درر العراق

مـصطفى · 15/July/2020

تفاهة .. الشر !!

- اكو فيلسوفة يهودية من اصل الماني اسمهه "حنة ارندت" انولدت بسنة ١٩٠٦ ، وتوفت بسنة ١٩٧٥ ميلادية ..
- شبيهه هاي الفيلسوفة ؟
- هاي الفيلسوفة طلعت نظرية جديدة حول مفهوم الشر سمتهه "تفاهة الشر" ..
- بلكي تسولفلنه شوية بالتفصيل عن هاي النظرية ..
- صار تتدلل ، عندما كُلفت الفيلسوفة حنة آرندت عام 1961 بكتابة تقرير لجريدة "النيويوركر" عن المحاكمة العسكرية التي أُجريت في إسرائيل لمحاكمة "أدولف أيخمان" ..
- لحظة لحظة ، منو هذا "ادولف ايخمان" ؟
- هو ضابط بالقوات الخاصة الألمانية بزمن "هتلر" ، واللي ساهم في اعتقال وابادة الكثير من اليهود الالمان ..
- هااا خوش كمل ..
- هنا "حنة ارندت" كالت : اكو سؤال يطرح نفسه ويتمرغل بالكاع وهو : هل من الممكن أن يقوم الإنسان بفعل شرير ويكون الإنسان نفسه ليس شريرا ؟ يعني هل من الممكن أن يقوم "ادولف ايخمان" بقتل العديد من اليهود ، وبنفس الوقت يكون "ادولف ايخمان" انسان غير شرير ؟
- اي وبعدين ؟
- بعام ١٩٦٣ ميلادية طلعت "حنة ارندت" كتاب سمته (أيخمان في القدس : تقرير حول تفاهة الشر ) ، بهذا الكتاب طرحت "حنة ارندت" نظريتهه حول الشر ..
- وشتكول هاي النظرية ؟
- هاي النظرية تكول : ان الشر سطحي و "تافه" ، ولايستند على اي جذور عميقة تدعمه ، أو أيديولوجيا ينبع منها ..
- مو واضح ؟
- شوف : اكو عدنه نوعين من الشر :
الاول : شر جذري ، يعني هذا الشر اله جذر في طبيعة الإنسان ، يعني الشر معجون في خلقة الإنسان ، مثلما الخير جذري ومعجون واصيل في خلقة الإنسان ، يقول الله تعالى : ( ونفس وماسواها ، فالهمها فجورها وتقواها ) ..
الثاني : شر تافه وسطحي وما اله اي جذور في طبيعة الإنسان ، يعني عندما خلق الله الإنسان لم يخلق الشر معه ، وإنما خلق الله الإنسان وعجنه بالخير فقط ، وبالتالي فالشرور اللي جاي نشوفهه بالدنيا هي أمور سطحية و "تافهة" ، بمعنى انو ما الهه اي جذر طبيعي تستند عليه ، ليهنا واضح ؟
- نعم واضح ..
-"حنة ارندت" تكول : بالرغم من أن "ادولف ايخمان" قام بفعل شرير جدا وهو قتل الكثير من اليهود ؛ إلا أن "ادولف ايخمان" نفسه لم يكن شريرا حين قيامه بهذا الفعل ..
- شلون ؟
- تكول : انو الدافع اللي خله "ادولف ايخمان" يقوم بهذا الفعل الشرير ليس طبيعة "ادولف ايخمان" الشريرة ، وليس وجود كره شخصي في قلب "ادولف ايخمان" تجاه اليهود ؛ وإنما الدافع اللي خله "ادولف ايخمان" يقوم بهذا الفعل الشرير هو التزامه بالاوامر العسكرية الصادرة من "هتلر" ..
- امممم كمل كمل ..
- ف"ادولف ايخمان" ماجانت عنده مشكلة شخصية وي اليهود ، وماجانت عنده نظرية أو أيديولوجيا يؤمن بيهه بالقضاء على اليهود ؛ هو كان مجرد آلة بدون ضمير يتحكم بيهه القانون الألماني في حكم هتلر ..
- يعني جان يطبق الأوامر فقط بدون رؤية شخصية حول الأحداث ، بمعنى انو لو افترضنه انو "هتلر" أمر "ادولف ايخمان" بتكريم اليهود بدل قتلهم لفعل ايخمان ذلك أيضا ، مو صحيح ؟
- جدا صحيح ؛ ولذلك تكول "حنة ارندت" : شوفوا الشر شكد تافه وسطحي ؛ لانو مايستند على نظرية أو أيديولوجيا أو فكر عميق ، بحيث يقوم شخص مثل "ادولف ايخمان" بقتل أعداد كبيرة من الناس دون أن يوجد في قلبه ذرة حقد أو كره تجاههم ، قتلهم على أمور تافهه مثل المنصب والالتزام بالقوانين وتطبيقهه ، بعكس الخير اللي اله جذور عميقة في وجود الإنسان واللي اكو نظريات وأفكار عميقة تدعمه ..

والحمد لله ..

الصورتين لحنة ارندت و ادولف ايخمان ..