الوداع ياسيد الشهداء
.......
منذور العمر لحسين أبو الثوّار
وَأمشي إبمنهج السبعين ثوّاره
دَم الماتشيله الغيره لجل حسين
من شريانه گصّه وگوم طُم عاره
أنه راضع محبته مو لِبن نسوّان
وإبدَمّي إنزرع يوم الصرت ثاره
من عُمْر الطفوله أزحف الباب البيت
وَچَلِّب بالمشو لو صارت زياره
تره حسين القيامه والقيامه حسين
وربَّك لجله قَسّم جَنّته وناره
رَب الكون صاغه إوكَوّنه وسوّاه
وإسمه امن الكنوز الخاصه إختاره
جَدَه المصطفى والوالده الزهراء
وأبوه الضَل علامَة نَصُر فَقّاره
مَريم تِشِد مَهده إو آسيا إتلوليه
وِله صَلّن نَوافِل هاجَر وساره
ويجي واحِد يِگِلّي لاتزور حسين
إوضِنْته السيف يلبس عار زنجاره
ويجي واحِد يگِلَي عاللطم ممنوع
وَنه إمهَدَّل وزيجي إمگطِّع إزراره
كَف دِشداشته ويحچيلي بالقرآن
ويعوف الجِبَل ويلوذ بحجاره
عابَت هاللحايه الماتحب حسين
وخُفَت هاي الحُثاله المالهُم چاره
يامغرور أنصحك لاتضل مغرور
لَتضن للموالي إتغيّر أفكاره
لاتاكِل خُبز كلمن يگِلك هاك
مو كِل العجين بغير سِنّاره
تابوت الخِشَب مايرحم النَجّار
بَس يفرَغله ساعه إيشيل نَجّاره
....
ناظم الحاشي
رد مع اقتباس
المشاركة الأصلية كتبت بواسطة Haidar Iraq
