أعذرك
أعذرك
ما ضگت حزني
وْ لا تدري اش كثر بيَّ بچي مْخمّر
أنَا كاس عْشگت شفّه
بْعقايدها السِكِر ممنوع
أنَا حتى غناي اسمر
قميص الصفنه عبالي عْلى گد الليل
أثاري اكبر
حزن روحي ذنب قِسّيس
تارس صفنة المعبد
وْ عمر ضحكاتي حَسَوْ طْيور
شمس صبحي ضواها اسود
أحن‌لك و ابچي من اضحك
أذکرك و ادفى من ابرد
أعذرك
بس المعاتب نفس، لـ ال خنگ ریته فْراگ
أعذرك و ال يحب يِعذِر
و احبك يا سوادين ال تحلّي سْوالف العشاگ
أرید اشكیلك اللهفه غَنَى مْضيعين
أنَا بْروحي نبي یْغنّي لون اشتاگ!
أنَا گلبي ظِفِر مشلوع
أنَا بيَّ الويع ينضاگ
يا ون
يا نعي
يا آخ
يا عثره
أعذرك
ما جست هدمك
لگيته مْن البچي مْجرجف
مثل خبزه بْطبگ فِقرا
أعذرك
ما نمت تتأمّل البسمه
وْ تفز خانگتك العبره
و لا لیله حضنت الله
وْ بچيت
وْ گتله اخذ روحي
بگايه العمر ما دبره
باسم الشموسي
رد مع اقتباس
.