المرفوع ابرمح قران لو راسك
ما أبالغ لو گلت...شوفتك چنهه الصبح
اشهل معاني ابصورتك...بيهه صدري ينشرح
يابعد روحي صحت...حين شفتك عالرمح
ياترف كون الترف...ينحظن ما ينذبح
يا أزغر جرح بس جرحك اشكبره
يالتشبه براءة محسن الزهره
ذنبك شنهي مچتول...جاوبني يمدلول
المرفوع ابرمح قرآن لو راسك
اعيوني ياريت انعمت...گبل ماجي النينوه
ولاشفت راس ابرمح...بي يمر حار الهوه
ذَبَّل اشفافه العطش...ونحره من دَمَّه ارتوه
ونار فگدك يالولد...بيهه دلالي انچوه
أشكي ولمَّن ارفع وجهي للعالي
بدموعي أصد الراسك الغالي
واصيحن انت معقول؟؟...جاوبني يمدلول
المرفوع ابرمح قران لو راسك
أمشي واثگيل الحِمِل...واعثر ابِيُمَّه الولد
ياحلم واتخيلك...نايم ابنص المهد
أسرح ابصفنه ودمع...وحلمي يرسملي بعد
أحله چلمه ابخاطري...يالرباب ابنچ گعد
ارجع والگه حلمي اتفرهد امن ايدي
واضل ابحسره اصيحن آه يوليدي
حزني ابفگدك ايطول...جاوبني يمدلول
المرفوع ابرمح قران لو راسك
بالسبي ودرب اليسر...بيك فكري منشغل
بس احضننك ردت...فرگتك ما تنحمل
ابگلبي ضلت حسرتي...وابچي وادموعي تهل
انت راسك عالرمح...وآنه بچفوفي الحبل
ملهوفه ارد احظنك يبني ملهوفه
عيني اشما تصد الراسك اتشوفه
أحس ابگلبي مشيول...جاوبني يمدلول
المرفوع ابرمح قران لو راسك
هاك اخذ عهد الگلب...وآنه بدروب اليسر
حسرتي ودمعي اليهل...ايضلن الطول العمر
جرحك وطاري الفگد...خذن من عندي اشكثر
يُمَّه بالنسبه إلي...الموت أشوَه امن الهجر
تجرح ذكرياتي چلمة اسم الله
أموت ولا أعيش ابلايه عبدالله
جبال اهمومي متزول...جاوبني يمدلول
المرفوع ابرمح قران لو راسك
سيد علي الموسوي
رد مع اقتباس