هنا

[Mohammed K.F]

صباح الخير دررنا الاعزاء
أحيانا كثيرة نصادف أشخاص رائعين ما ننساهم وتبقى عندنا الرغبة بالتواصل وياهم حتى لو ابعدتنا الظروف عن بعض..
امامكم محادثة بين طالب ومدرّسة اعدادية( موجودة ويانة بالدرر).. الطالب بعد ما انهى الاعدادية ودخل الجامعة بقى يبحث عن طريقة يتواصل بيها وية المدرسة اللي يعتبرها صاحبة فضل ( بالمحادثة حتشوفون شلون صاحبة فضل ).
كان عنده سؤال واحد فقط لا غير....عود انتو اقرو المحادثة بلا ما اتعب نفسي بالسوالف:


بصراحة أحسد هذا الطالب على هيج مدرسة.. خو مو مثل حظي بيوم الامتحان المراقب جاب كرسي وگعد يمي! صرت ما ارفع عيني من ورقتي
بس هسة ست دررية اختنا بالله الا تگولين كنت ما ادري؟ خو گولی شفقة مني على مستقبلكم ولان ردتكم تنجحون كنت اغلس من اشوفكم تغشون!

هسة اريد اسمع ذكرياتكم من ايام الدراسة.. هم غيشتو او غششتو؟ عبرت على المراقب لو صادكم؟ اذا صادكم شنو كانت العقوبة؟
بعدين ارجع احجيلكم ذكرياتي

ملاحظة: اتفقت وية سوزان اللي يعرف منو هاي المدرّسة يحصل تقييم من سوزان

انتظركم

[Suzana]

هههههه منو هاي
كارثه انت والله

[قدّاح]

آنه بحياتي ما نقلت من صديق ولا علّمت صديق .
إلا واحد من الطلاب ، چان وياي بصف الخامس ، وچان شقي ومتنمر ، فطلب مني اعلمه ، وبسبب الخوف علمته ، ولحد الآن من اتذكره احقد عليه واعض اصبعي .

[،،،،،،،،،]

هههههه شكد حلوو

اتمنى هالمدرسه تراقب عليه

احجي فد موقف صار بيه عود يعني قررت اغش

صاحبتي شمرت ورقه الي بيها حل رياضيات

بحيث الحل گدامي ومگدرت اكتبه كان الاستاذ المراقب مخيف بشكل. وسلمت الورقه وطلعت
خفت كلش

[فقار الكرخي]

اكبر غشاش بتاريخ وزارة التربية العراقية
هو محدثكم

مرة من المرات اخذوني للمدير بسبب الغش
امشي كدام المدرس وبجيبي ورقة الغش ما اكدر اطلعها من جيبي واشمرها
لأن المدرس وراية
واعرف من اوصل للمدير راح يفتشوني
جان امد ايدي بجيبي واطلع الكصكوصة واحطها بحلكي وابلعها
شافني المدرس
وساعه يدور بحلكي
احجي شحطيت بحلكك
استاذ ماحطيت شي
ولك اني شفتك بعيني
ونكرت ويم المدير فتشوني وجان يتفشل استاذ صباح
يكلة الورقة بجيبة
المدير يدور يكلة ماكو وينها
جان يكلة بلعها يمكن


اما سالفة هاي المدرسة
لو هي بدال استاذ صباح
جان ما بلعت الورقة
جان بلعتها الها

[البارون ..]

الحمدلله لله ما غشيت
معدلي بالعلمي كان 89
وما اتقبل فكرة الغش

موضوع لطيف
بادرة طيبة من قبلكم اخي الكريم محمد
صباحك أمل

[Mohammed K.F]

هاي شنو محد عرف شخصيتها؟

[Mohammed K.F]

هههههه منو هاي
كارثه انت والله

هههههههههه
ما اكول منو
لعد شعبالج تريديني اضيع هيج فرصة ثمينة ؟
أحلى شي من سألتها شلون جانو يغشون
تكول جنت استحي اباوع عالطلاب لعد وجودج بالقاعة تسجيل حضور وقضاء واجب لو شنو؟

[Mohammed K.F]

آنه بحياتي ما نقلت من صديق ولا علّمت صديق .
إلا واحد من الطلاب ، چان وياي بصف الخامس ، وچان شقي ومتنمر ، فطلب مني اعلمه ، وبسبب الخوف علمته ، ولحد الآن من اتذكره احقد عليه واعض اصبعي .

يا اخي ما تكلي انت المن عايش اذا لا غشيت ولا غششت؟
انعم الله على ذاك الطالب الشقي بسببه سويت عمل خير وحصلت كم حسنة
منور صديقنا

[Mohammed K.F]

هههههه شكد حلوو

اتمنى هالمدرسه تراقب عليه

احجي فد موقف صار بيه عود يعني قررت اغش

صاحبتي شمرت ورقه الي بيها حل رياضيات

بحيث الحل گدامي ومگدرت اكتبه كان الاستاذ المراقب مخيف بشكل. وسلمت الورقه وطلعت
خفت كلش

اي والله انتي بعد عندج فرصة تحصلين هيج مدرسة تراقب عليج
خو سلمي الورقة اللي كتبتها صديقتج
حرام احد يغش بالرياضيات