الخوف .. والاطمئنان !!
-الخوف هو توقعك لشيء سيء راح يحدث بالمستقبل ؛ يعني عندك ايمان انو باجر لو عكبة راح تحصل مصيبة وكارثة ، وبالتالي راح تعيش مرعوب وخايف وماعندك واهس للحياة ، واضح ؟
- واضح ؛ ولكن الاطمئنان شنو فرقه عن الخوف ؟
-الاطمئنان همينه توقع شي راح يحدث بالمستقبل ؛ بس هذا الشي زين مو سيء ؛ يعني تؤمن بانو باجر لو عكبة الله راح يفرجهه وماكو اي شي مقلق ، وبالتالي راح تعيش مرتاح وفي حالة سلام وفرح ، تمام ؟
-تمام ؛ بس شتريد تكول ؟ يعني شنو الرسالة اللي حاب توصلهه من وره كلامك هذا ؟
-اللي اريد اكوله : انو الخوف والاطمئنان كلاهما ايمان بالغيب ؛ يعني توقع شي راح يحدث بالمستقبل ؛ يعني ماحاصل هسه ؛ ولكن الفرق بيناتهم انو الخوف يعيشك بتعاسة ورعب ، بينما الاطمئنان يعيشك براحة وسلام ..
-مو واضح ؟!
-شوف : هسه احنه جاي نعيش واقع انتشار مرض "كورونا" ، هذا الواقع انت عندك طريقين للتعامل وياه : طريق الخوف ، وطريق الاطمئنان ، فإذا اختاريت طريق الخوف وانو انت أو واحد من اعزاءك راح يصير بيه هذا المرض لا سامح الله ، فهذا معناه انو انت آمنت بشي غيبي بعده ماصاير ، وبالنتيجة راح تعيش حاضرك خايف ومرعوب واحتمال تلفلك مرضة بسبب خوفك والحالة النفسية السيئة اللي تمر بيهه ، جيد ؟
-اها كمل ..
-واما إذا اختاريت طريق الاطمئنان وتخليهه وره الله ، وتكول : (قل لن يصيبنا الا ماكتب الله لنا) ، و(الجايبه الله هله بيه) ، فهذا ايضا معناه انو انت آمنت بشي غيبي بعده ماصاير ؛ ولكن هذا الاختيار والايمان أفضل من الاختيار الأول ؛ لانو بهذا الاختيار راح تعيش مرتاح البال ومسلم امرك لجبار السموات والأرض ويكون حاضرك سعادة وفرح ، واحتمال كبير جدا انو انت ماراح تتمرض ؛ لانو حالتك النفسيه الجيدة راح تؤثر على صحتك الجسدية ..
-زين ، هذا الشي بيدي لو مو بيدي ؟ يعني اكدر اختار واحد منهن لو الشغلة لا إرادية ؟
-اكيد انت عندك حرية تامة في ان تختار ان تعيش حالة الخوف أو حالة الاطمئنان ، وبالتالي تستطيع التحكم بحياتك وتوجيهها بالوجهة اللي انت تريدهه ، فالخوف خيار ، والاطمئنان خيار ، وانت بكيفك اختار اللي يعجبك ، يقول بوب بروكتور : (الإيمان و الخوف كلاهما يتطلب منك أن تؤمن بشيء لا تستطيع رؤيته) ، فاختر مايشعرك بالراحة والسلام ودع عنك مايشعرك بالقلق والتوتر ..
رد مع اقتباس
المشاركة الأصلية كتبت بواسطة سـمــيــر ..
