البرج العاطفي الحنون المثير “برج السرطان” اتكلمنا عنه بالتفصيل وشرحنا إيه هي أهم صفات برج السرطان في مقالة سابقة, أحنا النهرده هنتعمق أكتر إزاي البرج ده بيتعامل, بيتفق أو بيختلف مع الأبراج التانية, مواليد برج السرطان من 21 يونيو لحد 22 يوليو.
من أنجح علاقات برج السرطان بتكون مع (الحوت، العقرب، العذراء والثور) ومن أصعبهم واللي بتكون محتاجة شغل وصبر عشان تنجح (الحمل, الميزان).
توافق برج السرطان
تعالوا نتعرف على توافق برج السرطان مع الأبراج التانية بالتفصيل:
1- برج السرطان والحمل:
الحمل غالبا بيشعر بالخنقة من احتياجات الأسرة والاصدقاء على عكس السرطان اللي عنده موضوع العاطفة ده زياده وبيكرس حياته لأصحابه وأسرته, الحمل ممكن مين غير مايشعر يستغل جزء العطاء عند السرطان, وده بيولد شعور عند السرطان إن الحمل برج استغلالي والسرطان ممكن يحس إن الحمل حساس زيادة عن اللزوم ومش بيبقي قادر يفهم أو يستوعب المشاعر ديه.
الحمل ممكن يتعلم من السرطان العاطفة والقدرة على العطاء, والسرطان ممكن يتعلم من الحمل الاستقلالية والاعتماد على النفس.
نوع العلاقة: علاقة صعبة جدا واختلاف كبير! لازم محاوله للتغيير والمرونه من الطرفين عشان العلاقة تنجح لأن فيها تحد كبير جدا.
2- برج السرطان والثور:
أنتم الاتنين بتقدروا قوي الحياة المنزلية, بتعرفوا إزاي تنبسطوا بأبسط الطرق, اللي حواليكم بيحسوا أد إيه أنتم صادقين, حساسين وبتهتموا باللي حواليكم. وبيقدروا قوي اللي انتوا بتعملوه عشانهم, لو أنتم عندكم أطفال هتكرسوا حياتكم عشانهم وهتبقى علاقتكم قوية قوي بيهم, أنتم الاتنين بتستمتعوا بالحياة الهاديه البعيده إلى حد ما عن الدوشة والإزعاج, الثور شخصية عملية واسلوبة في الحياة بيحصل على محل تقدير كبير قوي من السرطان.
نوع العلاقة: عندكم تناغم وتعاون وفيه بينكم حاجات كتيرة مشتركة, بتقدروا بعض ومن السهل جدا انكم تنجحوا مع بعض عاطفيا.
3- برج السرطان والجوزاء:
السرطان هو الشخص اللي بيهتم بمشاعر الأخرين حتي لو على حساب نفسه, بيسأل على كل الناس, بيهتم بكل الناس وبيسمع ويحاول يحل مشاكل كل اللي حواليه.
السرطان بيهتم قوي بالذكريات والماضي , بيحب دايما يبقي على إتصال بالصحاب القدام و ينبسط ويرتاح وهو في الأماكن القديمة, ده طبعا على عكس الجوزاء زي ماذكرنا أكتر من مرة.
السرطان عاطفي أكتر وبيحب دايما في كلامة أو في طرق حله للمشاكل إنه يركز على جزء المشاعر والاحاسيس على غير الجوزاء اللي بيحب يركز عليها فكريا عشان الجوزاء بيبقي عنده نظريات كتيرة وطبعا موضوع صراحة الجوزاء اوقات كتير بيبقي صادم شوية للسرطان.
فيه نظريات بتتكلم عن انجذاب الأضداد “يعني الناس المختلفة” وبنلاقي النظرية ديه صح قوي في حالة الجوزاء والسرطان, السرطان بيحب ذكاء الجوزاء وطريقة تفكيره والجوزاء بيحب العاطفة والعمق اللي عند السرطان. من الواضح إن بين البرجين دول حاجات كتيرة قوي ممكن يتعلموها من بعض.
نوع العلاقة: البرجين بينهم أختلاف, محتاجين وقت ومجهود عشان تعرفوا تتفاهموا, بس بمجرد إن ده يحصل علاقتكم هتكون رائعة عشان هتكملوا بعض.
4- برج السرطان والسرطان:
حساسين وعاطفيين, مشاعركم متقلبة وممكن تتأذوا بسهولة وتاخدوا الحاجات على شكل شخصي, مشاعركم عميقة وبتتعلقوا بالماضي والعيلة والاصحاب زي ماقلنا قبل كده
انتوا الاتنين بتحبوا تحسوا إن الناس تكون محتاجكم ومحتاجين مع شريك حياتكم علاقة قوية, وثيقة كلها حب وعطاء, أهم حاجة في حياتكم هي أسرتكم وعيلتكم.
