هنا

[مرتضى الطيب]

انا بن البخت والسلف والديوان
وانه بن المضيف الماطفت نارة
انا بن العگال الما ركس وانهان
دنياعگال ابوي تلوذ بكتاره
انه ولايتي تسوالها ولايات
مدفون بحضنها ايمام* بيه شاره
انه اسمر صدگ بس گلبي طيب ذات
شطيب من گلب راضعته العمارة؟
وين اللي عبرعالذلة وكت الضيج ؟
وين اللي نصب عالموت معباره ؟
انه الهجام مني ، وتعرف الهجام ؟
غضبان* اللعب عالروس مگواره
طفلنه عله الهله يتعلم من يصير
عزوبيه يتعلم باول صياره
خاطر لو كبر وبابه يلفي الضيف
فوگ فراش گلبه ينام خطاره

وبعد عدنه المواقف صايرات هواي
اسولفلك عليمن ياهو تختاره؟
على الجاره احترگ وبروحه طفى البيت
لو عالسلم ابنه وضم ابن جاره ؟
ابن ولايتي صندوگ مال اسرار
اذا روحه اطلعت ماتطلع اسراره
عدنه اللو خزرها تگوم ترجف خوف
ماكو البيد مرته مسلم صراره
البذاك الطرف لو عزا بداره يصير
البهذا الطرف ينصب عزا بداره
نعم شيابنا لو كبرو يحنبون
السيوف انحنت بس هيه بتاره
بوجوه النثايا انفتح باب العوز
بس ثوب الشرف مافتحن زراره
انه الجاراتي من عايلتي محسوبات
وخويه تصيحني من تنتخي الجاره
امدجفي بكرم كلما يمرني العوز
شنهي العوز اطخله ويعلى مقداره
علمت الجرح صبرالبدو عله الثار
ماريد الجرح يستعجل بثاره
الينكر واقعه بذله ومهانه يعيش
مثل الينكتل ويضيع فجاره
مثل الينكتل ويضيع فجاره

[كبريائي قاهرهم]

والنعم منك اخوية العزيز
عاشت ايدك على روعة ما تطرحه من مواضيع
رائعة كروعة شخصك الكريم
لا حرمنا القادم من جديدك العطر
مودتي وخالص احترامي

[مرتضى الطيب]

هذا من حسن ذوقك
اخي
يسعدني مرورك الجميل