كورونا تصيد ارواح ثم ارواح
أسرار الخليقة وكل شؤون الكون
مكنونة بخزاين ربك الأكرم
ما تختلط عنده ولا تضيع احوال
مُحكِمْ قدرته بكل ذرة هوه اعلم
شاءت حكمته يبث بالارض قانون
كل مخلوق يمشي بطاعته ومُلزَم
ولأن ربك غيور ومايريد انتيه
عن دربه ونتركه ، بغيره بس نهتم
يرمينه ابلاء وأوبئه واسقام
حتى نعود اله ونتضرع ونسلم
وبهالمرحلة نواجه خطر معلوم
واحنه مو كفاية بهالشأن نفهم
مستقوين صحتنه ونعيش بخير
منبالي بخطر عالناس يتهجّم
ارسل انبياء توعي هاي الناس
والهم اوصياء بخيره تتكلّم
تنصحنه وتحذر لو غفلنه بيوم
لان ميفيدنه بوكت الخطر نندم
لحد هاليوم نواب الائمة تسير
على نهج الهداية وبيه تتنعم
هذي المرجعية تسخر الطاقات
بالارشاد كل عالم اجا تقدم
ماج العالم بأخطر وباء وصاح
يارب العرش مسنا الخطر الاعظم
كورونا تصيد ارواح ثم ارواح
داهمنا مرضها ومنه ما نسلم
هنا دور المراجع صار واضح زين
خل نسمع نصحهم بيه نتأقلم
كالوا يا بشر هذا المرض فتاك
والعدوى اللي بيه تسير مثل السم
احرص عالنفس لا تاذي الاخوان
تجنب الاختلاط ومشكلة أعظم
ارفع جف دعاء توسل الرحمن
بالمصطفى واله الهادي الاكرم
الزم حبل ربك بيه نجاتك دوم
بيتك بيه امانك وإن كان اظلم
ساعد اخوتك ادي الحقوق اعليك
مثل متريد ربك يرحمك ارحم
وادعي لليعالج ناس مصيوبين
حتى تعدي هالاخطار واتفهم
بهيج احنه نعود ونرضي رب الكون
حتى بظل رحمته العمر يتقدم
ناظم الفضلي
رد مع اقتباس