اريد الكه بسكونك حيل...
ومساتر شفايف تنفضح باليل
ادك ياباب ؟
باب التوبه مامفتوح...
اريد وياك... اغش عين الفلح واسكيك نية ماي؟
اريد وياك امد صوتي سما وجبريل؟
وافرشلك جناحي ومدري وين انشيل؟
تعبانين والموسم فحط والغيث؟
ماندى اعله زلف الكاع
شيله ولا بجه وياها؟
وشني الجنه وعليمن فاكه البيبان؟
ما بيهه صريفه وعوز جاليش انتمناها؟
انتمناها وهي المابيهه جوية نار....
لوخبزه وحلم تنور
لو شبكة عشك لو فاتحه اعله المشو نقراها؟
وبواجينه اعله كد الليل...
تغوي اعيونه ودنيا اشتهيناها؟
والي بنار الذنب تاريخ مو ذكرى....
وخشوعي امنين؟
مدري منين ؟ الله العاشك يعذره؟
وقيامتنه ندى وعالورد ماكو حساب....
يشفعله الفراش وحوبة الفقره....
وتدنالي....
تدنالي..همس عميان..
وافضحني شمس تموز؟؟
واشبكني برضاتك سنه من الحرمان..
راودني جرح حتى اشتهيك انسان...
تستغفر عليمن كلشي ما ممنوع...
ذنب اهل العشك ما حرمه القران؟
رادونه انتبدى ادموع
فشله امنول المركاض...
لاّخر مشتهات الكاع...
ونغادر هوى وي الروج
لامركب يلمنه ولايلفنه شراع....
رادو كل حلم ننساه...
رادو نشتهي المامش وما نلكاه
نكفربالوحي اليفرض على المسكين
ياكل بس صبر لوجاع...
نكفر بالذمم والمنبر المفضوح...
الي بسوكه الذمم تنباع...
ماعدهم رساله ودينهم مشبوه...
رادونه انتلاكه اصنام؟
مايدرون....عشكك مثل دم مجتول ...
ضاعت جم سنه وما ضاع؟
وابجيلي يالبعينك سما ملاكَه ...
ونواعيك نبي واّيه؟
اريد امتد على شفافك
رضاب وسجدة حجايه؟
كبل لا هاجر وي الليل
نجمه اوحشتي ولايه؟
ترى بجنح السما معزيات
تقرى وجوهنه قرايه؟
اخذني وياك......؟ لاّخر وحشة زلوفك؟
اريد افتك واعوف الناس
بلكت حسرتي تعوفك؟
رضات الله اعله كل صفنه البست عينك
تراجي وكشخت بشوفك؟
رضات اعله جرحي الهجر
محرابه وتوضى بسيفك وخوفك؟
تمنيتك هوى امن الله...
اشتهيت اتنفسك تابوت؟
حتى احيا امنشوفك جاي..
والبس من وفاتي سنين كلهه تراب؟؟
وانزع جثتي امنالموت....
والتذ بالسمار البيك
نسمة مستحى بروحي...
وألم حيلي واشبكك حيل...
من تغبش تعب فلاح...
واحصد شوفتك موسم ضوى وقداح....
وإنعيّد بفصل الشيب... بلكت بالكبر نرتاح؟؟؟
,,,,,,,,,,,,,,,
للرائع الشاعر
((وســـــــــــــــــــــا م سباهي))
رد مع اقتباس
