الرجل القوي … جاد وحازم، الدنيا عنده يا أبيض يا اسود مفيش رمادي، مستقل، جريء ومش بيخاف من أي حاجة ولا أي حد، طموح ولو اتحط في أي منافسة أو رهان هو دايما اللي بيفوز لانه مش بيقدر يقبل بغير كده … عنيد ومثابر وواسع الحيلة, صاحب عزيمة واصرار لغاية ما يوصل للي هو عايزه، مش سهل الاستخفاف بيه ابدا لأنه مش سهل وردود فعله قوية وغير متوقعة … هو رجل برج العقرب.
فضولي ويحب يتعلم عن تجربة كل حاجة بنفسه، عنده احساس عميق من الحدس بيساعده في كشف الحقيقة وعنده درجة ماجستير في إزاي يسأل الأسئلة المباشرة المخترقة اللي بيعرف ياخد بيها اجابات الآخرين بوضوح و برضه هيكون هو في النهاية استنتاجاته الخاصة. بيهتم بالمهم بس ومش بيضيع وقته في أي حاجة, مستقل وعنده سرعة بديهة، بيعرف إزاي يختار عشان كده هو اللي بيحدد مصيره بنفسه وبيعرف يسيطر على اي موقف ممكن يواجهه.
حنعرف في الموضوع ده تفاصيل اكتر عن مواصفات رجل برج العقرب من مواليد الفترة بين 23 أكتوبر – 21 نوفمبر
مواصفات رجل برج العقرب
رجل برج العقرب
1- الحبيب التقيل:
بالرغم من مظهره الراسي الواثق المتحكم في مشاعره الا ان رجل برج العقرب مليان مشاعر واحاسيس وممكن يكون سهران الليل ومش بينام بسبب الحب لكن مظهره عادي كأن مش في دماغه، بيفهم مشاعر غيره وبيقدرها وصريح مع نفسه ومدرك لمشاعره كويس بش مش سهل عليه اظهار الحب ده على العلن لانه مش بيحب يبان انه مش مسيطر على مشاعره.
2- بيحب بطريقته الخاصة جدا:
لما بيبقع رجل العقرب في الحب حبه بيبقي قوي مليان عاطفة وشغف,وبيبقي بالنسبه له حافز عشان يغير حياته كلها, بيبقى حبيب مخلص جدا ووفي وبيكرس وقته لشريكته, عيوبه انه غيور جدا على شريكته و كمان ساعات كتير بيبقى مسيطر وعنده السيطرة دي اكبر دليل على الحب والاهتمام، وبالرغم من جديته وتحفظه الا انه مع حبيبته بيبقى مثال للمشاعر المتدفقة والحب لأنه بيتخلى عن المظهر ده معاها هي وبس.
3- احترس من لدغة العقرب:
رجل العقرب بيتميز بحاجتين مهمين اوي اولهم انه بيخطط لقدام اوي وده بيخليه حتى لو خسر معركه او اخد هدنه مابينساش مشكلته وحيكمل لغاية ما يكسب الحرب وتاني حاجة انه مابينساش ابدا وخاصة الاخطاء والاساءة وبيفضل فاكرها ولازم يردها، من الاخر كده هو له نصيب من طبيعة علامة البرج بتاعة اللي هو العقرب يعني ما ينفعش الاستخفاف بقدراته والتقليل من شأنه ابدا عشان لدغته مش سهلة وبيبقي قوة لا يستهان بيها لما يغضب.
4- مش بيثق بسهولة:
بيعيش حياة سرية ومعقدة جدا في بعض الأوقات، صعب انه يطلع أسراره لأي حد ومش من النوع اللي بيعرف يكون علاقات بسرعة, في أي علاقة مع رجل العقرب لازم تاخد وقتها ولازم اللي قدامه يثبتله انه يستاهل صداقته أو “حبه” وانه شخص عنده ولاء. لو حد حاول يقرب منه بشكل مبالغ وسريع ده هيخليه يتصرف بطبيعة العقرب وهيتراجع لعرينه وهيقلق جدا من الشخص ده ومش هيكمل في العلاقة, رجل العقرب غير قابل للترويض وهو اللي لازم يكون ليه حق الاختيار في أي علاقة سواء حب أو صداقة.
