التقدير بالشعبي
التقدير بالشعبي
يندار الفكر وكت التصح لحظات
بيها الفهم مايستوعب محير
ويصحلك گلب مهموم وينزف ظيم
والطيبة بكلامة من الكلب تنقر
تلگة الخلك ماتفهم شنو المقصود
كل ظنهم يلوم وهوه يتعذر
خليلك مكانة وصاحب الطيبين
بيهم يعلى شانك وابد ما تخسر
واترك كلمن اتجاهلك وجهل بيه
وابدع بالاعمال وخله يتمرمر
بالك بالعلم تتكبر اعلى الناس
تره اكبر علوم الدنيا گد الذر
ويه الباري ما تتقدر بمقياس
وانشر من علومك بالنفس تفخر
واحذر من سفيه اتقدره بالك يوم
تصبح مثله وبهل ميزه تتمكور
واكو بيهم عديم الذكر للزينات
والزله علچ ينشرها يتبختر
بحلوگ الخلگ يفرح وچنه بعيد
احسلك تتركة وعنه تتكتر
واحسِن ظنك ويه الباري تلگة الخير
الله يريدك بخيراته تتبشر
لو اكبر ذنب ينمحي باستغفار
بس الشرك بالك تشرك وتكفر
واصبر وارضى عن كل البلا والظيم
واتوقع يسر بعد العسر يظهر
ويگول الرسول بوحي رب الكون
لو رايد رضا المعبود المقدر
تفرح بالبلاوي ولا تضل محزون
مثل الفرح بالزينات وتتشكر
والصاحب صدگ اصدگ وياه بخلاص
والچذاب اتركة لو غني واكثر
وبچلمه دعائك وكت يلفي الضيج
تره ربك بكلبك دومك اتذكر
وتيقن تره بضيمك وضيم الناس
يدري الباري بالينكشف والينسر
ياما خلصك من مشكلات وظيم
وانت بلا وعي شلون الامر يدبر
لكن دعوة المؤمن عبير تروح
للباري ويريدك بالطلب اكثر
واللوح الموقر كلشي بي مكتوب
بي مجمل امور الدنيا تتسطر
لكن يمحي ربك من امر مكتوب
لو ظالم يتوب من الذنب والشر
والمؤمن صدگ يمتحنه رب الكون
لو هوه صدگ بالبلوه مايضجر
لو من ذنبك البلوى امر محدود
والبلوه عليك من الذنب اصغر
واخلص بالتوكل باليقين وزود
تجزي الشدة لو چانت جبل واكبر
ربك رايد المؤمن شجاع ايصير
يعلى اعلى الضعيف من الله يتقدر
واتحلى بطباع الزرع لو عطشان
مايشكي ويتاني الدنيا من تمطر
والطير امن يغرد بالكرم موصوف
ما يطلب مقابل مثله هم تگدر
تحچي بطيبة وتفرح جميع الناس
والغاية عمل معروف مو منكر
دومك وي الهك خصة بالايمان
يشرح صدرك وبالطيبة تتعفر
ربك صاحبك لجل الحفظ والخير
لو ظامت الدنيا انت بسلام اخضر
والصاحب ملك بالدنيا يعتز دوم
وابشر تره الله بصحبتك اجدر
هاي الصحبة لا تنساها لو لحظات
وافرح بيها دومك والگلب ينسر
اطلب منه كلشي ولاتضل محتار
وتوقع اجابة وربك الاقدر
اسماعيل القريشي
الخميس 2020/6/4
لمشاهدة القصيدة اضغط هنا
رد مع اقتباس
المشاركة الأصلية كتبت بواسطة انثى مخمليةة