نوع العلاقة: قوية جدا! لأنكم بتبقوا فاهمين بعض كويس قوي كأنه كتاب مفتوح وبتقدروا مشاعر بعض …
5- برج السرطان والأسد:
أنتم الأتنين بتخدوا الحياه بمحمل شخصي جدا, يمكن أكتر ما انتم متخيلين, مشاعركم وكبريائكم سهل قوي إنها تنجرح من نقد أو عدم تقديير من الناس اللي حواليك.
فيه بينكم ارتباط وتفهم ودفء, على الرغم من إن انتم مختلفين إلى حد ما, الأسد فخور جدا بنفسه وبيحب يحس انه متقدر وشريكه بيحترمه ويحبه, والسرطان بيحب يحس إن شريكه محتاجه وبيدعمه معنويا وعاطفيا.
الأسد عنده صعوبه انه يتقبل المشاعر السلبية, الحزن, الضعف أو الأحتياج والمشاعر ديه كتير بيحس بيها السرطان.
الأسد مهيمن أكتر من السرطان وبيحب يبقي هو المسيطر في العلاقة, وده متماشي قوي مع السرطان اللي مش بيفرق معاه ومش بيحب انه يكون هو الشخص المسيطر.
نوع العلاقة: أنتم عندكم حاجات حلوه بتجمعكم مع بعض بس مفيش نسبة عالية من التفاهم, والموضوع محتاج شوية مجهود.
6- برج السرطان والعذراء:
الاتنين بيعانوا من موضوع المشاعر المتقلبة ده وممكن في بعض الأوقات الصفة دي تسبب مشاكل ما بينهم, السرطان كتير مشاعره بتتقلب مابين حزن, قلق,عاطفة, حنين والعذراء مشاعره ممكن تقلب ويغضب جدا وفجأة من حاجات بسيطة وفي وقت زي ده ممكن يغلط ويجرح السرطان بكلام وسخرية ونقد وده بيأثر جامد قوي في السرطان اللي شخصيته حساسه.
وعشان كده العذارء لازم يتحلي بالحكمة والقدرة على السيطرة على مشاعرة, والسرطان لازم يحاول يقلل موضوع الحساسية ويكون اكثر تسامحا ده عشان العلاقة تنجح مابينهم. التوافق انكم عندكم قدرة على التفاني الهايل لبعض، ورعايتكم لبعض بيجي بشكل طبيعي من غير ماتبذلوا أي مجهود.
نوع العلاقة: أنتم عندكم حاجات حلوه بتجمعكم مع بعض بس مفيش نسبة عالية من التفاهم, والموضوع محتاج شوية مجهود.
7- برج السرطان والميزان:
فيه بينكم شبه إلى حد ما بس فيه برضه اختلاف كبير في الإحتياجات والامزجة, انتم الاتنين بتحبوا تخدوا الامور بالراحة, حساسين, بتحسوا بمشاعر اللي حواليكم, وفي نفس الوقت بتتجنبوا المواجهه على اد ماتقدروا.
الخلافات أن برج الميزان هو أكثر موضوعي وعقلاني وعادل بالمقارنة مع السرطان اللي عاطفي وممكن في حكمه على الأمور يحكم بقلبه مش بعقله, لما بتحصل مشكلة بين الاتنين الميزان بيبان للسرطان إنه بارد والسرطان بيبقي رد فعله شخصي جدا ومش بيعرف يحكم بعقله زي الميزان.
الميزان بيحب إن هو وشريكة يبقوا على قدر من المساواه ويتناقشوا مع بعد على عكس السرطان اللي يحب ياخد دور الأم و ميحبش النقاش العقلاني.
نوع العلاقة: البرجين بينهم أختلاف, محتاجين وقت ومجهود عشان تعرفوا تتفاهموا, وفيه أحتمال كبير للمشاكل مابينكم.
8- برج السرطان والعقرب:
سهل جدا انكم ترتبطوا ببعض, انتوا شبه بعض, عاطفيين, عندكم نفس الأهداف وأمزجتكم متقاربه, الاختلاف ما بنكم إن العقرب اقل عاطفه شوية من السرطان عشان كده ساعات بيحس إن السرطان نكدي, لما السرطان بيتضايق بينسحب ويدخل جوه القوقعة بتعته بس اللي حوله بيحسوا بزعله وضيقه على عكس العقرب اللي بيعرف يخبي مشاعر الزعل جوه وميبينش لأي حد إن فيه حاجه مضايقاة, الولاء مهم جدا لكم انتم الاتنين.
