الرجل العاقل, الحكيم, المتوازن, بيسعي دايما للموساواة والعدل.. مفكر ويستمتع بالنقاش والمحادثات, هو سفير الهه الحب! رومانسي جدا وفي الحب بيبقي هدفه الأسمي هو سعادة شريكته, شخصية جذابة ومتحدث لبق بيعرف يقول ايه في أي مناسبة أو موقف… ديه الموصفات الاساسية لرجل برج الميزان.
رجل الميزان بيبقي نفسه انه يرضي ويسعد كل اللي حواليه وهو بيعتقد انه عنده القدرة انه يعمل ده لو سمع وفكر وحلل مشاكلهم هو أكيد هيلاقي حل لأي مشكلة ممكن تواجههم.
يلا نتعرف على موصفات رجل برج الميزان بالتفصيل من 23 سبتمبر – 22 أكتوبر.

رجل برج الميزان
1- رومانسي ومضحي:
رجل الميزان هو رجل رومانسي من الدرجة الأولي, أكتر حاجة بيحبها في الحب هو الحب نفسه وشعوره انه يبقي في علاقة , لما بيوقع في الحب بيحس بشعور الأكتمال وبيبذل اقصي طاقة عنده عشان يحافظ على علاقته بشركته إنها تكون كاملة وموزونة. مش بيحب ألعاب الحب وواضح وصريح وملتزم بوعوده, هو بيعشق الإستقرار والموساوة, شخصية محايدة وجادة. صريح جدا وصراحته ممكن تكون جارحة في بعد الاوقات بس تأكدي إن عمره ماهيستخدم كلامه لايذاء أو جرح عن قصد.

عاشق سخي… بيبقي عايز يسعد شريكته بأي شكل, وبيحط سعادتها قبل سعادته, وده بيخليه فعلا الشريك المثالي وفتي أحلام كل البنات! بيقدر قيمة شريكته وبيبقي حاسس إنها هدية من ربنا ليه.
2- مسالم وعادل:
رجل برج الميزان شخصية مسالمة جدا, بيكره الخناق والمشاكل, بيؤمن إن مفيش مشكلة ينفع تتحل بالعصبية والزعيق, هتلاقيه دايما في أي مشكلة بيحط نفسه مكان الطرف التانيعشان يقدر يفهم هو ليه اتصرف بالشكل ده أو خد القرار ده .. بيقدر يهدي الشخص اللي قدامه في وقت غضبه أو انفعاله, ويحول النقاش من زعيق ونرفزه لنقاش هادي ومفيد عشان يوصل لحلول عملية وموزنة.
3- الصديق المثالي:
صديق وفي, بيراعي احتياجات ومشاعر الآخرين, بيحب يحسس اصحابة باهميتهم, رجل متفائل وديما بيحب يبص ويبرز مميزات اصحابه, عشان كده منستغربش لما نلاقي للرجل ده شعبية كبيرة وسط اصحابة وعيلته.
هادي وبيسمع مشاكل اصحابه كويس قوي وديما بيساعدهم يلاقوا حلول ليها وبيساعدهم انهم يشوفوا الوجة الاخر من المشكلة وإزاي الطرف التاني من المشكلة ممكن يكون بيفكر, ومن أحسن منه في الموضوع ده؟! بالطريقة ده بيقدر يساعد اصحابه ويفتح عيونهم على اخطائهم وبيقدر يعمل ده بطريقة موزونة ومن غير مايضغط عليهم حتي لو اضطر في بعد الموقف انه يطلع نفسه غلطان بس عشان يريحهم.
4- متردد:
القدرة على موازنة الاختيارت والاحتمالات ده ساعات بيخليه متردد.. لو سألته تحب تاكل ايه دلوقتي, أو نخرج فين أو ندخل أي فيلم في السينما, توقعي إنك هتفضلي مستنية رد على اسئلتك ديه وقت مش قليل! بس في النهاية هو لما بيجي يقرر في أي موضوع بيبقي قراره موزون ومبني على التقييم العادل لجميع الخيارات المتاحة.
لانه مش بيفكر هو بس بيحب إيه بس بيفكر برضه الناس اللي معاه أو شريكتة بتحب ايه وإيه أحسن اختيار للجميع… عشان كده التردد ده بيبقي صفة في صفه احيانا ومش بيبقي ضعف منه لأ ده بيبقي ميل له نحو الحياد وارضاء جميع الأطراف. رجل الميزان محتاج شخصية صبورة ومتفهمة هو إزاي بيفكر وبياخد قرارات.
4- مثقف ومحاور:
زي ما قلنا رجل الميزان رجل مثقف وبيعشق النقاش والمحاورة, دايما بيناقش بمحايدة وتلاقيه بيظهر عيوب ومميزات كل موضوع, عمره ماينحاز أو يدي افضلية لرأي أو قرار من غير دراسة وتفكر عميق.
5- جميل ويعشق كل جميل:
رجل الميزان عنده عين تبحث دايما عن الجمال في كل شيء, في الناس, في الموسيقي أو الفن, في الكلمات, في الأشياء زي العربيات أو الساعات الأنيقة… عشان كده ممكن تلاقيه بيصرف فلوسه في حاجات مش اساسية ولا مهمة بس هي بالنسبه له جميلة واقتناءها بيسعده…
هو رجل شيك بيهتم بمظهره من جميع النواحي, لبسه, عربيته, جذاب ووسيم مش ضروري بالشكل لكن بلباقتة وكلامه الحلو, عشان كده دايما كل العيون بتبقي مركزه معاه ومتبعاة.
6- مسرف ولكن:
على الرغم من ميوله غير العملية في بعض الأحيان في موضوع صرف الفلوس زي ماقلنا، بس رجل الميزان برضه رجل يعشق ويقدس النظام والمنطق السليم ووضع خطط لتأمين مستقبله المالي, هتلاقيه بيدخل في مشاريع واستثمارات ليها عائد مالي مرتفع على المدى القصير.
رجل برج الميزان رجل رومانسي, حكيم ومسالم, بيقدر الحب وبيقدر شريكته لأبعد مدي وده فعلا صفة نادرة في الزمن ده, لو شريكك ميزان لازم تحافظي عليه لأن زي ماهو هيقدرك ويعاملك على إنك هدية من ربنا ليه, لازم إنتي كمان تقدري هدية ربنا ليكي…