كلنا اكيد سمعنا عن مخاطر مرقة الدجاج الجاهزة اللي بتتباع في السوبر ماركت وانه بيكون داخل فيها مكونات مضرة صحيا ، ولكن سواء هي مضرة فعلا او لا ، في كل الاحوال الحاجة المعمولة في البيت بتكون مضمونة اكتر لانها طبيعية 100% وبنبقى عاملينها بنفسنا وعارفين ايه المكونات اللي داخله فيها ، والنهاردة من خلال موضوعنا هنقولكم طريقة عمل المرقة في البيت ، مرقة الدجاج والخضار.
طريقة عمل المرقة في البيت:
– طريقة عمل مرقة الدجاج:
المكونات:
– 1 كوباية خميرة غذائية (متوفرة في السوبر ماركت).
– 1 ½ معلقة كبيرة ملح.
– 3 معالق كبيرة بصل بودر.
– 3 معالق كبيرة بقدونس مجفف.
– 1 معلقة كبيرة ثوم بودر.
– 2 معلقة صغيرة بذور كرفس (متوفرة في السوبر ماركت او عند العطار).
– 2 معلقة صغيرة زعتر مجفف.
– 2 معلقة صغيرة بابريكا.
– 1 معلقة صغيرة كركم.
– 1 معلقة صغيرة فلفل اسود.
طريقة التحضير:
– اجمعي كل المكونات واطحنيها في مطحنة التوابل او في الخلاط ، لحد ما تبقى بودرة ناعمة ، خزنيها في برطمان محكم الغلق.
– عشان تعملي منها شوربة وتضيفي منها للاكل ، خدي معلقة صغيرة من الخليط وضيفي لها كوباية مية مغلية.
طريقة عمل مرقة الدجاج
– طريقة عمل مرقة الخضار:
المكونات:
– 1 جزرة كبيرة غير مقشرة.
– 2 سيقان كرفس.
– 1 بصلة متوسطة.
– شوية من البقدونس الاخضر مع السيقان.
– 2 عود من الزعتر الطازة.
– 2 عود من اكليل الجبل الطازة (الروزماري).
– ملح – الكمية 20% من وزن الخضروات والاعشاب اللي هتستخدميها.
تقدري تضيفي اعشاب وخضروات تانية حسب اختيارك لو عايزة تضيفي لها نكهة زيادة: زي الثوم, الطماطم, الكرات, الريحان, المرمرية, وغيرها من الخضروات والاعشاب.
طريقة عمل مرقة الخضار
طريقة التحضير:
– اغسلي الخضار كويس وجففيه وقطعيه واضربيهم في الخلاط ، حطيهم في طاسة وضيفي لهم كمية الملح المناسبة زي ما قولنا 20% من وزن الخضروات والاعشاب ، مثلا لو وزن الخضار 455 جرام يبقى محتاجة تحطي 91 جرام ملح.
– اطبخي الخضار والاعشاب في الطاسة من غير اس اضافات تانية على نار هادية لمدة ساعتين مع التقليب كل شوية عشان ميلزقش ، في البداية هتلاقي الخضار نزل المية بتاعته ، سيبيه على النار لحد ما يتشرب المية تماما ، ارفعي الخليط من على النار وافرديه على صينية مفروشة ورق زبدة.
– دخليه الفرن على درجة حرارة 150 درجة مئوية ، لحد ما يجف ويبقى مقرمش شوية (حوالي ساعة و 15 دقيقة) ، ومتنسيش تقلبيها من وقت للتاني.
– بمجرد ما الخضار يبرد ، حطيه في الخلاط واضربيه لحد ما يبقى عندك بودرة ناعمة.
– وكده مرقة الخضار تبقى جاهزة ، خزنيها في برطمان زجاجي محكم الغلق ، هتقعد معاكي لمدة هتوصل ل 3 شهور.
– عشان تعملي منها شوربة تضيفيها للاكل ، ضيفي معلقة صغيرة على لتر مية مغلية (4 كوبايات).
طريقة تانية لمرقة الخضار:
المكونات:
– 1 كوباية خميرة غذائية.
– 1 ½ معلقة كبيرة ملح.
– 1 معلقة كبيرة ثوم بودر.
– 1 معلقة كبيرة بصل بودر.
– 1 معلقة كبيرة زعتر مجفف.
– 1 معلقة كبيرة بقدونس مجفف.
– 1 معلقة صغيرة بذور كرفس.
– ¼ معلقة صغيرة كركم.
طريقة التحضير:
– اخلطي المكونات كلها مع بعض ، واطحنيها في مطحنة التوابل لحد ما تبقى بودرة ناعمة ، خزني المرقة في برطمان محكم الغلق.
– عشان تعملي كوباية شوربة تضيفي منها للاكل ، ضيفي 1 معلقة كبيرة من الخليط لكوباية مية مغلية.
رد مع اقتباس
