السلام عليكم ..
قبل قليل كنت اتصفح فيسبوك ابو المشاكل ...و شفت صورة ...و تذكرت حادثة صارت وياية شخصيا ً ..
اليكم الصورة :
لن اعلق على همجية المنظر ...سأنتقل للحكاية مباشرة .
في السنة الاولى من اقامتي الدورية بعد التخرج ، كنت اداوم في مستشفى ، كان دوامي في طابق الجراحة ، و كان اكو مريض من احدى المحافظات ، المريض كان شاب في بداية العشرينات من العمر ، كان عنده سرطان و منتشر و في مراحله الاخيرة ، بحيث واصل مرحلة عجز كلى و نسويله غسيل كلى في غرفته اكثر من مرة ...
هذا المريض ،كان للأسف غرفته دائما مليانة ناس ، مرافقين على زوار ، كلهم من نوع شباب ، كل مهمتهم انه يسولفون ، و يقلقون راحة المريض و الطبيب اللي يجي يتوّر عليه ، اني كنت وقتها خفاراتي بين يوم و يوم ، و بحكم وضع هذا المريض كان صارله هواية بالطابق لأن ما يگدر يطلع للبيت ، كانوا اهله يعرفوني لأن مثل ما گلت بين يوم و يوم اني وحدي بالطابق و ازوره و افحصه و اكتب علاج بالطبلة و كلشي حسب الاصول ، و طبعا ما اسولفلكم على التفييك مالت الشباب بذاك الوقت بس اكمل و اطلع من الغرفة ، تبدي فيكات ، اي دكتورة ، و هسة شتگولين ، ما يصيرله چارة ( طبعا هم يعرفون ماله چارة ، بس سخافة و عود يعني دا يتناقش وية الطبيبة و يستعرض عضلاته ) ، و يخلص واحد ، و يبدي اللاخ : دكتورة مو لو يموت احسن له ... !!!!! اگول الهم ، اخوان الموت و الحياة بيد الله ...احنا نقدم له اللي نگدر عليه طول ما هو موجود ...
الخلاصة ولد عمامه و خواله و السادة التارسين الغرفة ، اللي جايين من المحافظة و ماخذين اوكسجين الغرفة و ملعبين نفسي ، چانوا ضايجين من المريض و يريدوه بس يموت ...حتى ينفض عرسهم هذا .
اما اني فيشهد الله ، انه على گد ما كنت اضوج منهم ، على گد ما كنت انقهر على مريض اهله ينتظرون موته ، و كنت دائما كلش اداريه نفسيا و بديت بسبب سخافاتهم من ادخل للغرفة اطلب من الكل يطلع ، بس يبقى اخوه او ابوه ، حتى اگدر اسوي واجبي و احچي وية المريض و افتهم من شنو يشتكي و اقيس ضغطه و الخ من واجبات التور.
في ليلة من ليالي الخفارة و بعد ما
كملت النايت تور عليهم ، اكون مكان بالطابق اجمع بيه الطبلات و ابدي اكتب علاج ثاني يوم ..
فجأة سمعت صياح و عياط من جهة غرفته ، و بدت اكو اشياء تنرگع ، و اصوات عجيبة غريبة ،و ناس تصيح وينها ..!!!!
نهضت من مكاني حتى اشوف شنو الموضوع ، لأن اني كنت المسؤولة الخفر بالطابق كملاك طبي ...و من واجبي اشوف المشكلة ..بس قبل ما اتوجه لأي مكان ما شفت الا المعينة الخفر اللي تنظف الطابق ، اجتي علية تركض و فتحت باب خلف المقعد اللي كنت جالسة عليه ، الباب عرضه نص متر ، يؤدي الى غرفة قياسها متر بمتر ، هي تخلي بيها مواد التنظيف ، جرتني من صدريتي و شمرتني بالغرفة و قفلتها من برة ...طبعا اني من ذهولي ...ما نطقت كلمة ، لأن المرة كانت جدا تحترمني ، و بوقتها الطبيب اله سلطة مو مثل هسة ، يعني اني بالخفارة مديرتها ، و تصرفها كان بلمح البصر ...
