ملاحظة.. (الموضوع باللهجة المصرية)
الحمام من اكتر الاماكن فى البيت اللى بتهتم بيها من حيث شكل السيراميك ولونه وتجهيز السباكة والاكسسوارات اللى بتحتاجها، لكن هل خطر على بالك قبل كده انه اكتر مكان فيه إصابات بتحصل وممكن نتائجها تكون سيئة جدا لاقدر الله.
كام واحد وقع فى الحمام اتجرح او اتكسر او حصل له نزيف بسبب قوة الوقعة ولان أرضية الحمام صلبة جدا.
الحمام هو من اخطر الاماكن فى الإصابة فيه ولو بصيت حواليك هتلاقى حوائط وارضيات صلبة ، مساحات ضيقة، زوايا كتير وحواف حادة سواء بلاط او بانيو أو حوضوكمان مياه على الارضية والحوائط وده المكان المثالى للوقوع على الارض والاصابات.
معظم المهندسين المعماريين و مهندسين الديكور لما بيجهزوا بيت بيعملوا حسابهم على النقط دى ، ولو كان عندك أطفال فى البيت يبقى لازم تعرف ايه هي الوسائل اللى تحقق لك اقصى درجات الامان لك ولاولادك.
هنتكلم فى موضوعنا عن وسائل الامان فى الحمام وازاى بشوية افكار وحاجات بسيطة تحقق الامان ده
الامان فى الحمام بأرضية مبتكرة
السيراميك هو السبب الرئيسى للاصابات اللى بتحصل لاى حد بيقع فى الحمام ، وعشان كده لو كنت بتأسس حمام جديد حاول تبعد عن البلاط الناعم عشان تقلل فرصة الانزلاق على الارض.
لو كان عندك سيراميك ناعم تقدر تستخدم الدواسات المطاطية فى الارضية عشان تمنع حدوث الانزلاق، وظهر من النوع ده دواسات بشفاطة زى اللى بتمسك على الزجاج عشان متتحركش ابدا من الارضية.
تنظيف الارضية والحوائط باستمرار
عشان تحقق الامان فى الحمام يبقى لازم تكون ارضيته وحوائطه نظيفة دائما وجافة وحط خطوط كتير تحت كلمة جافة.
اوعى تسيب المياه تتراكم على الارض ، لازم تمسحها بالممسحة بعد كل استخدام ، لانك لو معملتش كده هيبقى فيه فرصة للانزلاق والاصابات واحيانا الصعق الكهربائى ، والكلام ده ينطبق على السقف لانه ملامس تماما لكشافات الاضاءة لازم تتعامل معاه بنفس الحذر.
ابعد الاجهزة الكهربائية عن المياه
لازم تعرف ان المياه من الموصلات الجيدة للكهرباء ، عشان كده ابعد اى أجهزة عن المياه سواء كان سشوار او مكواة شعر او مكنة حلاقة.
حاول تعمل لهم رف معلق او علبة فى الحيطة وتكون بعيدة تماما عن المياه عشان تتجنب خطورة الصعق الكهربائى.
المقابض المساعدة
sasirin pamai/shutterstock
المقابض اللى بتتركب جمب المرحاض او البانيو او كابينة الشاور ممكن تفرق معاك كتير جدا وتنقذ من وقعة كانت ممكن تحصل.
وجودها اشبه بالظبط بأيد تتمد ليك عشان تلحقك قبل ما تقع لو اختل توازنك لاى سبب ، ودى بتظهر أهميتها لما يكون عندك حد فى البيت سنه كبير يقدر يمشى عليها من لحظة دخوله لحد ما يخرج.
وسائل امان إضافية
فيه مجموعة وسائل امان موجودة فى السوق ممكن تجيبها عندك عشان تحقق امان اكتر لك ولاسرتك وخصوصا لو البيت فيه كبار سن.
- كرسى الاستحمام
واللى بيعتبر من وسائل الامان الجميلة جدا عشان سهولة تركيبه وده يخدم كبار السن تحديدا او الاشخاص اللى متقدرش تقف زى فكرة المقبض بالظبط عشان يبقى موجود فى الحمام وانت مش خايف عليه يقع.
