الطلاق والترمل .. قديما وحديثا !!
- وحدة من الأخوات شكتلي من زوجهه وتكول : هذا الرجال مخلي حياتي وياه جحيم ، يكومني بكتله ويكعدني بكتله ، غلط وفشاير واهاين اربعة وعشرين ساعة ، مروتك وجهني شسوي ؟
-اطلكي ..
-اطلك ؟! لا لا مستحيل !
-ليش مستحيل ؟
- اذا تطلكت راح تنتهي حياتي ؛ لانو محد راح يقبل يزوجني ،
بالنتيجة هاي المرأة رضت بالأمر الواقع وقبلت بقسمتهه وقبلت تعيش وي جلادهه تحت سقف واحد ؛ لأنو ثقافة المجتمع ترفض الزواج من المرأة المطلقة أو الأرملة ، وهاي الثقافة هي عكس الثقافة القديمة اللي جانت سائدة في عصر الإسلام والعصر الجاهلي ..
- شلون يعني ؟
- يعني بزمن صدر الإسلام وماقبله جانت المرأة اللي متزوجة عدة مرات ، هاي المرأة تكون مرغوبة من قبل الرجال أكثر من المرأة اللي بعدهي بنية بيت أو متزوجة مرات قليلة ..
- مو واضح ؟!
- شوف : كبل العرب بزمن الإسلام وماقبله جانوا يفضلون المرأة اللي متزوجه أكثر من مرة ، يعني مثلا مرأة مات رجلهه ، وره فترة تزوجت غيره ، وهذا الزوج الثاني مات أيضا ، هنا راح يكون سوك هاي المرأة ماشي أكثر من غيرهه ..
-ليش ؟
- لانو الرجل العربي عندما يفكر بالزواج ، يفكر بينه وبين نفسه ويكول : هاي المرأة اللي رجلهه مات ، ليش تعاقب عليهه أكثر من زوج ؟ شنو السبب اللي يخلي الرجال تطارد وره هاي المرأة ؟ اكيد هاي المرأة عدهه قدرة عالية ومهارات فنية راقية تستعملهه لاسعاد زوجهه ، وإلا شنو السبب اللي يخلي الزلم ترغب بيهه !!
- اي وبعدين ؟
-وبعدين يذهب إلى خطبتهه والزواج منهه ، فكلما كثر أزواج المرأة كثر خاطبيها والراغبين في الاقتران بها ، بعكس الثقافة الحالية اللي تتنفر من الزواج من المرأة المطلقة أو المتزوجة أكثر من مرة ، ويسمونهه "ام الرجولة" ، وهو تعبير يوضح مدى استحقار المجتمع للمرأة اللي تتزوج أكثر من مرة ..
- حلو ؛ بس السؤال إللي يطرح نفسه ويتمرغل بالكاع هو : اذا جانت ثقافة المجتمع الإسلامي والمجتمع الجاهلي تؤيد وتحبذ الزواج من المرأة كثيرة الأزواج أكثر من غيرها ، ليش هاي الثقافة تغيرت بهذا وكتنه مع انو أغلب ابناء المجتمع هم عرب ومسلمين ؟
- والله ماادري (بصوت ذاك الرجال) !!
رد مع اقتباس
المشاركة الأصلية كتبت بواسطة ПộR
