مع اقتباس
