الراعي يْطب جهنّم من ورا انفاسه!
ماي الحِبّ، عُمر يِخلص مْن الكترين!
سْنينه يْعيشهن من هامته وْ ساسه!
اشْ ما تشرب الماي، تْحسّ أسِر بالماي!
ما طول بْحبل تتچتّف الطاسه!
البُعد بين النِفَس و الذنب، بطن الناي!
الراعي يْطب جهنّم من ورا انفاسه!
ماحب*¹ النهر، طبع الغجر بالماي!
يركض عَ الخفيفه يْشيلها بْراسه!
تعجبني الگصيبه عْيونها عْلىٰ الگاع!
وْ تبني احلامها مْن الراس للتربان!
حلاتك يا نخل، چي تنصعد مشبوگ!
وْ حلاته الْ شابگك، لو عشگ لو بردان!
لا يا صاحبي، وكتك تْصرفن خيل!
لا تجهل سَماري وْ واقعي التعبان!
زغيره وْ تنعصر، تترس عْيونك ماي
لا تستهزئ بْحبّاية(ت) الرمان!
گود حْچايتك مثل ابنك مْن الْايد!
وْ عبّرها مثل مَا تْعبّر العميان!
لا تسحگ احساسك حتّىٰ تصعد فوگ!
يحرگ وادمه مِن يِصعد الدخّان!
عْلىٰ دوس اچتافها حْلوگ المساحي تْعيش!
يا ذِلْةِ الِحْلوگ الْ تاكل وْ تنهان!
بنىٰ عشّه بْبلم و تْورّط العصفور
وْ خِلص عمره سفر و تْدولبه النهران!
العوچيّه و الخيمه انولدن مْحدبات!
إخذ اطباعهن خاطر تْعيش إنسان!
الزلمه الْ عاش خايف، گهوه لا تنطيه!
گبل لا تصل حلگه، يْهزلك الفنجان!
م
رد مع اقتباس
