حزنك يضامي گربت أيامه
حزنك يضامي گربت أيامه
خاف ابمحرم ماكو لطامه
يا ابا عبد الله. يا ابا عبد الله
____________________________
انحلفك ابكسرت گفاك ودمع الأيتام
الضلوا ابليل اهدعش ما عدهم خيام
ترجع الخدمه مثل عاشورك العام
فشله من امك تجي وما تلگه خدام
ويحضر محمد شايل الرايه
ويصيح وين العدهم اقرايه
يا ابا عبد الله يا أبا عبدالله
___________________________
من نضل أبلا محرم ينكضي الحيل
والمدامع مو مدامع تنكلب خيل
اتدوس فوك صدورنه لو جلجل الليل
وعلى هذا الحال تشهد نجمة اسهيل
يل تارس عيون الخدم طيبه
والدمعه بمصابك صفت هيبه
يا ابا عبد الله يا أبا عبدالله
___________________________
برحمة الله ورحمتك ماعدنه معتاز
يامن الحبك نجه ويوم الحشر فاز
الدنيه ما خلت اخو لا ضلت اعزاز
الموت گام أيروح بينه أبلايه جناز
نقره الزياره ابدمعه سجابه
حگ الحبيب ايعاتب احبابه
يا ابا عبد الله يا أبا عبدالله
____________________________
حسين يالحبك صفه اغله من الانفاس
ابداعت الما هبطت بين الزلم راس
نقسم أعله الله ابغربتك يرحم الناس
يالطحت فوگ النهر تبجي أعله عباس
وتگله بعدك حيرتي. حيره
ياهو اليكض ضهري يبوالغيره
يا ابا عبد الله. يا ابا عبد الله
___________________________
احنه كل يوم اليمرنه ادگول عاشور
بينه شوگ الكربله ما شالته صدور
الك واحدنه ابحياته دوم منذور
ليش من ابعيد صرنه الگبرك نزور
كلشي ابمحبتك لايگ اعلينه
لمنه ابعباتك يا ابو اسكينه
يا ابا عبد الله يا أبا عبدالله
__________________________
الله من نورك خلق جنه يمذبوح
واسمك المكتوب عنده تارس اللوح
وأحنه خالقنه بعزائك نبجي ونوح
يالعشت بالطف مآسي وكل الجروح
ضامي وتجر بالگوه ابنفاسك
وذباحك برمحه رفع راسك
يا ابا عبد الله يا أبا عبدالله
__________________________
الشاعر صالح باشه الغرابي
رد مع اقتباس
