حَـنِّيت الك ياوالدي وِلْحضنك اشـتاگيت
كِلما تهِب نَسمة هَوَه تِـفتَحلي باب البيت
وامشيلك ابسَكـتَه ... حسبالي اجيت انته
( نسمة هَوَه )
________________________
يل ماخــذ اوياك النِـدَه وميـبِّــس الورده
شِيلِمَّه يل عمـــري ابدرب هجرانك اتبده
بويه اليفارگله طفل غير البجي اشــعنده
آنه العـليله وفرگــتك ذبحـــتني وِتـأذيت
يل ذبحي مو وكته ..حسبالي اجيت انته
نسمة هوه
ـــــــــــــــــــــــــ ـــــــــــــــــــــــــ ــــــــــــــــــــ
بصدرك أشِم امن الزغـر بس ريحـة الملگه
والرابي بحضانك عُـمر يســتغــرب الفرگـه
يابويه والله جفوفي الك محتامه عالشبگه
يالتارس انفاسي عطر بس العــطـر خليت
عطرك تنفـســــته ....حسبالي اجيت انته
......نسمة هوه
ـــــــــــــــــــــــــ ـــــــــــــــــــــــــ ــــــــــــــــــــ
يل كلشي بيه ايحِن الك مشـتاگه لحضانك
كل مغرب امصلايتك افرشــــــها بمــچانك
بكلشي حلـو بس الهجـر مو حلوه بلسـانك
يالواعدتني ابجيِّتك حته ابحــــلم ماجيت
طيفك ولاشــــفته .... حسبالي اجيت انته
.......نسمة هوه
ـــــــــــــــــــــــــ ـــــــــــــــــــــــــ ــــــــــــــــــــ
أدري الدمع مابي نفع من تخلـص احروفي
راح اغلق ابواب العــتب وافتحلك اجفوفي
ياربي رد حســــين إلي وبجـيته رد شـوفي
شلي ابعمر مابيه أبو حال اليتــــــــم ظليت
كلمن اجه البِـنْته ..... حسبالي اجيت انته
......نسمة هوه
ـــــــــــــــــــــــــ ـــــــــــــــــــــــــ ــــــــــــــــــــ
من اســـمعـت رد الظعـن كل حيــلي رد بـيَّه
رحـت اركض ابلايه وَعي ملهــــــوفه رجليه
شـافاني ابن حذلم سِـكت ظل صــافن اعليّه
من شوگي ليش اتفاجئِت عني الخبر ظميت
يحچــيلي حلَّـفته .... حسبالي اجيت انته
.......نسمة هوه
ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــ
ظليت ألـِـح گال الخبر خاف احجي ويكتلِچ
هسه آنه من طف كربله جايب خــبر اهـــلچ
كلهم ضحــايه اعله الثـره والعــــــيله ردتلچ
لاعمــج او لاوالــدج بس بالجـــــــرح رديت
يالگلبي گطعـــته ..... حسبالي اجيت انته
نسمة هوه
ـــــــــــــــــــــــــ ـــــــــــــــــــــــــ ــــــــــــــــــــ
د.أبوعلي النجفي
الشاعر د.ابوعلي النجفي
رد مع اقتباس
الغالي استاذي❤