5- جريء ومقدام:
الرجل العقرب علي عكس معظم الرجالة مش بيخاف تماما من انه يدخل في علاقات ويبقي ملتزم بيها. مش بيتجنب المناقشات أو المشاكل ومعندوش مشاكل انه يفضل يجادل ويدخل في تفاصيل كتير في مناقشته مع شريكته لانه بيبقي شايف إن ده أحسن من تجاهل المشاكل الصغيرة وده صفة جذابة جدا لمعظم البنات لأن الغالبية العظمة من الرجالة دلوقتي مش بيحبوا يخوضوا في المشاكل والجدال بالشكل ده وبيتنجبوه.
6- مدبر من غير بخل ولا تبذير:
رجل برج العقرب بيعرف يدبر الاموال كويس وبيعرف يصرف بحكمة على ايه وازاي بس مش بخيل او بيدخر الفلوس وخلاص، ولو اتحط في ظرف قهري ولازم يدفع مبالغ كبيرة مش بيتأخر، لا وفي بعض الاحيان بيكون مبذر وبيصرف في حاجات مالهاش لازمة بس دي حالات بسيطة، لكن في النهاية هو بيعرف يدبر فلوسه كويس جدا وبيعرف ازاي يدخر للمستقبل والايام الصعبة.
7- ما يحبش المعاملة بالمثل:
رجل العقرب في صفة بتميزه عن باقي الابراج وهي انه فضولي جدا، بيحب يطلع على حياة الناس اوي واحيانا كمان بيحب يعرف اسرارهم ومن خلالها بيكون وجهة نظر خاصة بيه ممكن تكون بعيدة عن الحقيقة بس هي بالنسبة له بتبقى الحقيقة الوحيدة اللي بيصدقها والغريب بقى ان هو بيفرض على نفسه وعلى حياته نوع من الحصار عشان محدش يطلع على اسراراه زي ما هو بيعمل، ونفس الحكاية في المعاملة بالرغم من انه ساعات بيكون متحفظ جدا في معاملته مع بعض الاشخاص لكن بيكره اوي لما الاشخاص دول يعاملوه بالمثل لأنه بيكره جدا التجاهل او الاستبعاد.
8- شيك وجذاب:
رجل العقرب يحب يلبس على الموضة ويبقى استايل، بيعرف يختار اللبس المناسب للمكان المناسب، واخد باله من مظهره وبيلبس اللي يليق عليه، يحب يدخل اللون الاحمر في الحاجات اللي تخصه مثلا زي عربيته او حتى الكرافتة بس عشان هو بيلاقي للاحمر جاذبية خاصة، بيحب يهتم باكسسوارات اللبس زي الساعة او الحزام بس بحكمة من غير مبالغة او اسراف.
9- النجاح في الشغل ايا كان هو:
رجل العقرب انسان ناجح في شغله ايا كان الشغل او مجال العمل اللي هو بيشتغل فيه، وده لأنه مدمن شغل وبيكرس وقته ومجهوده لعمله بمنتهى الاخلاص، ودايما مايتأخرش عن أي طلب يخص الشغل اما المعروف عنه فهو انه محترم ومحبوب في بيئه عمله من مديريه وزملائه، بس لأنه شخص عنده حدس وحاسة سادسة قوية وقدرة جيدة على التوقع بينجح جدا في مجالات الصحافة والتحقيقات، وعلم النفس، والتحليل النفسي، والبحث العلمي.
رجل العقرب له طبيعة خاصة جدا وجوانب متعددة, قلبه مليان مشاعر فياضة وحساس جدا حتى لو ما أظهرش ده، ويوم ما بيلاقي الشخص المناسب سواء على مستوى الصداقة او الحب ساعتها بس بيعلن وبيفجر المشاعر ديه بمنتهى الوضوح والصراحة وبيتخلى عن كل الحواجز. وهو دايما بيدور على الشريكة الحقيقية اللي على طبيعتها اللي تدخل معاه في علاقة عميقة وتغرق فيها لشوشتها ومش علاقة عابرة وسطحية…
رد مع اقتباس
