مو قصدي ابلل عتبتك وابدي العتب مو قصدي
مو قصدي ابلل عتبتك
وابدي العتب مو قصدي
بس انت تدري من اختنگ
غير الدمع مـا عـندي
وشما مطر عـ الخد نزل
غيم الگلب بعتابه
يشَمِل هواك اعله الحزن
والصحو ايفتح ابوابه
مو قصدي ارد اقره الرسايل
وافتح سنين القهر
ومو قصدي اتذكر ضحكتك
وي روجات النهر
من طيفك اشرد للسهر
والگاك تالي انت السهر
شما غاب نجمي وغيمت
والجدم خانه ترابه
يشمل هواك اعله الحزن
والصحو ايفتح ابوابه
وهالليلة طفيت الضوة
وبينت لمعة بخدي
وانخاك من ليل الجفى
لا شتا يكزبر جلدي
علمني ما احن لو شفت
ورد الربيع بلونك
وشلون اصبر شجرتي
من اذكر طيور عيونك
مو قصدي امون اعله الزعل
وارجع واگول شلونك
تكبر غلاتك بالزعل
والوفي يطيب عتابه
يشمل هواك اعله الحزن
والصحو ايفتح ابوابه
والمشكلة بروحي زعل
وحالف عتب ما اودي
وصياد ياليل الشتا
وماعرف اطير لوحدي
عقيل_العرد
رد مع اقتباس
