قصة ورباط ///
اكو واحد يگول :
چنت يم الحلاق ، حتى أزين راسي ولحيتي ، وأجه واحد مخبل لابس دشداشة گصيرة وكفشته شكبرها ويمشي ويصيح
خمسة .. خمسة!!..
الأخ الحلاق طرده بالگوة وظل الزلمة يصيح خمسة .. خمسة
آني خفت گلت ذوله الأوادم نوبات يشوفون أشياء إحنه ما أنشوفها ، يجوز أكو قنبلة وراح تنفجر بعد خمس دقايق كلشي يصير ..
واحد گاعد بمحل الحلاق گاللي :
خطية هذا تخبل على ولده الخمسة استشهدوا وهسه يمشي ويتذكرهم ويصيح خمسة!!..
آني ضجت عليه وگلت يعينه الله ومن طلعت ومريت على أبو المخضر هم لگيت المخبل گدامي ويصيح خمسة .. خمسة سمعت أبو المخضر يحاچي صاحبه يگله :
تشوف هذا المخبل هذا كتل خمس زلم وتخبل وهالتشوفه يمشي ويصيح خمسة !!..
شوية وأجت مره چبيرة تلگط بتيته وتباوع للمخبل وگالت بصوت ناصي :
هاي تالية الياخذ خمس نسوان خبلنه وطيحن حظه وخلنه يذرع شوارع!!..
مشيت لأبو الطرشي چان يباوع للمخبل وسمعته يگول
حگه يتخبل إنسجن خمس سنوات على سالفة هو بريء منها ..
آني دخت من هالشعب ، إليرهم سالفة لكل شي المهم.. رحت لأبو الغذائية أشتري عدس.. لأن ماوصلني عدس الوطن
إجتني بنت شابة گالتلي :
شلونك عموو !!
گلتلها هلا بيج عمي منين تعرفيني ؟!
گالتلي آني بنت حجي حسين بنفس شارعكم شفتك من بعيد عبالي غير واحد بس من شفتك تشتري عدس گلت أسلم عليك؟!!!..
وشوية ومر نفس المخبل هي شافته وگالت شوف عمي هايه شلون دنيا غبرة هذا بنته عمرها خمس سنوات خطية وأنخطفت وكتلوها وتالي هذا حاله!!
وبعدين گبل لا أطلع من أبو الغذائية صار گبالي هذا المخبل آني مديت إيدي بجيبي وطلعت ألف دينار گلت خل أنطيه صدقة عني وعن والدي وعن والد والدي وآني وبلا فخر ما تمر سنة إذا ما أتصدقلي بألف نوبات حتى ألف وربع
المهم ..
أنطيت الألف للزلمة المخبل ومشيت وسمعته يصيح عليه
أبو الشباااااب !!!..
گلت بگلبي يمكن رد عگله الزلمة من الألف مالتي وهسه صاحني ويترحم على أبوي
وگفتله وإجاني وگالي :
نعله على والديك ما تشوفني أصيح خمسة .. خمسة تنطيني ألف شسوي بيه ؟
وفوگ هاي المسبه من المخبل
من رجعت للبيت وسولفت كل شي لزوجتي عافت كل القصه وچلبت بالبنيه الحلوه:
إي وهاي بنت حجي حسين متزوجة لو لا ؟
رباط سالفتنة :
هذا الشعب خبلني مع احترامي للناس الطيبة منا ليجاي خمسين حچاية مختلفة رهمنا على هالمگرود إحنه شوكت نصفى على كلمة وحدة ولشوكت نظل نردح للي يسوه والما يسوه؟
مكانكم خالي والوطن غالي... ( منقول )
رد مع اقتباس