- رافعة التواليت
ودى مناسبة جدا لانواع الاطقم الصحية اللى ارتفاعها منخفض، ولو ركبتها هتضمن عدم الوقوع من فوق التواليت بنسبة 100% لانه بيحكم جسم اللى قاعد مش بيعطيه فرصة انه يقع أصلا.
مكان حفظ الادوية
كتير من حمامات بيوتنا فيها علبة اسعافات أولية فى الحمام لاى طوارئ بتحصل وبيكون فيها ادوية ومطهرات جروح، الادوية دى لازم تحفظها بعيد عن متناول الاطفال.
الاطفال بطبعهم شغوفين وعندهم فضول رهيب يستكشفوا كل اللى حواليهم، ومن السهل انهم ياخدوا من الادوية دى حاجة وهما ميعرفوش ايه ده، وطبعا دى حاجة حصلت فى مجتمعنا كتير قبل كده.
مكان المنظفات
لو تركت المنظفات الموجودة فى حمامك فى مكان عشوائى فدى فى حد ذاتها مخاطرة ومجازفة كبيرة جدا منك.
وطبعا اغلبنا فاكر الإعلان اللى شفناه فى فترة التسعينات عن الطفل اللى شرب البطاس وكانت حملة توعية عشان الامهات تحافظ على أولادها.
لازم المواد دى وخصوصا المواد الكاوية اللى بتستخدم فى تنظيف الارضية تتحفظ فى علبة مقفولة بمفتاح.
وميزة الموضوع ده مش بس هيحافظ لك على الامان فى الحمام لكن هيعمل شكل ديكور جميل جدا بدل المنظر العشوائى لعبوات المنظفات.
الإضاءة
اغلب حوادث الحمام بتحصل فى الضلمة، اى حد ممكن يقع او يتخبط او يتزحلق بسبب ان الإضاءة ضعيفة ومش شايف كويس.
عشان تحقق الامان فى الحمام لازم تتأكد من وجود اضاءة قوية تغطى كل مساحة الحمام وتبين اى شيء موجود.
وطبعا مننساش ابدا الإضاءة الليلية يعنى لابد من وجود لمبة وناسة او سهارة عشان لما تقوم باليل متتخبطش فى حاجة ودى مفيدة جدا بالنسبة لكبار السن.
درجة حرارة المياه
حاول ان تكون درجة حرارة المياه متزيدش عن 50 درجة مئوية، لان اكتر من كده لو حاولت تفتح خلاط المياه او الحنفية ممكن تتعرض لاصابة فى ايدك او اثناء الشاور بحرق او التهابات بسبب المياه السخنة الزيادة.
عشان كده ينصح بعد استخدام المياه السخنة تظبط درجة حرارة السخان على 50 مئوية عشان تحافظ على صحتك وصحة اولادك.
بريزة كهرباء مناسبة
عشان توصل لاقصى درجات الامان فى الحمام يبقى تعمل حسابك وانت تأسس الكهرباء فى البلك سويج فيها فتحة ارضى ليه بقى؟ لان الفتحة الارضى بتمنع حدوث صعق كهربائى لو حصلت قفلة.
لازم تخلى الكهربائى يعمل لك الموضوع ده وغالبا الفنيين النهاردة بقوا يعملوا حسابهم على كده عشان يزود لك الامان.
تركيب مظبوط
من عناصر الامان فى الحمام تركيب كل شيء فى مكانه مظبوط وبطريقة صح ، مش تلاقى حاجة مهزوزة اول ما تسند عليها تقع او تتكسر ده يبقى فيه خطورة كبيرة جدا.
افتكر دائما ان الامان اهم من الشكل الجمالى يعنى ميبقاش عندك حمام شيك والوانه حلوة ويجى حد وهو داخل يقع على الارض لاقدر الله هتبقى مشكلة كبيرة.
رد مع اقتباس
المشاركة الأصلية كتبت بواسطة ☆Abbas ALiraqi☆
