رجل الاضواء في كل الظروف في شغله او بين اصحابه، بيعرف يجذب الانتباه والانظار له ويكون محط الاهتمام والاحداث بس بمنتهى الرقي وبدون ابتذال، بيعرف كويس جدا ازاي يكون متواجد في التجمعات والحفلات بطريقته في التعامل مع الناس والانتقال بين الشلل والجروبات المختلفة عشان يحي الجميع ويتكلم مع الكل، مرح جدا وكله طاقة وبيحب ينشر المرح والحماس في كل اللي حوالية، عنده كاريزما وجاذبية عالية جدا، كل الصفات دي بتنعكس جدا على طريقة اختياره لملابسه وبتحدد استايل هدوم رجل برج الاسد
عاشق للالوان
في الحقيقة ممكن يكون موضوع حب الالوان ده مختلف بالنسبة لمفاهيم ملابس الرجال عن ملابس النساء لكن نقدر نلاحظ بكل وضوح ان رجل برج الاسد بيبعد عن الباستيلات والالوان الباهتة على اد مايقدر، وبيحب يلبس الالوان الواضحة بس له طريقة معينة في تركيب الالوان على بعض بتخلي ستايله جذاب جدا لأنه مش بيلبس الالوان بطريقة مزعجة ابدا، بيحب الابيض والاحمر والاصفر وغيرها من الالوان المبهجة وغالبا بيحب يبسط نفسه بلبس لون شبابي وجذاب لما بيكون في اجازة او خروجه كاجوال
استايل هدوم رجل برج الاسد
الجاكيت قبل اي شيء
وده لأن رجل برج الاسد تقريبا بيركب جاكيت او بالطو او بليزر او سويتر على كل هدومه واستايلاته مهما كان الطقم او المناسبة اللي هو رايحها لازم حنلاقي معاه قطعة خارجية فوق الهدوم كاجوال او فورمال تقيلة او خفيفة لكنها ضرورية طول الوقت، ولأنه شخص واثق في نفسه جدا فمش بيفرق معاه انه يلبس صيحة جديدة او مختلفة خصوصا فيما يخص موضوع الجاكيت ده يعني مثلا ممكن يلبس حاجة ملونة اوي ومش بيفرق معاه جذب الانتباه او بالعكس كمان ممكن دي حاجة تبسطه، وفي احيان اخرى ممكن يلبس جاكيت رسمي اوي حتى لو هو مش كبير في السن لكنه بيحب الجاكيت او البالطو اللي بيدي انطباع بالفخامة
استايل هدوم رجل برج الاسد
لمساته الخاصة
من اوضح الصفات اللي بتميز استايل هدوم رجل برج الاسد وهي حبه لأظهار شخصيته عن طريق اللبس يعني بيعرف يختار الاستايل المناسب للمكان اللي هو رايحة ويحط مجموعة من اللمسات اللي بيدي من خلالها رسالة لاي حد قدامه يعني مثلا مكن يلبس نظارة نظر عشان يبان بشكل عملي وجاد، او يلبس كرافت رسمية عشان يدي انطباع باحترام القواعد والالتزام وغيرها كتير من اللمسات اللي بيظهر بيها شخصيته
استايل هدوم رجل برج الاسد
ذوقه في القمصان والبنطلونات
زي ما قلنا قبل كده رجل برج الاسد بيحب الالوان وبيحب يلبس القمصان الملونة والبنطلونات كمان مش بيحد نفسه بدرجات فاتحة او كلاسيكية المهم ان اللبس ييكون انيق وشيك مش مبتذل او ذوقه مزعج، وبالنسبة للقمصان فهو غالبا بيحب يلبس القميص بداخل البنطلون مش بيفضل اوي استايل القميص اللي بيتلبس من بره وده عشان يبقى سهل عليه انه يلبس معاه جاكيت حتى لو كان الجاكيت ده كاجوال، اما البنطلونات فرجل برج الاسد بيحب يجرب الاستايلات الجديدة وممكن يلبس البنطلون القصير او السليم فيت المهم ينسقه بشكل شيك وملفت في الاخر من غير ما يتنازل عن اناقته.
استايل هدوم رجل برج الاسد
الاحذية
بشكل عام بيحب يلبس البووت والاحذية الجذابة اللي شكلها قوي ومميز، وبتعامل مع الشوز على انه قطعة اساسية في اللبس لازم ينسقها مع باقي الاستايل بنفس الاهتمام اللي بيدية لأي قطعة لبس تانية في هدومه، عشان كده بيحب يختار الشوزات بتاعته بشكل مرتب مش مجرد بيشتري شوز يفي بالغرض وخلاص، ومش بيعتمد استايل خاص في المسألة دي بمعنى انه لو لابس استايل كاجوال ممكن ينسق معاه بووت كاجوال او اكسفورد استايل شوز ولو حيلبس فورمال يبقى حيختار شوز رسمي وكلاسيكي اما الكوتشي او الاحية الرياضية عموما فمش من ضمن اختياراته اوي لأنه غالبا بيحب يلبسها وقت الرياضة وبس.
استايل هدوم رجل برج الاسد
وفي النهاية طبعا موضوع اللبس ده بتدخل فيه الاذواق الشخصية والعادات والراحة النفسة والذوق وغيرها كتير جدا من العوامل لكن ديي كانت السمات العامة اللي بتميز استايل هدوم رجل برج الاسد
رد مع اقتباس
