زي ما اتكلمنا قبل كده عن برج الاسد ومميزاته وصفاته, النهرده هنتكلم بقى عن الجانب المظلم من هذا البرج الناري! نتمني إن كل أصحابنا مواليد برج الأسد ميزعلوش مننا :) ويخدوا الكلام ده بصدر رحب ويفكروا فيه… عشان ده فعلا ممكن يساعدهم لو الصفات السلبيه ديه عندهم… يلا نبدأ؟
يا ترى أيه هي عيوب برج الأسد؟!
1- العند:
أصحاب برج الأسد يتميزوا بالعند الشديد.. وده شيء طبيعي بينبع من ثقة الأسد الزيادة في نفسه, بيخليه مش بيستحمل أي نوع من أنواع النقد وللاسف ده بيدي للحواليه شعور مش بس انه عنيد لأ وكمان انه متعجرف أو متغطرس… وبيبقي صعب جدا على الشخص اللي قدامه انه يقنعه بأي حاجة مختلفة عن اللي في دماغه.
2- حب التملك:
برج الأسد لما بيدخل في علاقه بيبقي فيها بكل كيانه ووجدانه, وبيبقي عنده شعوره فظيع بتملك شريك حياته وكمان بيبقي غيور جدا, طبعا مش كل الشخصيات بينفع معاها علاقة بالشكل ده لأن فيه شخصيات كتيرة وخصوصا الأبراج الهوائيه بتحب يبقي ليها مساحتها من الحرية…
3- متسلط:
برج الأسد عنده الشعور بالتحكم والتسلط, خصوصا لو كان في علاقة هو فيها الشخصية الأقوي المهيمنة, بيحب يكون في موقع المسيطر في أي موقف ومع أي حد, يحب يكون هو القائد و بيبقي متوقع إن كل اللي حواليه هيبقوا تابعين ليه.. ده ممكن يسبب مشاكل انه يدخل في صدام أو تحدي لأن فيه ناس كتير صعب إنها تفهم أو تتقبل إنها تتحط في موقف التابع…
4- نفاذ الصبر:
حماسيين وعاطفيين ولما بيتشجعوا لفكرة بيفضلوا وراها لحد لما يحققوها وبيبقوا مستعجلين قوي انهم يشوفوها بسرعة وده بيخليهم عندهم نفاذ صبر واحيانا تهور, هما بيبقوا عايزين حاجات كتيرة وبيبقوا عايزنها كلها دلوقتي حالا!
5- التفاخر:
حب الأسد للتفاخر بنفسه وانه يبقي مركز اهتمام اللي حواليه اوقات بيبقي مشكله, لأنه ممكن يخليه ميسمعشي اللي حواليه كويس. أو لو كان في خروجه أو قعده واهتمام الناس مش متركز عليه هتلاقيه بيكون متضايق وعايز يمشي ويسيب الخروجه.
6- حبه للدراما:
طبعا لو انتوا اسد أو في حياتكم اسد أكيد انتوا فاهمين يعني ايه دراما! :) الأسد شخصية بتعيش بمنتهي الشغف .. بياخد كل حاجة بحماس وبطريقة كلها دراما ومؤثرة, اوقات ده بيبقي ممتع للأشخاص اللي حواليه أو لشريكه لانه بيخلي الحياة مفيهاش ملل وكلها اثارة, واوقات تانية الدراما ده بيبقي ليها جانب سلبي وهو تضخيم وتكبير المشاكل, وممكن يخلي سوء فهم أو موضوع بسيط ياخد اكبر من حجمه ويقلب الموضوع نكد أو خناق..
رد مع اقتباس