اتفق وياك عزيزي
الدين صاير عدنا مخدر وشماعه نعلق عليها عدم قدرتنا على مواكبة ركب التطور
من السنه والشيعه ماكو ولا بشر عايش ع الكره الارضيه يمثل الدين الاسلامي بحذافيره للحد اللي يخلينه نبوس تراب رجليه
صرنا بس نشوف شخص لابس عمامه نركض وراه وخلاص هو هذا قائدي ومولاي وكلشي
صح كان اكو قبل كم سنه ناس يصلح ان يكونون مثل اعلى مثل الوائلي على الصعيد الشيعي والشعراوي على الصعيد السني هذول ناس صح ممكن نعتبر انو همه تاج راس وممكن نتبعهم لو كالولنا روحو للمذبحه
اما بالعصر الحالي فبالجانب السني ماكو شخص يذكر اما بالجانب الشيعي اكو السستاني فقط لكن ايضا مو مثل السابقين واللي نزل من مكانته عند البعض هو عدم تدخله الصريح بالاحداث اللي جاي تصير بالوقت الحالي لان شخص مؤثر مثله لازم تكون اله كلمه بكلشي ووكفه بكلشي
وبالمختصر احنه ننظر القشور وليس للجوهر
نلطم ع الحسين عليه السلام وما نتبع اخلاقه ولا نتصرف مثله
ما نقبل احد يحجي ع الصحابه واحنه ما نعرف اصلا ابو بكر شنو اسمه الحقيقي
نكول مو مشكله خلي الغرب يتطورون ويعيشون خوش عيشه احنه النا الاخره همه ما الهم شي بالجنه
يا حبيبي منو كللك احنه بتصرفاتنا الهمجيه هاي ضامنين الجنة؟ الشخص اللي يسب اخوه المسلم ويشتمه ويكله انت بالنار والله ما راضي عنك لو الشخص اللي يخترع ادوية ويصنع اجهزة تسهل الحياة للناس, ياهو منهم يستحق الجنة اكثر؟؟؟
لازم نكسر القشور وندخل للجوهر, نتثقف دينياً نعرف منو ال البيت وتاريخهم, منو الصحابه وشنو انجازاتهم, نعرف تاريخ حياة نبينا ونقتدي بأخلاقه بالكلام الطيب وبالرحمه وبتقبل اختلاف وجهات النظر وبالبر بأهلنا وبالسعي للعلم وبكلشي
احنه ناسين بأنه واجبنا بالأرض انه نعمرها, احنه خلفاء الله بهاي الكاع (اذ قال ربك للملائكة اني جاعل في الأرض خليفة قالوا أتجعل فيها من يفسد فيها ويسفك الدماء) يا جماعة الخير احنه نسينا الشطر الاول من الاية ومشينا بس ع الشطر الثاني وضلينا نسفك الدماء ونقتل بعضنا بالسيف وبالكلام وعفنا وظيفتنا الاساسية اللي الله خلقنا لأجلها
المشاركة الأصلية كتبت بواسطة سارا~
