مساء الخير دررنا
في الحلقة السابقة ذكرت ان موضوع خلف الكواليس راح ينتهي ..حقيقة اجتني رسائل من الاعضاء يطالبون بالاستمرار لهذا مكدرت اتجاهل طلبهم
الموضوع مستمر لكن نشاطة ماراح يكون مثل قبل تبقى على حسب ان وجد ضيف حتى لو بالاسبوع حلقة واحده..نترككم مع الضيف
ماهو رأيك الصريح بالمنتدى
المنتدى .اموره ماشية عدل . انه متميز فيه فرع للعراق اولا
والسياسي والنقاش الجاد وهذا الشيء يميزه عن باقي المنتديات
لكن العيب فيه مسؤول واحد بيده الة الحجب وهذة تعتبر دكتاتورية
اوسلطوية غير مشجعه .لان الواحد عنده مزاج ومشاكل .
وعنده يحصل تعاطف ومن هذا الجانب يكون ركيك اشوية
بمعنى اذا كان مسؤول يأخذ الاجراء لحاله يزرع الخوف لبعضهم اثناء التعبير
وبالتالي يصبح النقاش شفافي بلا اكشن ولامتعه .(يعني يراد منك ان تتكلم مثل الكيكي )
وهي الحالة ماتصير بدواويننا .ولان المنتدى عراقي فلازم يكون يشبهنا
اما بجوانبه الاخرى ماشفت منتدى احسن منه .حتى تعلمت منه طبخ بينما
قبل ان ادخل له (جنت اعجب عايب) والان صرت ازلمه والحمد لله وشكرا منتدانا
2:رأيك بعشر اعضاء
غريبة روح .الاصل والاصول والحسجة والتراث ولكن لحد الان لم يعرفها الجميع انها موروث بأيقونه جديدة
زاهد .اياك واثارة زاهد فانه يكظم ولايتحمل وانفجاره معلومة كانت مخفية عن مقابيله وهذا الشيء احسده عليه
الرميثي . صديق وقت الضيق .يتفرج ويتفرس ويفكر ثم يدخل الموضوع بكل ثقة ..هاي الدرر لوبلاش
راهب . لويكرمنا ويترك البخل ويبوح بكل لحظة بما يخطر على باله لصار موسيقة المنتدى وندمن عليه . بس الخجل والتردد ويمكن (احنه بنظره مانستاهل .)
حلاوة .خجولة تتمنى ان تشترك بكل موضوع وتتمنى كل يوم ان تطرح موضوع ولكن عدّى الوقت وتعتقد فات الاوان بالابداع .ارجعي الى اخوانك ومن حل وجديد .خل الناس اتشوف ابداعك
بشير .وماادراك مابشير .انه قلب والدة وعندها ولد اثنين واحد يصلّي وواحد يشرب عرك . الى اين الحنان ينسكبوا .
سمير .كله فراسة .يعني يقرأ الممحي سمير ثقافة عراقية شعبية اصيلة ولو كرس جهده لعرض المواضيع لاشبعنا بما هو جميل ورائع
فرنكشتاين .رومانسي عقلاني متزن ممكن افسره يلزم العصا باليسرة والكتاب باليمنه .بمعنى واعظ اوخارق الافئده بالحب والحنان .
خلصوا وانا عندي بعد عن سكراب وقاص الاثر وحيدر عراق وفقار ومحمد العجيب بالرد والمواضيع
يالله اعذرونا غيرنا يذكركم بالخير ان شاءالله
3:انصح عشر اعضاء
الاستاذ سيف . استاذنا نحن نحتاجك هذة الايام فنزل مواضيع من قلمك ولايهمك تراهتانا عندما نخالفك .
سكراب انقد اي موضوع ولايهمك لاتستحي نوبات اشوف نقدك لاذع ومفيد
حيدر عراق .لاتطول علينا كل اسبوع اردفنا موضوع ترفيهي ترى ظلينا بس ترفيهي .؟
ضياء .وين ايامك وين ابداعاتك ارجو ان لاتأفل ورودك ويعدّي الوكت وماتنفع ويلاه .
العراب .اراك قوي الشخصية فلماذا لاتهزنا بتلك بمواضيع خارقة لقوانين الرتابة
رجل كل العصور . انزل الى مستوانه واكتب عن حمده وحمد وعن حرمانهم من بعض ..يعني مواقف للخسرانين .بالحب والسياسة
بعد ياهو .
