مأمون النطاح - رثاء الكابتن أحمد راضي
الرحمه علئ روح الاسطوره العراقيه احمد راضي
رثاء الشاعر مأمون النطاح للاسطوره العراقيه احمد راضي
ورع جداً خجول ودمث الاخلاق
ورحيلك ترك بين ضلوعي غصّة
حنين انتَ وأصيل وسمح الاطباع
بس الموت ابد منطاك فرصة
عشت شامخ جبل ما تحب الأشباه
راسك عالي ما فد يوم نصّى
وعشت حر وعزيز وراعي لـ دين
جميل وبالقبول الله يخصّه
على دروب المساجد سارت اخطاك
حصيف وعالصلاة شكثر وصّى
ضحكتك يابو فيصل بلسم جروح
وحياءك قصّته وي الخلگ قصّة
ادخلت الفرح بصدورنا سنين
ورفعت اسم البلد فوگ المنصّة
وترست عيونّا افراح ومسرات
يا غالي شكثر چان الوطن حرصه
من ينخاك تفزع دوم ويّاه
بسيط وتحترم هالناس شخصه
يحبّوك البشر من كل الاعمار
ودخلت قلوبهم من دون رخصة
يابو هيا النعيم ورحمة الله
افضل من زمن يحكمنه لصّه
واذا تنمّر عليك الطائفي اليوم
وحاول من خلالك يمحي نقصه
خل يسمع كلام الخلگ شتكول
وخل يسمع كلامي وهذا نصّه
احمد ابن زاخو ويسكن الفاو
اله بوجدان كل عراقي حصّة
رد مع اقتباس
المشاركة الأصلية كتبت بواسطة MiSsO
