السلام عليكم اخوتي واخواتي ورحمة الله وبركاته وعظم الله لنا ولكم الاجر والثواب لمناسبةحلول شهر محرم الحرام شهر احزان محمد واله الاخيار الاطهار. كل يوم عاشوراء وكل ارض كربلاء . هذا هو شعار الشيعه في العالم الاسلامي بأسره . وعلى اساس هذا الشعار العظيم كتبت هذه القصيده من سنين ومباشرة بعد سقوط نظام الطاغيه صدام وحاشيته . وتحديدا في عام ( ٢٠٠٤ م ) وسميتها . شعار الشيعه . واسال الله القبول لي ولكم.
( شعار الشيعه )
الشيعه ترفع بكل عام .. شعار الناس خلها تشوف
كل يوم اليمر عاشور .. وكل ارض العراق اطفوف
*******
خلي تسمع الوادم .. قضية حسين معروفه
ضحى من اجل دينه .. وللأديان موصوفه
كًبله وي ابن عمه .. مسلم غدرته الكوفه
وأصحابه واهل بيته .. وأخيه الطاحن اجفوفه
حسين يضحي لجل الدين....بأهله واخوته الطيبين
ولهذا السبب احنه .. نطبر روسنه باسيوف
شعار الناس خلها اتشوف
****
ندكً زنجيل اونلطم .. بمواكب حزن منتشره
وكل شيعي يظل للموت..بكًلبه جمره وحسره
قضيةأحسين موهينه .. عنها اشكًد قصص نقره
وأهواي انجبت ثوار .. لكل ثوره اصبحت عِبره
بيها انضربت الامثال.... وتتناقلها هالاجيال
دروس وعِبر من عدها .. تعلمنه ومشينه اصفوف
شعار الناس خلها اتشوف
*****
خل يسمعني كل حاقد .. على الشيعه وعلى المذهب
أكًله خايب وخسران .. بوسط النار تتكًلب
مذهبنه سراج اينور .. موت بغيك اتعذب
تعلمنه بنهج حيدر .. وبأدابه نتأدب
وعله خط حيدر ونهجه....نمشي ونبذل المهجه
وخط حسين يا شيعه .. عدنه واضح ومعروف
شعار الناس خلها اتشوف
****
بنهج حسين لو للموت .. نمشي ونهج داحي الباب
ومجالسنه يشيعه اليوم .. بيها نسكً الارهاب
وعملة كربله عدنه .. نجددها بغير احساب
شما ذبحو اشما فجرو.. شما فخخو هالاذناب
مساجدنا يفجروها.... عوائل شيعه هجروها
علينه ارهابهم شنًو .. وحقدهم زايد وموصوف
شعار الناس خلها اتشوف
******
ما يدرون هل حقاد .. الشيعه بالامر تعلم
دين الله سماحه وخير..مو ارهاب بي ينظم
ضد كل طائفه يفجرون..مسيحي وصبي ومسلم
أبد ما نسكت اعله الصار .. ابد ما نظل نتألم
وحكً هو علي الكرار ... نخلي النايحه بكل دار
بس يامرنه مرجعنه..التكفيري ندوفه دوف
شعار الناس خلها اتشوف
****
نخاطب مجلس النواب .. حكومه انريد معتدله
شفنه الظلم صار اسنين .. والظالم مشه او وله
خل انعوض الماضي .. ونبني ابلادنه ويعله
ونترك كل خلاف الصار .. ونمشي بدينًه وعَدله
استقلال ونريد اقليم ... بأمان انريد بيه انقيم
ونسكً راس كل حاقد .. راح الظلم راح الخوف
شعار الناس خلها اتشوف
******
نسألكم الدعاء
خادم خدام الحسين. ع.
أبو زهير الكعبي الرفاعي
رد مع اقتباس