اها فقار .عوينت ابو اصلي نسيت الحمد . وين مشاكساتك النافعة انت مثل الفلاح تنش الطير وتحصل على حسنة
ترى طولت والمنتدى محتاج مثل طلعاتك الروحية بطعم الفراولة .
محمد . شقي المنتدى شوساكت هاي الايام وينه الجديد ترى احنه بذاتين وبسرعة ننسى اللي مانشوفه .اردفنا بعركة مع فقار خلينه انشوف عركتكم الجديدة
4:سلبيات عشر. اعضاء
كلكم بيكم سلبيات وطبعا انا معكم .تخطر على بالنا مواضيع ونخاف من الحذف ومانزلها لان ماندري نظل نوروش مدري يرضى المشرف مدري لا وتروح بعالم النسيان (يعني هاي موسلبية)
5: اذكر 10 اعضاء. نشيطين
الصراحة النشاط حدث ولاحرج ولكن بأي مقياس بتنزيل المواضيع ام بالحضور ام بالحذف لو بالردود .
انا الصراحة اشوف اكثر واحد نشط الاستاذ نور حسبالك مشتري المنتدى على حسابه ربي يحفظه
هواي اشياء استفدتها من خلال مواضيعة مشكور
6:كلمه موجه لـ 10 اعضاء
هاي العشرة لزكتلي .يمكن راح اكل المرتي لوزوجتي احسن .؟ اسلكيلي عشر بيضات ابعشر طاوات لاشتمج عشر شتمات
الكلمة الى كل عضو في هذا المنتدى المشرف .
اخوان .بما ان اهلنا سبقونا بشي اسمه المضيف .والمضيف يجمع العشيرة في كل ليلة .وبعض الاحيان يزورهم ضيف من عشيرة اخرى
والمضيف يتعلم منه الواحد كيف يتكلم وكيف يرد ومتى ينفعل ومتى يخطأ ومتى يعتذر ومتى يخاف ومتى يتقدم بثبات كلها معلومات تلقائية من المضيف .
فنحن اولاد اليوم .مضيفنا بلا سقف وبلا شاي ولاقهوة ولا دخان ولانار .
فدعونا نتعامل بالمثل مع اجدادنا والفرق بيننا هو الافتراض بأسمائنا واشخاصنا .وماعلينا الا ان نتوجع لما يشكو الوجع ونفرح لما تصيبه حظوة فرح .
ودعونا نعيش هنا بسلام ونفترق بسلام . فالدنيا صغيرة وايامها سريعة وأخطارها اكثر من سلامتها .
كما قال احدهم .ليس بالمنية عجبا وانما بالسلامة اعجب الاعجاب .
فيااحبتي عندما تدخلوا المنتدى تذكروا ان لكم فيه احبه (ولربما شوية خصوم)لايهم فشيخنا كان له شيخ القرية المجاورة لنا خصم ولكنهم يجلسوا بنفس المضيف .
فتعلموا ان تقتنعوا بدخولكم وتخرجوا وانتم على رضا تام لومهما خلفتوا من ورائكم بعثرة ممكن الاكبر منا درجة يتداركها وتعيد الامور الى ماكانت عليه .
الحرص على المنتدى هو القناعة والجدية فيه
7:عضو تحبه
. والله كلهم احبهم غربية روح سمير بشير. فقار وحيدر احبهم قبل لاادخل المنتدى من كنت زائر قزومه هاي الوردة
سكراب المسكرب فنكشتاين زاهد الرميثي قاص الاثر اسرار الورد الصراحة رماد العظيم محمد صبيح الشاعر الملتهي عنا ماكرهت واحد ابدا حتى اذا اخاصمته مثلا
ماتعلمت على الحقد لكن تعلمت على الخصومة والمشاكسات بس بلا حقد .
8:عضو تفهمه.
سمير وزاهد والرميثي وغريبة روح
9:عضو يفهمك
غريبة روح وسمير
10:عضو صريح .
استاذ سيف تعجبني عصبيته وصراحته
11:عضو يعجبك اسلوبه العراب ورجل كل العصور
12:عضو قريب الك.
بشير بس مايدري
13:عضو تگوله نظر عيني
هاي ماذكر كلت الواحد حتى لزوجتي ماكايلها جديدة عليه هههههههههه
ماعرف اكول مثلها .
14;عضو حزين
اكيد الحزين اللي يكتب عن الحب ويرد ليورى .(للوراء) .
تلكينه متزوج ويباوع للتلفزيون ايشوف شيء اخر فيصير حزين ويسوّي روحه رومانسي
بينما هو مستلك ابليسه .من حياته اليومية
فشوفي ياهو اليركض ورى الحب من على سطور الشعر هو الحزين .
