امرأة العقرب الغامضة المحيرة.. وبما إن ديه شخصيتها يبقي اكيد موضوع اختيار هدية ليها هيبقي موضوع صعب ومرهق.. احنا زي ما اتكلمنا عن صفات الانثى الجذابة ديه النهرده هنعرفكم ايه احلي هدايا انثى العقرب للي ممكن تمشي مع شخصيتها..
1- المجوهرات والاكسسوارات:
المجوهرات الفريدة من نوعها, أو الإكسسوارات اللي ليها ديزجن مميز ديه ممكن تكون من افضل الهدايا لانثى العقرب, سواء سلسلة, خاتم, حلق, أو حتي اكسسوارات الشعر, أو اكسسوارات ال body chain اللي طلعة موضة جدا اليومين دول, هي مش بتهتم بالقيمة زي امرأة الثور, ولا بتهتم بالفخامة زي امرأة الأسد, لأ هي مختلفة وتحب أنواع المجوهرات اللي لازم تلفت النظر وتخلي كل اللي حواليها يسألها إنتي جايبه ديه منين؟!
2- الكتب:
لانها غامضة ومحيرة هنلاقيها بتحب قوي القراية ومطالعة الروايات في أوقات الفراغ. وبالذات الحاجات اللي فيها خيال عالي وممكن كمان لمسة رومانسية, كمان إنك تجيبلها مجموعة DVDs من الافلام اللي بتحبها أو المسلسلات اللي بتحبها هيبقي هدية مميزة جدا عندها.
الكتب
3- العطور:
عاطفية هي الكلمة الأساسية لما نيجي نوصفها, وممكن تعجبها قوي الهدايا الناعمة زي البرفانات والعطور المميزة. اهم حاجة إنك تختار برفان يكون لايق علي شخصيتها.. يعني مختلف, ناعم, قوي , جريء وملفت.
العطور
4- الملابس الفخمة:
جزمة أو حزام جلد طبيعي, فستان أو شنطة مميزة, هي بتهتم قوي بمظهرها وزي ماقلنا قبل كده هي ملهاش ستيل لبس معين بس بتحب تمشي علي الموضة وتتابع كل جديد.. كمان لو زوجتك عقرب, يبقي لازم تفكر في أي محل تدخله تفكر إنك تعدي علي قسم الملابس الداخلية الفاخرة….
الملابس الفخمة
5- رحلة سفر أو خروجة عشا رومانسية:
لو تقدر ترتب سفرية في ميعاد عيد ميلادها وتعملهالها مفجأة ديه هتخلي سعادتها متتوصفش.. و لو مش هتقدر يبقي علي الاقل عشا رومانسي في مكان مميز, هي هتقدر ده قوي عشان هيبنلها اهتمامك وتعبك ومجهودك إنك تسعدها في اليوم ده.
خروجة عشا رومانسية
ملحوظة مهمة: تغليف الهدية حاجة مهمة جدا ليها وبتحسسها اد ايه أنت اخدت وقت واهتميت بهديتها.
أهم حاجة بقي غير كل الهدايا ديه, وفعلا أحسن هدية لأمرأة العقرب هي التقدير…إنك تحسسها قد ايه هي مهمة في حياتك وإنك فعلا تعبرلها عن ده بأفعالك مش بس بمجرد كلام.. نتمني نكون افدناكم وقدرنا نوضح ايه هي اهم هدايا انثى العقرب اللي ممكن تسعدها.
رد مع اقتباس
