مواليد الحمل الشغوفين المتحمسين، اللي بيشعوا تفاؤل ونشاط من الابراج اللي مواليدها محبوبين في وسط اصحابهم ومعروف عنهم شجاعتهم وحبهم للمغامرة، النهاردة حنكمل كلامنا عن صفات مواليد برج الحمل اللي هما مواليد الفترة من 21 مارس لغاية 19 ابريل، لكن حنتكلم عن الجانب التاني من شخصيتهم يعني عن السلبيات، تعالوا نتكلم شوية عن عيوب برج الحمل
عيوب برج الحمل
– رافع مناخيره شوية:
من العيوب المعروفة في مولود الحمل هي انه متعجرف شوية، دايما حاسس ان هو الصح وان تفكيره ووجهة نظره هي المظبوطة وغيره لأ وده ساعات بيخليه شخصيه مشاعرها احيانا بتكون جامدة وقاسية شوية ومتعالية على غيرها.
– راسه ناشفة:
مولود الحمل راسة ناشفة وعنيد وبيتمسك جدا بوجهة نظره ورأيه ومايغيرهمش بسهوله حتى لو بينه وبين نفسه مش مقتنع بيهم اوي، لكن العند بيبقى اقوى من صوت العقل احيانا، وده بيخلي مواليد الحمل شخصيات صعب الاخد والرد معاها في الكلام او وجهات النظر لأنهم مش مرنين
– متهور ومندفع:
على اد الحماس والشغف اللي في مولود الحمل حتلاقي اندفاع وتهور وده لأن حماسه الزايد تجاه المواضيع اللي داخل عليها او اللي بالفعل مشغول بيها بيخليه يتصرف بإندفاع وغالبا بيتصرف بإرتجال من غير ما يدرس الموقف بشكل كافي دايما تصرفاته وليدة اللحظة
– بيكره القواعد:
مولود الحمل مايحبش الانضباط والالتزام بالقواعد عشان ده في وجهة نظره بيحسسه بأن حماسه متقيد وانه مش قادر يتصرف بكل طاقته ونشاطه اللي هما كتير اصلا بسبب القواعد والالتزام عشان كده هو احيانا شخص بيتصرف خارج اطار الالتزام والقوانين
– بيتكلم من غير ما يفكر:
ساعات كتير مولود الحمل بيسأل من غير ما يفكر وبيكون مندفع في كلامه وده لأنه اما متحمس زيادة وبيكون مش عارف هو بيقول ايه، وساعات بسبب عجرفته اللي بتخليه يقول كلام قاسي واحيانا يجرح اللي قدامه، هو بيندم بعدها وبيحاول يلطف الموقف لكن بيرجع تاني ويقع في نفس الغلطة مع اقرب موقف.
– سريع الملل:
حماسه وحبه للمغامرة بيخليه يزهق من المواضيع بسرعة وممكن يتخلى عن الموضوع اللي هو مشغول فيه حاليا عشان يبدأ حاجة جديدة بحماس جديد وروح جديدة، وده بيخلي مولود الحمل مش هو الشخص المثالي اللي ممكن تعتمد عليه في شغل طويل الاجل
اكيد مش قصدنا ان حد يزعل مننا ولا احنا بنوجه انتقاد طبعا لمواليد الحمل لكن يمكن لو ركزنا على الصفات دي نقدر نغير في طباعنا السلبية دي شوية
رد مع اقتباس