نوع العلاقة: علاقة مثيره وناجحة , بينكم تفاهم قوي وكافي عشان يخلي علاقتكم كلها اثارة.
9- برج السرطان والقوس:
طبيعتهم مختلفة وفيه احتمال لحدوث تصادم كبير بين الاتنين دول, القوس بيحب الاستكشاف, السفر, التغيير على عكس السرطان اللي بيحب البيت والعيله وإنه يحس بالامان في مكانه, ده بيخنق احتياج القوس للحرية و الاستكشاف.
القوس فلسفي بيحب النظريات وانه ميخدش الأمور بشكل شخصي طبعا على عكس السرطان تماما.
نوع العلاقة: متناقضين ومختلفين, صعب انكم تقتنعوا بشخصية بعض, بس لو حصل ما بينكم انجذاب بيكون قوي وبتقدروا تغيروا وتأثروا في شخصيات بعض.
10- برج السرطان والجدي:
شخصياتكم على النقيض من بعض, زي ماذكرنا قبل كده اد إيه حب السرطان للبيت, العيلة, الأصحاب, الجدي عنده مشكلة في الارتباط عاطفيا في علاقاته مع الاخرين, بالنسبه للسرطان بيحس إن الجدي جاف وطموح زيادة عن اللزوم, والجدي مش بيقدر يستوعب ولا يفهم جزء المشاعر الزايد عن السرطان.
الحاجات المشتركه: انتم الاتنين بتدورا على الأمان, الإستقرار والإخلاص في العلاقات,
نوع العلاقة: ممكن يحصل مابنكم انجذاب الأضداد بس لو قدرتوا تفهموا بعض, لأنكم فيه بينكم احتمال انكم تكملوا بعض…
11- برج السرطان والدلو:
السرطان بيحب جدا جو العائلة و القعدة فى البيت اكثر من الدلو اللى برده يعتبر عاطفى نوعا ما بس مش من اولوياته العيلة و الاهل لانه بيركز اكثر فى هواياته و اهتماماته الخاصة . السرطان مش سهل عليه يسافر او يهاجر او يغير مكان البيت اللى عاش فيه طول عمره لانه بيرتبط بالاماكن و الاشخاص جدا لكن الدلو ممكن يتنقل بسهولة و يغير مكانه لو هو شاف ان التغيير ده هيحققله اى مكاسب خصوصا فى مجال شغله او مستقبله. السرطان دايما بيكون قلقان من المستقبل وانه يوفر الماديات والاساسيات للحياة و للأسف الدلو مش بيقدر يقدم للسرطان القدر الأدني من الإتصال بالمشاعر اللي السرطان بيبقي محتاجة.
نوع العلاقة: متناقضين ومختلفين, صعب انكم تقتنعوا بشخصية بعض, وقدامكم تحدي كبير عشان تقدروا تنجحوا العلاقة ديه.
12- برج السرطان والحوت:
عندكم قدر رهيب من التفهم, المشاعر الفياضه, الدفء والألفة, حساسين وتلقائيين, بتقدروا مشاعر بعض جدا.
الفرق الواحد بين البرجين إن السرطان بيهتم أكتر بالناس القريبة لكن الحوت دايرة اهتمامة اوسع من كده وبتشمل الناس القريبة والبعيدة, من الاخر يعني بتشمل أي حد بيحتاج عطفه واهتمامه حتي لو مش قريب قوي منه. طبعا ده اختلاف ضعيف قوي ومش من النوع اللي ممكن يسبب مشاكل مابينكم.
نوع العلاقة: ناجحة ومثيره وفيها تفاهم ومرونه وتقدير.
في النهاية حابين نقولكم إن موضوع الأبراج مش لازم ينطبق علي كل الناس زي بعض وبنفس النسبة عشان كده لو فيه بينكم مش بينطبق عليه الكلام ده, ده شيء طبيعي جدا. احنا قدمنا المقارنة من من جانب واحد بس, لكن في الحياة فيه جوانب تانية كتيرة جدا بتأثر في العلاقة احنا متأكدين طبعا انكم بتاخدوا بيها في حكمكم, وفيه في العالم علاقات كتيرة جدا ناجحة بين كل علامات الأبراج, لأن اهم حاجتين ممكن ينجحوا أي علاقة هما (الحب والتفاهم)…
نتمنى إن الموضوع يكون عجبكم وفعلا استفدتم منه.
رد مع اقتباس