گتلها الكاهي البخدودج
وخلصناه اليوم الاول
واني هي نفكر بينه
من يا صفحه الحب يمرنه
ومن ياوكت احنه الحبينه
وتلاگينه .. بمصباح الله
چانت گيمر بس متحجب
واكف وعيوني تهل بيه
گالتلي شمالك ؟ متعجب ؟
گتلها الكاهي البخدودج
جدا طيب
وهم خجلت بس لا هل مره
چنهه تريد تسولف بيه
نشفت چلمتهه عله الشفه
وجبتلهه من عيوني اميه
گالت شوف شصاير بيه ؟
گتلهه شصاير فهميني ؟
گالتلي شما ارد احجيهه
تفضحني وما تسكت عيني
گتلهه احساسچ مايسكت
گالت تدري ؟
گتلهه من اول ما شفتج
من حطيت عيوني بعينج
گالت ساكت؟
گتلهه افتريت الدنيه
بكل خطوه ازرع كلمة وينچ؟
وصارت هوسه .. وتاذينه
گتلهه ممكن تمشينه ...!؟
واتمشينه
وجان الياس يسولف بينه
والورده الذبلانه تباوع
يخجل خدهه .. تاشر علينه
واتمشينه
وطخت ايدي باظفر منهه
وحسيت حرورة وجنتهه
تريد تشب وخفت عليهه
وخرت ايديه من ايدهه
وگتلهه ..
باول حرف من انه اهواچ
وگالت اسكت ..!
وانه السيف يحز بروحي
بس متحمل ..
وامشي واستغفرهه ذنوبي
وگالتلي مضوجتك ادري
وگتلهه لا عادي عيوني
گالت باوعلي .. وضحكتهه
بذيج اللحظه ..
تشل ظنوني
باوعتلهه ..
وخدود الگمره الخجلانه
صارت حمره
گالت بس الالف وسكتت ..
گتلهه الحِب بگطراته
گالت ( اح )ورجعت سكتت
گتلهه الموسم مايگدر
يتجاوز غيره بفتراته
وسكتت مدة تقل عن ساعه
وتتمشه وانطتني گفاهه
والمده الما جانت ساعه
لمن خلصت..
ماحسيت بظل يتراكض
نزيت بسرعه وگمتلهه
گالتلي .. الكلمه ..!!
شبيهه ؟
گالت متاكده.. نكملهه ؟
گتلهه احجي..
صاحت فوگ الدنيه ..
احبك
احبك
وانه بهاي اللحظه مسافر
يم حيطان الجنه .. وگاعد
اسمع چلمتهه بحس فشگه
وتدري بروحي يعيش الساتر
وتشابگنه ..
مد غصن الزيتون عيونه
تلفلف بينه
والجوري .. اتقرب غازلنه وفيه علينه
وخلص هذا اليوم بفرحه
وغيرلي عيوني والواني
باخر كلمه اباب الطلعه
گالتلي الام موطن اول
وانت بروحي
موطن ثاني
م
رد مع اقتباس