15:عضو مرح
سكراب .انا اعتقد اكبر شخصية مرحه هو الاخ سكراب بس للاسف التقينه وافترقنا وماشفنا جديدة الرايق
وادلكم على واحد اخر فاستغلوه .العراب . بس شاكسوه تجدون افضل مايقال من كلمات المرح عليهم لاتنطونهم مجال يااهل المرح
16:عضو تكله ارتاح من اشوفك
سمير
17:عضو تبحث عنه اول ماتدخل المنتدى
ثلاثة طبعا .
سمير وبشير وغريبة روح
18:مساحه مفتوحه اكتب مايحلو لك
بني ادم اللي هم نحن .لانكل ولانمل من الطمع والرغبة بالامتلاك ولهذا انزل الله الانبياء ليهذب فينا
الة الصبر والكبيرياء والا .ماكو منتدى وكلنا الان نركض وراء الاشياء حتى لوغير نافعة
ـــــــــــــــــ
اسمعوا هاي السالفة .
انا مطلق احد الزيجات . لايهم ليش ولماذا المهم مطلق والسلام (بس لاتطلع هي مطلقتني)
في يوم امشي بالشارع انا وزوجتي .رايحين مشوار .
وبالصدفة لاكتنا زوجتي المطلقة . الصراحة شفتها حلوة وتخبل نزيت .ونسيت نفسي وابتسمت ابوجها .هي هم كيفت .وردت الابتسامة
منعولة الوالدين لما طلكتها كانت موبهذا الجمال . المهم .
زوجتي حيل اتضايقة المسكينة .الحمد لله عمكم شوية مسيطر .ها شوية موهواي .
ولو مامسيطر كان صارة مصيبة بس سيطرتي شوية ظلمة زوجتي .اشلون .
لما شفت زوجتي المطلقة وبيدها طفل صغير يمكن ابتها اكيد .جا شنو ابن الجيران يعني .
لما شفتها نسيت روحي .ابتسمت ابوجها .وصحت عليها هولج انت فاتن .كالت اي شنو تريد .خطية زوجتي كسرة خاطري
فانتبهت .لاني هم غبي .خو موكلش عندي التمام والكمال ابعقلي .ولو كنت موغبي كان ماهضمت زوجتي حبيبتي .
لما انتبهت اعتذرت منها وقلت لها لا ماكو شيء خو مامحتاجه شيء .طبعا غيرت وصرت ازلمه سبع كالت لا الله وياج .
الزبدة من الموضوع . اولا اشتغلت الانانية والسخف من حضرتي لاني تمنيت ارجعها من شفتها صارخة الجمال .وهذا يعتبر ضعف بالنفس .يعني بدي اتملك النسوان اثنينهم في ان واحد .
ثانيا .
انطي ملاحظة لكل زوجه مطلقة طبعا على غرار ماحدث لي .وماادري بشخصيات الرجال الاخرى .
على كل مطلقة تمر على الموضوع .لاتيأسي اوتذبلي وابقي دائما مواضبه على ترتيب حالك فلوفلت الزمان وصنع صدفة وقابلة طليقك
سوف تحصلين على اعتزاز بنفسك وافتخار وكبرياء (بس طبعا ذني مايشتغلن وياي) حتى لواكذب صدكوا وماعليكم .
الصراحة اشتغلو وشوية بعد ويطيح حظي
لمن تهدي
جوريه حمراء.
سمير
حنظلة صفراء. للي ابالي والمعنى بقلب الشاعر
جوريه ورديه.
غريبة روح
بالنهاية كلمة للجميع
هاي الكلمة منين طلعتلي عبالي خلصت
احبكم والشاهد الله .احبكم جميعا اللي ذكرته واللي ماذكرته
احبكم على كل شاكلتكم وعلى كل اطيافكم وادعو الله واتمنى للجميع الصحة والامان
وهن النعمتان المجهولتان
يارب الصحة والامان للجميع
وبس .منو المشكور انتم لاانا اللي طحت صفح من الكتابة .
المشرفين يحكموا بهاي الشكرا حتى ايكولها اللي يرسي عليه الحق
تحياتي للجميع
رد مع اقتباس
كلكم كبار ما اكدر اكول اصغر واحد...المهم العركة وية الكل واولهم العراب وسوزان.
المشاركة الأصلية كتبت بواسطة كريمے بنزيمے
،!
، وماكو أڪشن ليش ؟! 