بقيت اني بوسط الزاهي و الماسحات ، كنت اسمع برة اصوات تكسير و صياح قريبة جدا من الباب ...و اصوات رجال بعدهم يصيحون وينها ...و المعينة تگوللهم : شمدريني اني !
طبعا الشعور الغالب علية بوقتها ، كان الغضب من المعينة ، لأن اكو احد محتاجني برة و هي حابستني ، بس بنفس الوقت خفت اضرب عالباب او اتخذ اي اجراء لأن مدا افهم شدايصير ..
ما يقارب النصف ساعة ...هدأت بعدها الامور ...و انفتحت الباب ...
كانت المعينة مدنگة راسها و تگوللي : اسفة دكتورة ، اعذريني ، حبستچ هنا ، بس و الله ما شفتيهم ، شايلين العود و يكسرون و يصيحون وين الدكتورة ...كسروا المكان كله ، و خفت لا يضربوچ ...لأن سووها مرة غيرهم و ضربوا طبيبة گدامي هنا .
بقيت عاجزة ان اتكلم ، كنت صغيرة ، و مصدومة ، و مدا افهم ...ليش بعد كل عدم التقصير وية ابنهم ممكن يدورون علية حتى يضربوني من يموت ؟ مو هم اللي چانوا يتمنون يموت ، !!! مو هم اللي ضايجين يريدون يرجعون لبيوتهم ؟
مو الولد بيه سرطان منتشر و عجز كلى و ما بيه امل و يعرفون بأي لحظة الله ياخذ امانته !!
كل هاي الاسئلة طرحتها بعدين على المقيم الاقدم ( عمي ) اللي اجى بسرعة من دار الاطباء حتى يطمئن علية ...و ياخذ اللازم بحقهم ..
و جاوبني ببساطة : دكتورة هذولي يكسرون المستشفى و يضربوچ حتى يوجبون اهل الميت ..هاي ثقافتهم .
بلغني بوقتها ، انه استدعى الشرطة ( اكو ضمن المجمع مخفر شرطة ) و قبضوا عليهم كلهم ..و ما قبلوا يسوولهم شهادة وفاة الا بعد ما دفعوا التقديرات الاولية لخسائر المستشفى .
ذاك كان وقت بيه الشرطي يرجف امة ...رغم اني اكره ذاك الوقت ..بس لازم نعترف .
نعترف ، انه احنا شعب ، مع الاسف عنده فصام بالشخصية ، يحچي بالشهامة ، و اول ما رادوا رجاله يسوون واجب ، دوروا على طبيبة بنية يضربوها ، ما استحوا على نفسهم ..و ياريتها كانت مقصرة .
شعب ، ما يفهم انه المستشفى اللي كسرها و هي بوقتها من ارقى المستشفيات ، اجهزتها حق لمريض اخر ممكن يستفيد منها .
شعب لحد الان من يقرا منشور بالفيس يشوف بيه طبيب انضرب ، يكون كل همه يسب الطبيب و يوصف شلون هو يستاهل لأن ما عنده انسانية و هو لا شافه و لا عرف شسوة ، و على اساس المعلق عنده انسانية من كتب عاشت ايد اللي ضربه ...و لو يدري هو شگد ..........!
هسة ..كل ما اسمع طبيب انضرب او اعتدوا عليه لفظا او تمزيق ملابس مثل الصورة ، احتقر بلدي و هيچ همج ، يوجبون ميت ، بضرب حي خدمهم ...و ربما ما قصر ..بس حبوا يلاوون ملك الموت الما يتلاوا ، فطلعوا حيفهم بطبيب ..الجبناء.
و اسفة للأطالة ...بس لعبت نفسي و حچيت ..و يمكن اول مرة اكتب تجربة بالعامية ..لأن المرارة اكبر من الفصحى بهواية .
و دمتم .
رد مع اقتباس
