فن .. المجاملة !!
- قبل فترة صادفني موقفين مختلفين تماما ، الموقف الأول وي شاب يبلغ من العمر ١٦ سنة تقريبا ، والموقف الثاني وي طفلة عمرهه ٤ سنوات تقريبا ..
- ها خويه ، سألت الشاب اللي عمره ١٦سنة من باب الملاطفة والمجاملة وكلتله : عمو منو تحبه أكثر ، آني لو أبوك ؟ فأجاب مباشرة ومن دون تروي ( وهي عادة الحمقى عادة ) : طبعا أحب ابوي ، انت شنو ؟!!
- فعلا ، فشلني ، وتندمت بصراحة لمجاملتي اله ، وقررت بعد ما أجامل ياهو الجان ؛ لانو مو الكل يستحق ، والزرع بالأرض الصبخة مايجيب نتيجة ..
- المهم ، شنو الموقف الثاني اللي صادفك واللي يختلف عن الموقف الأول ؟
- الموقف الثاني يااخي والله يدعو إلى العجب والتأمل ، طفلة عمرهه مايتجاوز الأربع سنوات ، سألتهه امام ذويهه من باب ملاطفتهم ومجاملتهم ، وكلتلهه : خالو منو تحبينه اكثر ، آني لو ابوج ؟ والله العظيم ، خزرتني خزرة تنم عن تفكر وتأمل في ماهية الاجابة ، وكأنما فكرت بينهه وبين نفسهه شوية في كيفية رد مجاملتي لابوهه وامهه ، وأخيرا حسمت امرهه وجاوبتني : طبعا احبك انت خالو أكثر من ابوي !!
انا متاكد ، بل متيقن أنها تحب والدها أكثر مني ؛ ولكن مالذي دعاها لقول ماقالته وهي في مثل هذا السن ؟
صدك عود ليش كالتلك هيج ؟
- الظاهر والله العالم ، انو الإنسان عندما ينشأ نشأة طبيعية بدون عقد نفسية مسلطة عليه من قبل الأب والأم ، وعندما يكون خالي من الأمراض النفسية الوراثية ، وعندما يكون محاطا ببيئة نظيفة ، وغيرها من العوامل الأخرى ، أقول : عندما ينشأ الإنسان في مثل هكذا ظروف ، سوف يكون انسانا سويا طبيعيا يتصرف على سجيته مهما كان عمره ، وأعتقد أن هذه الطفلة أتيحت لها مثل هذه الظروف الجيدة ، فنطقت بمانطقت ..
- زين ، بهاي الحالة ، اذا واحد انولد في محيط خايس (حشا السامع) ، أو ورث صفات تعبانة من ابوه وامه ، ويريد يغير نفسه للافضل ، فشنو يسوي ؟
-اذا جان هذا الخنيث يريد يغير من وضعه ، فلازم يتعلم بعض المهارات الاجتماعية اللي تخليه محبوب من قبل المجتمع ، ويترك بعض الامور الموزينة اللي تنزله من عيون الناس ، لازم يتعلم فن المجاملة ، ولازم مايسولف مشاعره اذا جانت جارحة للاخرين (يعني لا يصير فطير زيادة عن اللزوم ) ، عليه أن يعلم أن اظهار الحب للآخرين أولى وأهم من اظهاره لذويه ..
-ليش ؟
-لأن حبه لذويه وحب ذويه له من الامور البديهية التي لا تحتاج إلى إظهار وإبراز ، بينما الآخرون أولى بإظهار الحب والاحترام لهم ؛ لأنهم لا يعلمون ماتخفيه في صدرك تجاهم ، فابراز المشاعر الطيبة للآخرين يجعلك كبيرا في أعينهم ، ولك مكانة طيبة في قلوبهم ، افهم ذلك ولا تصير دجة !!
والحمد لله ..
رد مع اقتباس
المشاركة الأصلية كتبت بواسطة MiSsO
