اثناء الحمل وبعد الولادة بتحصل تغيرات كتير في الجسم لازم تكوني مستعدة ليها مقدما عشان تتجنبي اي موقف صعب في المستقبل ، وتتعاملي مع طفلك بافضل طريقة ، والنهاردة من خلال موضوعنا هنقولك مجموعة معلومات عن الحمل والامومة مهمة جدا واجابة على بعض الاسئلة اللي ممكن تكوني محتاجة اجابات ليها عن الفترة دي.
معلومات عن الحمل والامومة:
1- الوضع الصحيح في الرضاعة الطبيعية:
الخبراء بيوصوا بشدة على الرضاعة الطبيعية لمدة 6 شهور ، الطفل في الفترة دي المفروض يعتمد على الرضاعة الطبيعية بس ، من غير اي حاجة جنبها زي المية او العصاير ، ولكن لازم اثناء الرضاعة تاخدي الوضع الصح عشان انتي والطفل تكونوا مرتاحين ، وهنقولك شوية حاجات تمشي عليها:
– لازم دقن الطفل تكون لامسة الصدر بقوة.
– لازم فم الطفل يكون مفتوح على الاخر.
– المفروض انك تبقي شايفة جزء من الجلد الغامق في الصدر فوق الشفة العلوية للطفل اكتر من اللي اسفل الشفة السفلية.
– المفروض ان الطفل ميأذكيش اثناء الرضاعة.
– المفروض ان خد الطفل يفضل واخد الشكل الدائري زي ما هما اثناء الرضاعة.
معلومات عن الحمل والامومة
2- المخاض الكاذب ممكن يحصل لما تحسي بالتعب او الجفاف ، و لما تقفي فترات طويلة:
مع قرب الشهر الرابع من الحمل ، ممكن تبدأي تلاحظي بعض انقباض وضيق الرحم من وقت للتاني ، ممكن تيجي بشكل مش منتظم ومش متوقع ، وعادة بتكون الانقباضات دي مش مؤلمة وبتتركز في البطن ، وده ممكن يحصل لما تحسي بالتعب او بتعاني من الجفاف ، او حتى بعد المشي مسافات طويلة.
المفروض تعملي ايه:
– اشربي مية كتير.
– غيري وضع وقوفك وقعدتك.
– ارتاحي ونامي كفاية ، والافضل يكون على جنبك الشمال.
3- تحفيز الثدي ممكن يأدي لتسريع المخاض:
احسن وقت لولادة الطفل هي بعد 39 اسبوع ، لكن لو اتأخرتي لحد 40 اسبوع ، هنقولك طريقة طبيعية لتسريع المخاض ، ولكن اعمليها بعد ما تستشيري الدكتور بتاعك اللي متابعة معاه وعارف كل جوانب صحتك وحملك.
تحفيز الحلمتين ممكن انه يأدي لتقلصات الرحم ، وده بيحصل بسبب انتاج الاوكسيتوسين ، وده نفس الهرمون اللي بيتسبب في اخراج الحليب للثدي ، ممكن تحفزي الحلمات يدويا ، او تستخدمي مضخة الثدي.
وعملية تحفيز الثدي من فوايدها:
– تسريع المخاض.
– تقليل نزيف ما بعد الولادة.
4- الافضل تسيبي الطفل يحدد تاريخ ميلاده:
اكيد الاسابيع الاخيرة في الحمل بتكون صعبة ، والرغبة في الولادة بسرعة امر طبيعي ، ولكن بالرغم من المشاعر دي ، الدكاترة بيقولوا ان الطبيعة لازم هي اللي تحدد ميعاد الولادة ، والافضل انك تستني.
وفي حالات قليلة جدا اللي بيسمح فيها بتسريع المخاض:
– انك تدخلي على اسبوعين عن ميعاد الولادة الطبيعية.
– ان المية اتكسرت ، لكن المخاض مبدأش.
– لو بتعاني من عدوى في الرحم.
– لو بتعاني من مرض السكري اللي اتطور اثناء الحمل.
– لو كنتي بتعاني من اضطرابات ارتفاع ضغط الدم اثناء الحمل.
5- الالم صديقك مع تقدم المخاض:
الطبيعة ذكية جدا والالم اثناء المخاض ليه دور مهم ، لانه بيساعد على الولادة عن طريق افراز هرمونات زي الاكسيتوسين ، اللي بيساعد على التقلصات ، ولما التقلصات بتكون مؤلمة ده بيساعد على اطلاق هرمونات تانية بتساعد على التحكم في الالم ، والهرمونات دي اسمها الاندروفين.
لكن القلق وارتفاع مستوى التوتر ممكن انهم يبطئوا العملية ، عشان كده مهم جدا انتي متتوتريش ومتخافيش من الالم.
6- الشوفان مع الفاكهة وجبة رائعة بعد الولادة:
البواسير شائعة جدا بعد المخاض ، ده غير ان الدوا اللي بيوصفه الدكتور بعد الولادة ممكن انه يخلي التبرز صعب اكتر.
لكن انتي تقدري تحلي المشكلة دي بنفسك ، ابدأي يومك بوجبة شوفان مع الفاكهة ، لانه بيساعد على تحريك كل حاجة جوه المعدة لتحت لانه بيحتوي على الالياف ، وتقدري كمان تاكلي شوربة فراخ وتفاح.
7- الكآبة النفاسية مختلفة عن اكتئاب ما بعد الولادة:
لازم تفهمي ان بعض مشاعر الاحباط والاكتئاب طبيعية بعد الولادة ، ولكن الكآبة النفاسية واكتئاب ما بعد الولادة مختلفين ، الكآبة النفاسية بتكون عبارة عن مشاعر مزاجية وحزن بتستمر عادة حوالي اسبوعين ، اما اكتئاب ما بعد الولادة ده اكتر خطورة ، بيحصل لما تستمر الاعراض دي اكتر من اسبوعين.
بتحسي انك محبطة جدا وبتفقدي الاهتمام بانشطتك اليومية ، والمتخصصون بيقولوا ان اكتئاب ما بعد الولادة بيحتاج لعلاج طبي مقارنة بالكآبة النفاسية ، ومهم جدا انك تعرفي ان الشعور ده ممكن يتطور في اي وقت بعد الولادة ، حتى بعد سنة كاملة من الولادة.
8- الدورة الشهرية ممكن مترجعش طول فترة الرضاعة الطبيعية:
الخبراء والمتخصصين بيقولوا ان الدورة الشهرية المفروض انها ترجع بعد حوالي 6 – 8 اسابيع من الولادة ، ولو بترضعي الطفل رضاعة طبيعية ، ممكن يختلف ميعاد رجوع الدورة الشهرية ، لازم تعرفي ان عادة الامهات اللي بيرضعوا رضاعة طبيعية ممكن الدورة الشهرية مترجعش طول فترة الرضاعة ، وبعض الامهات ممكن ترجع لهم بعد شهرين ، سواء بيرضعوا رضاعة طبيعية او لا.
لازم كمان تنتبهي على كمية النزيف بعد الولادة ، النزيف الغزير عادة ممكن يستمر لمدة توصل ل 10 ايام بعد الولادة ، وممكن بعض النزيف الخفيف او البقع يستمر لمدة توصل ل 4 – 6 اسابيع.
رد مع اقتباس
المشاركة الأصلية كتبت بواسطة MiSsO
