غريبة الدنيا ما ندري الخلل وين..
گمنه نخاف نسمات البساتين ..
گمنه نخاف نتنفس بالوجوه
ونحس أرواحنا عدلين ميتين ! ..
دنيا وصارت اليشتم هوى يموت
وعكست صرنه نحسد بالمساجين..
كون بكبرة خاتل جوه السطوح
وضمينه البيوت من الدرابين..
وتفرقنه مثل ورقات الأشجار
وسلام البينه وداع الغريبين..
وتلثمنه وبعد ما نعرف الناس
أم تشوف أبنها وتسأله منين..
لا ظلت مودة ولا حضن حار
حتى چفوفنه صارت سچاچين..
وكت بيها الشباب تموت بسكوت !
لا تشيع لا صرخة نساوين..
لا صحبانه تفتر بيه الدروب
ولاچادر يضم ناسه القريبين ..
عجيبة النعش ما ينشال بجتاف
وحيد ويمشي من البيت للطين..
عرفنه النفس يغلى ويرخص بساع
وشفنه الناس تختل بالحياطين ..
ادهم عادل
رد مع اقتباس
المشاركة الأصلية كتبت بواسطة انثى مخمليةة
