(( راهي سعيد ال ناطور الشبلاوي))
شاعر شعبي كبير من شعراء الديوانيه
المميزين فأبو كرار اضافه لكونه من اسرة شيوخ
فهو مزارع ناجح يتصف بقوة الشخصيه
ورصانتها وله هيبه ووقار لدى الجميع
عرف بقوة قصائده ونتاجه الشعري
بشكل عام يقول كل الوان الشعر الشعبي
متمكن جدا لديه امكانية الرد وبسرعه
وبديهيه وقد اعجتني جدا قصيدته المشهوره (كتلني محايلي ويا الروح)
وهذا بعض منها وليس كل القصيده
كتلني محايلي ويا الروح
كتلني محايلي ويا الروح اطبعه ردت عالذل
مثل تجبيش نزرة خيل تطاوعني وترد تجفل
مره تكوم مذعوره ومره ترتخي وتسبل
يروحي تخيري شتردين اعيش بروض لو ممحل
تجاوبني وتكلي بروض مايربه ويعيش الصل
صاحتلي وكلت يا حيف وجيت بغيض متحمل
اموت بشرف والعزة تضل وياي كل بكل
وبكت عندي سوالف ضيم اسولفهن لحادي البل
بنيت البيت يالحادي وغريب البيه غصب ينزل
وحسبت الحايط المبني زهاميل وصخر وشجل
زرعت الكاع يلحادي وعرفت الفرهد السنبل
وصرت لاكوط بشتالي الم السنبل من الجل
راسي افتر صرت مجنون مدري الغيري متخبل
اشوفن تنجتل وادم والجتال مايفصل
وشوف اسباع جوعانه وشوف ازنيهر مكصل
ولاوذنة فزع بالضيج نكوم ندابج ونصهل
ولادين اليطر عاكه ولاديان ضل يمهل
وين اهل الكرم والزود ذيج التذبح المطفل
منازلهم غدت خلوان وبطل حيلي عله كل منزل
يحادي اهل الرذيله اسدور عالطيب غدة تبزل
شسولفلك بعد شتريد اسمع قصتي وسجل
سوالفنه اصبحت تمثيل ماضل أليثمن الخل
اسولفلك بعد وحده ولاكن هاي ماتشمل
البعض كام يحلف بخته وخته دايحه ومجعل
هواي اطن بخت ياحيف ماتزعل على التزعل؟؟؟
وله في ألأبوذيه معقبا على قول المتنبي
(فلا الجود يفنيها اذا هي اقبلت /ولا البخل يبقيها اذ هي ولتي)
وحك من هان سيفه هبل واللات
الدنيا مايهمهه الراح واللات
اشيبقيه البخل لوجان والات
ولاهي كبال ماتفني بعطيه
وله في الدارمي
كون افترج والكاك واتنوشك ايدي
وظفر الكصيبه وياك لظفر وريدي
وله في الأهزوجه بعد ان وصله خبر نجاة صديق له وعنوان اجتماعي من حادث
جزه شرهه وتعده والخبر جذاب
ونودعك يالعزيز بسور داحي الباب
نقبل غير كلبك ياكلب ينصاب
المثلك مايستاهل داخل بالله وبالعباس
وله في الموال
يابو الزعل ناظري دم يكت من نشفه
بس دهل خل بالحجو نشمت ونشفه
مرضه بسبب فركتك لوجيتنه نشفه
من حيث كلش زحم ياشيخنا بعدكم
ماعرف حجي الصدك يمن يصح بعدكم
ياساعه كلي تمر شوطولت بعدكم
حتى افرح بجيتك واسمع جمل ناشفه
رد مع اقتباس
المشاركة الأصلية كتبت بواسطة MiSsO
