تقبلها يضربني الشمر
يالطايح عله المشرعه ماتدري بيه
عنك خـذوني ياگمـر هاشم سبيّــه
انت الجبتني من الوطن وتكفّلتني
محتـاره اظل بغـربتي ما عـوّدتنـي
ما تدري سلبوني العده لمن عفتني
عايفني وحدي بغربتي بين آل اميّه
ناديتك بحبل السبي من چتّفـوني
يابالفضل تقبل سبي عنك خذوني
آنه العقيله ام الخدر بس مارعوني
تقبلها يضربني الشمر بالغـاضريـــه
اني وخـواتي ياگمـر هاشم سبونه
ياخويه بسياط وزجر عگبك ولونه
سلبوا خـدرنه بلا خـدر لمن خذونه
رتك تجينـي ياشبل حـامي الحميـه
عالمشرعه مرّ الظعن شفتك يعباس
بس الجسد صاير وذر بسيوف الارجاس
ياريتنـي يمـك اظل تتركنـي هالناس
يابالفضل ما فـارگـك صبح ومسيّـــه
ودعتـك الله ياگمـر هاشـم كفيلي
عنك خذوني والشمر اصبح دليلي
يضربني خويه لو سمع ونّي وعويلي
نايم يخويه وزينب تشوف الأذيّـــه
تقبل يبوالغيره الگمر ادخل دواوين
لخيالي ماواحد نظر تنظرلي كل عين
وين الوعد يابالفضل ياكافلي وين
مچتوفه ياوسفه واطب ديوان اميّه
سيد زيد الفحام
رد مع اقتباس
